Tubande kwalukiila bipwa bipeela kunyima. Neemiya mufubi a Nfumu Kesersese baadi mwina Isaleele baadi mushale mu Perse mu Suse. Bakwabo na Neemiya abafikile na mukandu wibubi ku Yuuda shi: ‘Mwilo ubaalukiile ku Yeelusaleme ta wi mu butaale nya. Midimba na biibi bibaabadi babumbule kwi bena Babilone ta kwi muntu mwibiibakye nya.’ Neemiya nkwinyongola. Aye nkukimba bya kwenda mu kukwasha ku Yeelusaleme na nkuteka Efile Mukulu bwa shi nfumu amutadiile bwadya kwenda.

Kunyima, nfumu bamwene shi Neemiya baadi mwinyongole. Aye nkumulungula shi: ‘Ntambandjile nkumona mwinyongole bino nya. A mwanda kinyi?’ Neemiya nkumulungula shi: ‘Ne kukutwa kwikala na kinyongwa naminyi p’ekale Yeelusaleme kibundji kyande mu mpombo?’ Nfumu nkumwipusha shi: ‘Okyebe nkukitshiine kinyi?’ Neeminya nkwela luteko musango umune mwishimba. Akupu nkumulungula shi: ‘Ntadiile namu bwandja nkwenda ku Yeelusaleme mu kwibakuula midimba.’ Nfumu Kesersese nkulungula Neemiya bwa kwenda mu kwibakuula midimba, akupu nfumu baadi mushinkamishe shi baadi na kya kwikala mulamiibwe mwishinda. Baadi dingi mutuule Neemiya bu mukata a kibundji kya Yuuda na kumupa mabaya a kukita biibi bya kibundji.

Pabafikile Neemiya ku Yeelusaleme, baadi mwifuunyishe midimba ya kibundji. Akupu, aye nkubunga ba tshiite mwakwidi na bakunkushi na nkwibalungula shi: ‘Uno mmwanda ngwa kukaanya. Abitungu twipaane mu mudimo.’ Mwilo nkukumiina, abo nkubanga kwibakuula midimba.

Anka bangi ba ku beshikwanyi ababangile kwibasepa pa kwakula shi: ‘Sunga kanyema ka mukyengye ke kuponesha bimano byanwibakuula.’ Bafubi nkushika matwi ku bibaabadi abeebakaa p’abo kutungunuka na mudimo. Midimba ibaadi ayende na kunyingiila.

Beshikwanyi abaatshile kitshibilo kya kufika ku mpese ilekeene bwa kutuuka beena Yeelusaleme ngoshi mu kabasamushi. Pabapushile beena Yuuda mpàngo yaabo, abapushishe moo. Anka Neemiya baadi mwibalungule shi: ‘Tanutshiinanga nya. Yehowa e neetu.’ Aye nkutuula balami bwa kukalwila bafubi, takubaadi mushindo wa shi beshikwanyi bebatuuka ngoshi nya.

 Penda munda mwa mafuku 52, abapwile kwibakuula midimba na biibi bya Yeelusaleme. Neemiya nkutwala beena Leevi booso mu Yeelusaleme bwa kukita musangeelo wa kumulambula. Baadi mwibabungye mu bisaka bibidi bya ba tuyimba. Abayiile dya ku Kiibi kya Nsulo, mu mpala mwabo, abo nkukaamina mu mpese ilekeene ya kibundji. Abo nkuyimba na bindaala na tushiba na mikwasa bwa kutumbisha Yehowa. Eesela bayile na kisaka kimune, Neemiya na kingi kisaka, mpa na pabaabadi bafumankane ku ntempelo. Mwilo ooso, balume, bakashi na bana nkutuusha milambu kwi Yehowa bwa kukita musangeelo. Tuleo twa muloo wabo tubaadi atupushika ku bula.

“Kilonda kyooso kifushiibwe bwa kulwa noobe ngoshi takikitshi kintu’kyoo.”—Yeeshaya 54:17