Enda bwa kuleshe myanda i mwanka

Enda bwa kuleshe kashibo ka myanda i mwanka

 DILONGYESHA 1

Efile Mukulu bapanga eyilu na nsenga

Efile Mukulu bapanga eyilu na nsenga

Yehowa Efile Mukulu nyi Mwitupangye. Bapangile bintu byoso, abimweka na bish’abimweka. Kumpala kwa kupanga bintu abimweneka, bapangile ba miikeyilu bakile bungi. Ouku shi ba miikeyilu mbantu kinyi? Ba miikeyilu nyi mbantu babaabadi bapangye kwi Yehowa bamwifane. Anka bu byatushi balombeene kumona Efile Mukulu, abo namu’nyi, t’abamwekaa nya. Mwikeeyilu a kumpala abapangile bafikile mukwaashi aaye. Yawa mwikeeyilu bakwashishe Yehowa pabaadi apanga nyenyenye, ma planete na bingi bintu byoso. Umune a ku aa ma planete nyi nsenga, mbalo ibuwa yatudi bashaale.

Akupu, Yehowa balumbulwile nsenga bwa shi nyema na bantu bemushale. Bapangile nguba bwa kumunyika nsenga. Apanga myengye, meema a tulunga na myeela.

Nkinyi kibaadi kikitshikye kunyima? Yehowa bambile shi: ‘Nakyebe kupanga lubishi na mitshi.’ Mitshi ibungi ilekeene ayituusha bikuba, midyoko na bilongo bibungi nkubanga kumena. Akupu, Yehowa nkupanga bipangwa bilekeene—abipapama, abiyowo, abiikaka na abisoboka. Bapangile kubanga ku tupeela bu tupuku, na ku bikata bu ngyefu. Nyema kinyi oodi mufule?

Akupu Yehowa balungwile mwikeeyilu a kumpala shi: “Tupangye muntu.” Bantu be na kya kwikala belekeene na nyema.  Abitungu beekale abaakula, abasepe na kwela nteko. Be na kya kulama nsenga na nyema. Ouku baadi muntu a kumpala su? Tubande kutala.

“Ku kibangilo, Efile Mukulu baapangil’eyilu na nsenga.”—Kibangilo 1:1