NSAA y’okwete kwenda, wele mwikungishanyi noobe mboko bwa ku muladika. Anka, omono shi akutala na kifuko kyoobe ngofu. Akwele dingi mboko na akudiobola. Akulungula shi: “Ne nkwela lukonko su? Bwakinyi nwi belekeene na bangi bantu?” Obe namu omwipusha shi: “Wamba naminyi?” Aye namu shi: “Namba shi, we Temwe a Yehowa su? Nwi belekene na bangi bantu. Tanwi bi bingi bipwilo nya—tanusangelaa angi mafuku abamonaa kwi bantu bu eselele, na tanutwelakanaa mu myanda ya politike na mu ngoshi. Munkatashi mwenu tamwi muntu atomaa nfwanka nya. na kifuko kyobe akimweneka bu ki na mwikelo wibuwa. Nkinyi kinwikashe bu belekeene na bangi bantu mu mishindo ibungi byabya?”

Ouku shi lwalulo alutuukila penda ku kintu kimune: Twi ku bukunkushi bwa Bufumu bw’Efile Mukulu. Yesu kwete kwitutoosha bu byadi Nfumu. Kwete kwitukwasha bwashi tutambukile mu ntaba yaaye, twikale bantu belekeene na uno ndumbulwilo e bubi. Mu kino kipindji, atukyebe kumona mushindo wi Mesiya Nfumu mmutooshe mwilo w’Efile Mukulu mu kikudi, mu mwikelo, na mu ndumbulwilo—byooso bwa ntumbo ya Yehowa.