“Eyi dy’Efile Mukulu ndya muuwa.”​—BEENA-EBREEYI 4:12.

NGONO: 37, 116

1. (a) Efile Mukulu bapeele Adame mudimo kinyi? (b) Kubanga mu aa mafuku, bafubi b’Efile Mukulu mbafube na kya buntu kya kwakula naminyi?

YEHOWA EFILE MUKULU bapeele bantu kya buntu kya kwakula. Mu lupango lwa Edene, Efile Mukulu bapeele Adame mudimo wa kuudika nyema yooso mashina. Adame bapeele nyema ooso eshina dimupwandikiile. (Kibangilo 2:19, 20) Kubanga mu aa mafuku, bafubi b’Efile Mukulu mbafube na kino kya buntu kya kwakula bwa kutumbisha Yehowa na kulungula bangi bantu myanda yaye. Mu mafuku ashaale, bafubi b’Efile Mukulu mbafube na kino kya buntu bwa kwaluula Bible mu ingi ndimi bwa’shi bantu bebungi balongye bya kuuka Yehowa.

2. (a) Mmayi a kulonda kinyi abadi balonde kwi Komite a kwaluula Traduction du monde nouveau? (b) Mu uno mwisambo atukyebe kulonga myanda kinyi?

2 Kwi ma Bible binunu na binunu lelo uno, anka kwi angi abashi baalule kalolo. Bwa kwaluula Bible kalolo, Komite a kwaluula Traduction du monde nouveau baadi mwate kitshibilo kya kutumikila ano mayi a kulonda asatu: (1) Kupa eshina dy’Efile Mukulu kineemo na kwidifunda mu Eyi dyaaye misango yooso yadidi mu bifundwe bya kala. (Badika Mateo 6:9.) (2) Kwaluula myanda yooso i mu bifundwe bya kala kishima ku kishima su kwi mushindo. Pa kushii mushindo kwaluula kalolo akipatuula kishima. (3) Kufunda mu ngakwilo mupelepeele  bwa kubadika na kupusha. * (Badika Neemi 8:8, 12.) Babaadi balonde ano mayi a kulonda asatu kwi baluudi ba Traduction du monde nouveau mu ndimi ikile pa 130. Mu uno mwisambo, atukyebe kulonga bwakinyi babaadi batumikile ano mayi a kulonda nsaa ibaabadi baluule Bible mupya a Traduction du monde nouveau a mu 2013 na bikwete kutungunuka kwaluulwa kwaye mu ingi ndimi.

BIBLE APA ESHINA DY’EFILE MUKULU KINEEMO

3, 4. (a) Mbalo kinyi yatudi balombeene kupeta Tetragramme? (b) Baluudi ba Bible bebungi mbakite n’eshina dy’Efile Mukulu naminyi?

3 Eshina dy’Efile Mukulu abedifundaa na maleta ananka a mu kina Ebreeyi abayitanyinaa bu Tetragramme. Twi balombeene kupeta Tetragramme mu maniskri ebungi a kala a mu kiina Ebreeyi, bu Mifungofungo ya ku Kalunga Kafwe. Atwiasangana dingi mu Bible a Septante a mu kiina Greke. Ino Bible babaadi beyifunde bipwa bifikye ku 200 kumpala kwa Kidishitu na bipwa 100 kunyima kwa Kidishitu. Bantu bebungi bakwete kukema p’abo kumona misango bungi i eshina dy’Efile Mukulu mu ma maniskri a kala.

4 Abimweneka kalolo’shi abitungu eshina dy’Efile Mukulu dikale mu Bible. Kadi, kwi ma Bible ebungi ashii n’eshina dy’Efile Mukulu. Bu kileshesho, bipwa bibidi kunyima kw’abo kutuusha Bifundwe bya kiina Greke bya Traduction du monde nouveau, kubatuukile Bible a American Standard Version. Pabaabatushishe uno Bible mu 1901 mubaadi eshina dy’Efile Mukulu, anka pabaabamutushishe dya kabidi mu 1952 babaadi bakatushe eshina dy’Efile Mukulu. Bwakinyi? Bantu babaadi baluule babapushishe’shi “tabibuwa kufuba” n’eshina dy’Efile Mukulu. Baluudi bebungi, ba mu Anglais na mu ingi ndimi, mbakite nka byabya.

5. Bwakinyi bii na muulo kwela eshina dy’Efile Mukulu mu Bible?

5 Su baluudi beela sunga kukaasha eshina dy’Efile Mukulu kwi mwanda su? Oolo! Yehowa winyi sha Bible, akumiina’shi bantu baukye eshina dyaye. Mwaluudi ebuwa abitungu aukye kikyebe ky’eshimba dya sha mukanda bwa’shi kimukunkushe mu bitshibilo byata bwa kwiwaluula. Maverse ebungi aaleesha’shi eshina dy’Efile Mukulu di na muulo na’shi abitungu dineemekibwe. (Efilu 3:15; Misambo 83:18; 148:13; Yeeshaya 42:8; 43:10; Yowano 17:6, 26; Bikitshino 15:14) Na dingi Yehowa baadi muyookyele bafundji ba Bible bwa’shi bafunde eshina dyaye misango binunu na binunu mu maniskri a kala. (Badika Ezekyele 38:23.) Byabya, nsaa ayikatusha baluudi eshina dy’Efile Mukulu, tabaneemeka Yehowa nya.

6. Bwakinyi mbatentekye eshina dy’Efile Mukulu misango isamombo mu Bible mupya a Traduction du monde nouveau?

 6 Lelo uno twi na bishinkamiisho bibungi abileesha’shi abitungu tufube n’eshina dy’Efile Mukulu. Mu Bible mupya a Traduction du monde nouveau a mu 2013 mwi eshina dy’Efile Mukulu misango 7216. Babatenteka dyanka misango isamombo kukila mu Bible mukulu. Mbakumbashe misango itano mwanda mbasangane eshina dy’Efile Mukulu mu Mifungofungo ya ku Kalunga Kafwe yabadi bapete binobino. * Ino misango itano mbeyisangane mu mukanda wa 1 Samwele 2:25; 6:3; 10:26; 23:14, 16. Musango wa kasamombo, wi mu Bansushi 19:18, mbeukumbashe mwanda mbeupete mu kukimbuula mu ma maniskri a Bible a kala.

7, 8. Eshina Yehowa adipushisha kinyi?

7 Beena Kidishitu ba binyibinyi abamonaa’shi bi na muulo bwa kupusha kalolo akipushisha eshina dy’Efile Mukulu. Eshina dyaye adipushisha’shi: “Yawa afwishaa.” * Mu mafuku a kala, mikanda yeetu ibaadi ayileesha akipushisha eshina dy’Efile Mukulu pa kufuba na mukanda wa Efilu 3:14, awamba’shi: “Nakekala kyooso kyankumiina kwikala.” Bible a mu 1984 baadi apushisha’shi Yehowa efwishaa kyooso ky’akumiina bwa kulombasha milayilo yaaye. * Anka, Bible mupya a mu 2013 alesha’shi: “Sunga byekala shi eshina Yehowa adilesha’shi mmukumbeene kwikala kyooso kyakumiina kwikala, ta ndifudiile penda paapa nya. Adilesha dingi kyaadi mulombeene kwikasha sunga kukitshisha bipangwa byaaye bwa kukumbasha mpàngo yaaye.”

8 Yehowa e kwikasha kipangwa kyaye byoso byakumiina’shi kiikale. Bu kileshesho, Efile Mukulu baadi mwikashe Nowa na ngobesha ya kukita bwato, Betsalele baadi mumwikashe nsendwe e buwa, Gideone amwikasha bu kilobo kya ngoshi na Mpyeele bu misionere. Eshina dy’Efile Mukulu di na mpushisho mukumbane pabitale bafubi baaye, nyi bwakinyi Komite a kwaluula Bible a Traduction du monde nouveau beelele eshina dy’Efile Mukulu mwanka.

9. Bwakinyi kwaluula Bible mu ingi ndimi kwi na muulo?

9 Baluudi ba ma Bible ebungi bakwete kunyiisha kukatusha eshina dy’Efile Mukulu. Pa mbalo yadyo bakwete kwela mwaso bu “Mwanana” sunga eshina dy’efile a kwabo. Nyi bwakinyi Kasaka ka Bakunkushi Bakulu akamono’shi abitungu bantu ba ndimi yooso bapete Bible apa  eshina dy’Efile Mukulu kineemo. (Badika Malaki 3:16.) Pa mwanda wa byabya, eshina dya Yehowa dikwete kuneemekibwa mu Bible a Traduction du monde nouveau mu ndimi ikile pa 130.

KWALUULA MU MUSHINDO AUPUSHIKA NA WA BINYIBINYI

10, 11. Nkalakasho kinyi ipete baluudi ba Traduction du monde nouveau mu ingi ndimi?

10 Pabaaluula Traduction du monde nouveau a mu Anglais mu ingi ndimi, bakwete kufumankana na ingi nkalakasho. Bu kileshesho, Bible a mu Anglais mmufube na kishima kya mu kiina Ebreeyi “Sheol” ki mu mukanda wa Mulungudi 9:10 na mu angi maverse. Mu angi ma Bible a mu Anglais mbafube na kino kishima kushii lutato. Anka, ta bi mumune bwa ingi ndimi nya, mwanda bantu bebungi abaakula yaaya ndimi tabauku kyakya kishima kya mu kiina Ebreeyi. Ta kii mu ma diksionere aabo nya, akupu bangi abanangushenaa’shi kibaadi eshina dya mbalo kampanda. Pa mwanda wa byabya, baaluudi babapetele matalwa a kwaluula kyakya kishima kya mu kiina Ebreeyi “Sheol” na kishima kya mu kiina Greke “Hades” bu “Nyembo” sunga bu “Mashaama.” Uno nyi ngalulwilo ebuwa na apushika kalolo.

11 Kishima “anyima” kya mu kiina Ebreeyi na mu kiina Greke kibaadi dingi bukopo kwaluula mu ingi ndimi. Mu yaaya ndimi, kishima “anyima” abekimonaa bu bikudi bibi sunga bu kintu akikatukaa mu mbidi kunyima kwa muntu kufwa. Bwa kupela yawa mpushiisho e bubi, baluudi babapetele matalwa a kwaluula kishima “anyima” muyile byakileesha. We mulombeene kupeta mpushiisho mwilekeene apatuula kishima “anyima” mu apandise a Les Saintes Écritures​—Traduction du monde nouveau​—avec notes et références. Bwa kupusha bishima bya mu kiina Ebreeyi na kiina Greke, kwi bukwashi bwi mu mayi e kuushi kw’esaki mu Bible mupya a mu 2013 aapatuula byabya bishima bwabidya kwikala bipelepeele kubadika na kupusha.

12. Mmyanda kinyi dingi ishintulukye mu Bible a mu 2013?

12 Nkonko yabadi beele kwi baluudi ngikwashe bwa kutundula bingi bishima bya mu Bible bishabipushika. Nyi bwakinyi kubanga mu mweshi wa Kitema 2007, Kasaka ka Bakunkushi Bakulu kabaadi kakumiine bwa kutuusha dingi Bible mupya mu Anglais. Nsaa ibaabadi abakitshi uno Bible, Komite mmutaluule nkonko ibungi ibaabadi bepushe kwi baluudi. Bishima bya mu Anglais bya kala mbebipyanyishe na bishima bya mu ngakwilo a ano mafuku, bino mbibakwashe bwa kufunda myanda ipeelepeele bwa kubadika na kupusha na kulama myanda nka byayidi. Kwaluula kwa Bible kukitshikye mu mafuku ashaale mu ingi ndimi nkukwashe dingi bwa kulumbuula bifundwe bya mu Anglais.​Myeele 27:17.

MBALEESHE LUTUMBU LUKATA

13. Bantu bebungi mbapushe naminyi pabitale Bible mupya a mu 2013?

13 Bantu bebungi mbapushe naminyi pabitale Bible mupya a Traduction du monde nouveau? Bakwetu balume na bakashi mbatume mikanda ya lutumbu binunu na binunu ku biro byeetu bikata bya nsenga ishima bya Batemwe ba Yehowa bi ku Brooklyn mu New York. Bebungi mbapushe nka bu uno mukwetu mukashi bafundile’shi: “Bible nyi musheete wa bintu bya muulo uule mbaa na mabwe a muulo. Kubadika Eyi dya Yehowa kalolo mu Bible mupya a mu 2013 kwi nka bu kutaluula ebwe dyooso dya muulo di mwanka, kumona myanda yadyo ilekeene, kutooka kwadyo, elangi dyadyo na buwa bwadyo. Bifundwe bi mwanka byabadi baluule mu gakwilo mupelepeele mbikwashe bwa kwiukeena kalolo na Yehowa aye mwikale bu nshe bana munkwate bwa kundungula bishima bya kalolo.”

14, 15. Bantu abapusha naminyi bwa Bible a Traduction du monde nouveau mu ingi ndimi?

14 Bantu abesamba ingi ndimi kukatusha Angalais be na dingi lutumbu bwa Bible mupya a Traduction du monde nouveau. Ungi muntu mununu a mu kibundji kya Sofia mu Bulgarie akula pabitale Bible a mu ludimi lwabo’shi: “Ne mubadikye  Bible munda mwa bipwa bibungi, kasha tabandjile kubadika Bible mupelepeele kupusha na akumu kwishimba bu uno nya.” Mu kipaso kimune, ungi mukwetu mukashi a mu Albanie akula’shi: “Eyi dy’Efile Mukulu adipushika kalolo kakile mu kiina Albanie! Twi na kineemo kikata kya kupusha Yehowa kwesamba neetu mu ludimi lwetu!”

15 Mu bibundji bibungi, bibukopo kupeta Bible sunga’shi e na muulo ukaamine. Kupeta kwa Bible nyi mmwabi ukata! Rapore ifikye mu Rwanda ayakula’shi: “Munda mwa mafuku ebungi, bantu bebungi abalonganga Bible na bakwetu tabendanga kumpala mwanda wa kukutwa kwa Bible. Tababaadi na mushindo wa kuula Bible abaabadi batuushe kwi bingi bipwilo nya. Akupu sunga bamupeta, tababaadi abapusha kalolo akipatuula angi maverse, nyi bwakinyi tababaadi abende kumpala nya.” Pabatukile Bible a Traduction du monde nouveau mu ludimi lwabo, kingi kifuko kya mu Rwanda ki na bansongwa bananka kibambile’shi : “Atutumbula Yehowa bikata na mpika a kishima na mupatulukye bwa kwitupa uno Bible. Tatwi na makuta a kuula Bible bwa mwina kifuko ooso mwanda twi balanda. Kadi bwa binobino, ooso a kwatudi e na aaye Bible. Bwa kuleesha lutumbu lwetu kwi Yehowa, tukwete kubadika Bible mu kifuko efuku dyoso.”

16, 17. (a) Nkinyi akikumiina Yehowa bwa bantu baaye? (b) Abitungu twikale na kitshibilo kya kukita kinyi?

16 Bible mupya a Traduction du monde nouveau ekadika dingi kwanka mu ingi ndimi mu mafuku e kumpala. Satana kwete kutompa bwa kwimika uno mudimo wa kumwaluula, anka atuuku’shi Yehowa akumiina bwashi bantu baaye bamupushe pesamba nabo mu ngakwilo mupelepeele, na apushika kalolo. (Badika Yeeshaya 30:21.) Binobino “Eumbo [nsenga] adikala dyuule na kuuka kwa Yehowa abyuulaa meema mu mbuu.”​—Yeeshaya 11:9.

17 Twikaleyi na kitshibilo kya kufubisha kya buntu kyoso akifiki kwi Yehowa, mpa na kino kya Bible apa eshina dyaye kineemo. Tumutadiileeyi bwadya kwisamba neetu efuku dyoso ku bukwashi bw’Eyi dyaaye. E na ngobesha ya kuteemesha kalolo nteko yeetu yooso. Kwisamba naaye akwitukwasha bwatudya kumuuka ngofu, akupu kifulo kyeetu naaye akitungunuka na kutama.​—Yowano 17:3.

“Twi na kineemo kikata kya kupusha Yehowa kwesamba neetu mu ludimi lwetu!”

^ par. 2 Tala mwisambo awamba’shi “Comment choisir une bonne traduction de la Bible ?” mu Kitenta kya Mulami kya mu 1/5/2008.

^ par. 6 Mifungofungo ya ku Kalunga Kafwe ibaapu kukita bipwa bikile pa 1000 kukila bifundwe bya mu kiina Ebreeyi byabetanyina bu texte Massorétique.

^ par. 7 Ingi mikanda ayipatuula eshina dy’Efile Mukulu mu uno mushindo, kadi bantu booso tabebikumiinaa nya.

^ par. 7 Tala mu ka broshire ka; Mukanda aukwasha bwa kulonga Eyi dy’Efile Mukulu, mu ka mutwe ka mwanda akamba’shi: “Eshina dy’Efile Mukulu mu kiina Ebreeyi,” esaki 1.