Bafwe abakekala dingi na muwa su?

Kushi mpaka, mupangi a muwa mulombeene kwiwalusha dingi

Yehowa Efile Mukulu nyi nsulo ya muwa. (Misambo 36:9) Bino tabipushika kalolo bwashi yawa Efile Mukulu umune e kwalusha bantu bafwe na muwa su? Bible etushinkamisha’shi ebikitshi mu mafuku e kumpala. (Badika Bikitshino 24:15) Bwakinyi akakitshi byabya?

Mupangi eetu baadi akumiina kubanga ku mbangilo’shi bantu beekale na muwa wa losoo pa nsenga. (Kibangilo 1:31; 2:15-17) Ino mpàngo yaaye kii’nka nayo bwa bantu. Bikwete kumutapa kwishimba pa kumona byatukwete kukyenga​—nyi bwakinyi afudiisha binobino nshalelo e na nkalakashi.​—Badika Yoobo 14:1, 14, 15.

Bantu abakasanguka abakashaala mbalo kinyi?

Efile Mukulu bapangile muntu bwa nkashala mwiyilu su? Nya. Efile Mukulu baadi mupangye ba mikeeyilu bwashi bashaale mwiyilu. Baadi mupangye bantu bwashi bashaale pa nsenga. (Kibangilo 1:28; Yoobo 38:4, 7) Pa mwanda wa byabya, tubande kutaluula bantu abaadi Yesu musangule. Baadi mwibabuushe ku bafwe abo nkushaala pa nsenga. Mu mushindo umune, bebungi ba ku bantu abakasanguka mu mafuku e kumpala abakekala dimo na muwa pa nsenga.​—Badika Yowano 5:28, 29; 11:44.

Byabya, Efile Mukulu mmusangule bantu bapeela abakasanguka bwa kwenda mwiyilu, abekala na mbidi ya mu kikudi. (Luuka 12:32; 1 Beena-Kodinto 15:49, 50) Baaba abakasanguka bwa kwenda mwiyilu abakamunana na Kidishitu pa nsenga yooso ishima.​—Badika Bifumbulwe 5:9, 10.