“Nayile mu kuula bidibwa kadi nakapeta nka penda bisukwite (buscuit)​—bikaamine muulo misango 10000 kukila muulo wabikalanga! Butookye, mu kisalwe tamubaadi kintu kya kudya su nkimune.”​—Paul a mu Zimbabwe.

“Tubaadi bashaale na mulume ande aye nkundungula’shi akyebe kwituleka. Naadi mwiyipushe’shi su bende nakitshi naminyi? Nashaala naminyi na bana?”​—Janet a mu États-Unis.

“Nsaa inapushiishe mukungulo wa mputu, nasuukile mu kufwama, mputu ya rokete ibatanyikile musango umune. Mbidi ibaadi ayinsuusu munda mwa nsaa ibungi.”​—Alona a mu Israel.

Twi mu mafuku a twinyongoshi, a “bipungo bibukopo.” (2 Timotee 3:1) Bantu bebungi mbakalakashwe na myanda ya kukutwa kwa makuta, kutshibika kwa bifuko, ngoshi, bipupa bya mikumbo, lufu mpa nka na myanda ya masaku. Kukatusha byabya, muntu mukumbeene kwiyipusha shi: ‘Bintu bibabanga kuntuuka pa mbidi mbilombeene kwikala mukumbo wibukopo su?’ ‘Myanda ayikeekala naminyi pa nsenga apakakulu beekulu bande?’

Twinyongoshi tooso t’atwikalaa twibubi nya. Muntu ooso apushaa katshima-munda pa bamutompo bwa mudimo sunga pa bamwipusha mwanda kampanda. Kwikala na moo nkulombeene kwitukwasha bwa kusuuka masaku. Anka, twinyongoshi tukilekile ntumkumbeene kwitutwadila maladi. Ingi rapore ituukye binobino ayileesha shi bantu bakile pa 68000 mbalombeene kufwa bukidi pa mwanda wa twinyongoshi twa myanda. Nyi bwakinyi Yesu bayipwishe’shi: “Nnaanyi n’eshimba dyaaye kwiyilu, mulombeene kufiimisha mafuku a muwa waye?” Eyendo, ta kwi muntu su ngumune. Nyi bwakinyi Yesu etudimusha shi: “Tanwikalanga na katshima-munda.” (Mateo 6:25, 27) Byabya twi balombeene koobesha byanka naminyi?

Abitungu kwikala na binangu bibuwa, kunyingisha lukumiino mwi Efile Mukulu, na kutamisha lukulupilo bwa mafuku aakafiki. Sunga tatwi na mwanda wibukopo binobino, twi balombeene kufumankana nao mu mafuku e kumpala. Byabya, tubandeyi kutala kutumikila kwa ino myanda byakudi kukwashe Paul, Janet, na Alona bwa kukambila twinyongoshi.