Bakuuku ba p’eshimba abesambaa nsaa yabemonena, ku telefone, kwifundjisheena mikanda, sunga kwitumisheena mesage nsaa yooso yabadi na mushindo. Kwikala pepi n’Efile Mukulu namu, akutekye shi twikale atwisamba naye misusa ibungi. Kadi, mmushindo kinyi watudi bakumbene kwibikita?

Twi bakumbene kwisamba na Yehowa mu nteko. Anka, kwela nteko kwi Efile Mukulu nkwilekene na kwisamba na kuuku oobe. Abitungu tushinguule shi nsaa yatutekye, tukwete kwakula na Mupangi, e kunundu kwa bintu byooso. Ngi bwakinyi abitungu tumulungule na kanemo na kutshina. Bwashi Efile Mukulu ateemeshe nteko yetu, abitungu kulombasha myanda kampanda. Tubande kutala ino isatu.

Wa kumpala, abitungu kwela nteko yeetu nkapenda kwi Yehowa Efile Mukulu​—kushii kwi Yesu, kwi “bansantu,” sunga kumpala kwa kifwanyi. (Efilu 20:4, 5) Bible akula kalolo shi: “Nguba ooso, mu nteko, na mu kwiyaya na mu ntumbu, uukishayi Efile Mukulu nkalo yeenu.(Beena-Fidipe 4:6) Wa kabidi, abitungu kwela nteko mwishina dya Mwan’Efile Mukulu, Yesu Kidishitu. Yesu aye nabeene bambile shi: “Muntu su ngumune taakwenda kwi Yaaya, kushii kukiila kwandji.” (Yowano 14:6) Wa kasatu, nteko yeetu abitungu ipusheene na kikyebe ky’eshimba dy’Efile Mukulu. Bible amba shi: “Su twamuteka muyiile kukumiina kwaye, etutemesha.” *​—1 Yowano 5:4.

Bakuuku abakitaa shi au esamba au namu ateemesha mwin’aye kalolo

Binyibinyi, bukuuku pankatshi pa bantu babidi ta mbulombene kuyisha su muntu umune ndjo kwete kwitatshisha bwa kwisamba na mwin’aye. Nka bu bakuuku abakitshi shi au esamba au namu ateemesha mwin’aye kalolo, abitungu tutadiile Yehowa etulungule na kumuteemesha kalolo nsaa y’esamba. Ouuku mushindo ukwete Efile Mukulu kwisamba neetu su?

Lelo uno, Yehowa kwete “kwisamba” neetu kukidila ku Eyi dyaye, Bible. (2 Timotee 3:16, 17) Bwakinyi atwamba byabya? Bu kileshesho: Banda kunangushena shi abakupa mukanda aufiki kwi kuuku oobe a p’eshimba. Obe baapu kwiwubadika, we mulombene kulungula bangi bantu na muloo ooso shi “kukw’ande ndjo bandungula byabya!” Aku namu, ta mmukulungule byanka kukanwa nya, kadi ekalanga mukufundjile mu mukanda. Mu mushindo umune, p’obadika Bible, olekyela shi Yehowa esambe noobe. Ndjo bwakinyi, Gina atwikeele batemune mu mwisambo wa mbangilo, amba shi: “Namono shi su nakimbi bwashi Efile Mukulu ekale kukw’ande, abitungu ngikale nataluula ‘mukanda’ waye waadi mutumine bantu​—Bible.” Akupu alombasha shi, “Kubadika Bible efuku dyooso nkunkwashe bwa kwifubwila peepi n’Efile Mukulu.” Okumiina namu bwashi Yehowa esambe noobe kwifuku n’efuku nsaa y’obadika Eyi dyaye, Bible? Su bokitshi byabya, okyebe kwikala pepi menemene n’Efile Mukulu.

^ par. 5 Bwa kuuka ingi myanda pabitale mushindo wa kwifubwila pepi n’Efile Mukulu mu luteko, tala shapitre 17 a mu mukanda wa A nkinyi akilongyesha namu Bible? wabadi batushe kwi Batemwe ba Yehowa.