Yesu baadi binyibinyi musangushe bantu su?

Yesu asangusha Laazare, amwitamina pasha pa mashama

Bible akula patoka shi Yesu baadi musangushe bafwe. Ino myanda ta myeele nya; ngikitshikye mu ma mbalo na nsaa ayiukibwa kalolo. Bu kileshesho, kubaadi mufumbi wa mpeshi mu kipwa kya 31 K.Y.K., nsaa ibaadi kibumbu kikata kya bantu akilondo Yesu kukatukila ku Kapernaume akyende ku Naine. Pabaabafikile, abafumankeene na kingi kibumbu. Bible, Eyi dy’Efile Mukulu, adilesha shi Yesu baadi musangushe muntu ku lufu mu yawa nguba, na we mulombene kukumiina byabya mwanda bibaadi bikitshikye ku meso kwa bantu bebungi.​—Badika Luuka 7:11-15.

Yesu baadi musangushe dingi kuuku’aye Lazaare baadi mufwe mafuku ananka apwe kukila. We mulombene kukumiina kino kipaso mwanda bantu bebungi namu abaadi bekimone.​—Badika Yowano 11:39-45.

Bwakinyi Yesu baadi musangushe bantu?

Yesu baadi musangushe bantu mwanda baadi mwibapushishe lusa. Baadi dingi mukite byabya mwanda Nshaye, Mupangi a muwa, ndjo bamupeele bukome bwa kutshokola lufu.​—Badika Yowano 5:21, 28, 29.

Kuno kusanguka kwa bantu akwitushinkamisha pabitale milayilo ya Yesu bwa mafuku aafiki. Akyebe kusangusha bantu bakile bungi, mpa na bantu bashi balulame bashibaadi abawuku Efile Mukulu a binyibinyi. Bano bantu abakapebwa mushindo wa kuuka na kufula Yehowa Efile Mukulu.​—Badika Bikitshino 24:15.