Enda bwa kuleshe myanda i mwanka

Enda bwa kuleshe kashibo ka myanda i mwanka

Bwakinyi abitungu twikale beselele

Bwakinyi abitungu twikale beselele

“Nwi na kya kwikala beselele.”​—LV. 11:45.

1. Mushindo kinyi ulombene kwitukwasha mukanda wa Beena-Levi?

MUKANDA wa Beena-Levi awisambila bwiselele misango ibungi kukila ingi mikanda yooso ya mu Bible. Bu byabitungu shi bafubi booso ba Yehowa bekale na dino eyikashi, kuteemesha na kutumikila myanda i mu mukanda wa Beena-Levi akukyebe kwitukwasha bwa kwikala beselele.

2. Myanda kinyi yatupete mu mukanda wa Beena-Levi?

2 Mukanda wa Beena-Levi ubaabadi bafunde kwi mutemuki Moyiise nyi nkipindji kya ku “Bifundwe byooso” abikwasha mu bulambukishi. (2 Tim. 3:16) Eshina dya Yehowa di misango pepi n’ekumi mu shapitre ooso a uno mukanda. Kwikala na mpushisho ebuwa a mukanda wa Beena-Levi akukyebe kwitutakula bwa kusuka kukita kintu kyooso kilombene kusabulusha eshina dy’Efile Mukulu. (Lv. 22:32) Bishima byabadi bakule mwanka misango ibungi shi “Nnaami Yehowa” abitutenkyesha bwa kukookyela Efile Mukulu. Mu uno mwisambo na mu ungi aulondo, atukyebe kutaluula ingi myanda ibuwa yatupete mu mukanda wa Beena-Levi, wikale kyabuntu ky’Efile Mukulu kyadi mwitupe bwa kwitukwasha bwashi twikale beselele mu lulangwilo lwaye.

 BWISELELE BUBAADI BUTEKIBWE

3, 4. Kutooshibwa kwa Aarone na bana baaye akulesha kinyi? (Tala kifwatulo ki kumbangilo kwa mwisambo.)

3 Badika Beena-Levi 8:5, 6. Yehowa baadi musangule Aarone bwa kwikala tshiite-mwakwidi mukata mu Isalele, na bana baye abaadi abafubu dingi bu ba tshiite-mwakwidi ba mwilo. Aarone baadi bu Yesu Kidishitu, bana baaye abaadi bu balongi ba Yesu bashingwe mwimu. Kadi kutumpibwa kwa Aarone akulesha kutooshibwa kwa Yesu? Nya, mwanda Yesu tabaadi na milwisho na baadi ‘kushi katoba,’ byabya tabaadi na lukalo lwa kutooshibwa nya. (Eb. 7:26; 9:14) Anka, kunyima kwa Aarone kutumpibwa, baadi muleshe mpala ya Yesu aye baadi shi katoba na mululame. A kutumpibwa kwa bana ba Aarone namu akulesha kinyi?

4 Kutumpibwa kwa bana ba Aarone kubaadi akulesha kutooshibwa kwa bano babadi basangule bwa kwikala ba tshiite-mwakwidi mwiyilu. Kubatshishibwa kwa bashingwe mwimu nkwipushene na kuno kutooshibwa kwa bana ba Aarone su? Nya, kubatshibwa takukatusha milwisho nya; kadi akulesha mu kinfwanyi shi muntu belambula kwi Yehowa Efile Mukulu n’eshimba dimune. Kutooshibwa kwa bashingwe mwimu akukithika “kw’eyi,” na byabya abibatekye bwashi batumikile malongyesha a Kidishitu mu nshalelo aabo n’eshimba dyabo dyooso. (Ef. 5:25-27) Paapa abekala beselele na batooshibwe. Kadi twi kwamba kinyi pabitale “ingi mikooko”?​—Yowano 10:16.

5. Bwakinyi twi balombene kwamba shi ingi mikooko ikwete kutooshibwa ku bukwashi bw’Eyi dy’Efile Mukulu?

5 Bana ba Aarone tababaadi abalesha ingi mikoko ya Yesu sunga beena “kibumbu kikata” nya. (Bif. 7:9) Byabya twi kwamba shi bano bantu babatshishibwe namu mbafikye beselele na mbatooshibwe ku bukwashi bw’Eyi dy’Efile Mukulu su? Oolo! Nsaa i bano bantu be na lukulupilo lwa kwikala na muwa pa nsenga ababadika akyamba Bible pabitale muulo winao mulambu wa Yesu, bakwete kukumiina aa mayi na “abamulangwila kanya na bufuku.” (Bif. 7:13-15) Bu byabidi shi bashingwe mwimu na ingi mikooko bakwete kutungunuka na kutooshibwa, mbalame “nshalelo mulongame.” (1 Mp. 2:12) Yehowa e na muloo wi kashaa pakwete kumona kutooshibwa na buumune bwa bashingwe mwimu na ingi mikooko, bakwete kuteemesha na kulonda na bulamate booso, mulami aabo Yesu!

6. Bwakinyi abitungu twikale atwitaluula misusa yooso?

6 Mwiya wa mu Isaleele ubaadi autekye ba tshiite-mwakwidi bwashi bekale batooshibwe ku mbidi, ukwete kumweneka kwi mwilo wa Yehowa lelo uno. Bano batukwete kulonga nabo Bible bakwete kumona kutooshibwa kwi mu mbalo yetu ya kulangwila na dingi bakwete kumona kutooshibwa kwi mu mfwadilo eetu ebuwa. Byabya, kutooshibwa kwa ba tshite-mwakwidi akwitukwasha bwa kumona shi abitungu muntu eese akamina ku mwengye wa Yehowa bwa kumulangwila ekale “n’eshimba ditookye.” (Badika Misambo 24:3, 4; Yesh. 2:2, 3.) Abitungu tufubile Yehowa na binangu, n’eshimba mpaa na mbidi itookye. Bino abitutekye bwatudya kwitaluula atwe banabene, kunyima kwa kuno kwitalula bangi mbalombene kumona myanda ayitungu kushintuula bwabadya kwikala beselele. (2 Kod. 13:5) Bu kileshesho, muntu mubatshishibwe e na kyubishi kya kubandjila pornografi abitungu eyipushe shi, ‘nkwete kulesha shi ne eselele su?’ Byabya e na kya kuteka bukwashi bwa kuleka kyakya kyubishi ki bubi.​—Ja. 5:14.

LESHA BWISELELE P’OOBE KUKOOKYELA

7. Mu kwipushena na Beena-Levi 8:22-24, Yesu mmulekye kileshesho kinyi?

7 Pababaadi batuule ba tshite-mwakwidi mu Isaleele, abaadi bashingye tshiite-mwakwidi mukata Aarone na bana baye mase a mukooko kw’itwi dilume, pa kyala, na p’ena dikata. (Badika Beena-Levi 8:22-24.) Kwakwa kushinga kwa mase kubaadi akulesha shi abitungu ba tshiite-mwakwidi bakite mwabo mooso bwa  kulombasha mashito aabo na kukokyela kooso. Mu mushindo umune, Yesu Tshiite-Mwakwidi mukata mmulekyele bashingwe mwimu na ingi mikooko kileshesho kibuwa. Baadi alondo bukunkushi bw’Efile Mukulu. Baadi akitshi akikyebe eshimba dya Yehowa, na kutambukila mwishinda diselele.​—Yowano 4:31-34.

8. Balangwidi booso ba Yehowa abitungu bakite kinyi?

8 Beena Kidishitu bashingwe mwimu na ingi mikooko ya Yesu be na kya kulonda bululame bwa Tshite-Mwakwidi aabo mukata. Balangwidi booso ba Yehowa abitungu balonde malongo aatukila mu Eyi dy’Efile Mukulu na kupela kwinyongosha kikudi kyaye. (Ef. 4:30) Be na kyabadya ‘kutobola tushinda tolokye twabadya kutambukila.’​—Eb. 12:13.

9. Myanda kinyi ibaadi bangi bakwetu basatu abaadi bafube pamune na beena Kasaka ka Bakunkushi Bakulu baleshe, na mushindo kinyi ulombene myanda yabadi bakule nkukwasha bodya kutungunuka na kwikala eselele?

9 Tubande kutaluula myanda ibaadi yakule bakwetu basatu be na lukulupilo lwa kwikala na muwa pa nsenga na abaadi bafube munda mwa bipwa bibungi pamune na beena Kasaka ka Bakunkushi Bakulu. Umune bakwile shi: “Sunga byekala shi bibaadi kinemo kikata kya kufuba na bashingwe mwimu pamune, kwikala nabo nsaa yooso kubaadi kundeshe shi n’abo namu mbantu bakutwe kupwidika. Kadi, kitshibilo ki naadi nakyo kibaadi kya kukookyela baaba bakwete kukunkusha. Mukwetu a kabidi bambile shi: “Mukanda wa 2 Beena-Kodinto 10:5 awakula pabitale ‘kukookyela Kidishitu’ ngunkwashe bwa kukookyela na kufuba mu kwipushena na baaba bakwete kukunkusha. Kuno kukookyela kubaadi akufiki kwishimba.” Mukwetu a kasatu akula shi: “Kufula byabya bifule Yehowa na kushikwa byabya byadi mushikwe, kutungunuka na kukimba bukunkushi bwaye na kukita byabya abimusangasha, abilesha kukookyeka ndumbulwilo aaye na baaba bakwete kwitatshisha bwashi mpàngo yaaye pabitale nsenga yende kumpala.” Uno mukwetu baadi mulongye shi Nathan Knorr, uno baadi umune a mu beena Kasaka ka Bakunkushi Bakulu, baadi mukumiine mususa umune myanda ibabaadi bakwile mu mwisambo wa Kitenta kya Mulami kya mu 1925 (mu Anglais) ubaadi na mutwe wa mwanda awamba shi “Kutandikwa kwa mwilo,” sunga mbibaadi bangi bantu abewupele. Kwakwa kukokyela kubaadi kukanyishe mukwetu ngofu. Kunangushena pa mayi a bano bakwetu basatu nkulombene nkukwasha bwa kwikala eselele na kukokyela Efile Mukulu.

KWIKALA BESELELE PA KUKOOKYELA MWIYA W’EFILE MUKULU PABITALE MASE

10. Kukokyela mwiya w’Efile Mukulu pabitale mase kwi na muulo kinyi?

10 Badika beena-Levi 17:10. Yehowa baadi mwelele beena Isaleele mwiya wa kupela ‘kudya mase.’ Kupela kudya mase​—a nyema sunga a muntu—​nyi mmwiya utale beena Kidishitu namu. (Bik. 15:28, 29) Tubande kunangushena mushindo wabidi bilombene kwikala bubi su twakita kintu kikumbene kutuma Yehowa mu kwitusumbushena na kwitukaasha mu kakongye kaye. Twibamufule na atukumiina kumukokyela. Sunga twafumankana na mwanda awitukalakasha ngofu, twibaate kitshibilo kya kumukokyela sunga betukitshisha kwi bantu bashy’abauku Yehowa na bashy’abamukokyela. Oolo, atukumiina shi betumone bu bantu ba bisumanga mwanda tukwete kupela kudya mase, kadi atusangula bwa kukokyela Efile Mukulu. (Yuude 17, 18) Nkinyi akikyebe kwitukwasha bwa kwata kitshibilo kya kupela kudya mase sunga kwitwela anka?​—Miy. 12:23.

11. Bwakinyi atwamba shi Efuku dya kulekyelwa milwisho tadibaadi bu bipikwa bya bisumanga?

11 Mudimo ubaadi aukitshi tshite-mwakwidi mukata mu Isalele a kala na mase a nyema, mwifuku dya kulekyelwa milwisho ku kipwa kyooso awitukwasha bwa kupusha mweneno a Efile Mukulu pabitale mase. Mase abaadi aakitshi mufubo wi pa bwao. Babaadi abafubu nao bwa  kulekyelwa kwa milwisho ya baaba babaadi abakimbi bwashi Yehowa alekyele milwisho yaabo. Mase a ngombe na mbushi abaadi abeamyamina ku lupese na kunundu kwa mputo a mushete wa kilombeno. (Lv. 16:14, 15, 19) Bino bibaadi abipa Yehowa mushindo wa kulekyela beena Isalele milwisho yaabo. Kukatusha byabya, Yehowa baadi mwele mwiya wa shi su muntu ayipaa nyema bwa kudya, baadi na kya kupongoola mase mu nsenga na kwiapuuta lufuufi, “mwanda muwa wa kipangibwe kyooso wi mu mase.” (Lv. 17:11-14) Bino byooso bibaadi bu bipikwa bya bisumanga su? Nya. Kufuba na mase mwifuku dya kulekyelwa milwisho, anka bu mwiya wa kupongoola mase mu nsenga, mbipushene na mwiya ubaadi Yehowa mwelele Nowa na bana baaye kala. (Kib. 9:3-6) Yehowa mmwele mwiya wa kupela kudya mase bwa kulama muwa. Bino abilesha kinyi kwi beena Kidishitu?

12. Mushindo kinyi wi mukanda wa Mpoolo kwi beena Ebreeyi awulesha kwipushena kwa mase na kulekyelwa milwisho?

12 Pabaadi Mpoolo mutumibwa mufundjile beena Kidishitu beena Ebreeyi pabitale bukome bwa kutoosha bwinabo mase, baadi mupatuule shi: “Muyiile mwiya, mase nyi abasompoolaa nao bintu bu byooso, dingi kushi kusukumuna kwa mase takwi kulekyelwa kwa milwisho.” (Eb. 9:22) Mpoolo baadi dingi muleshe shi milambu ya nyama, ibaadi bwa kapindji kapeela, penda bwa kutentekyesha beena Isaleele shi mbasha milwisho na be na lukalo lwa mulambu ukata bwa kushimisha milwisho yabo bwa looso. Oolo, Miiya “ta nkileshesho kilombanyinyiine kya bintu mu’byo biinabeene nya; wi bu mwesheshe wa bibuwa abikafiki.” (Eb. 10:1-4) Mushindo kinyi aukyebe kulombana kulekyelwa kwa milwisho?

13. Mushindo kinyi opusha mwishimba pabitale mwanda wa shi Yesu mmulubwile Yehowa muulo wa mase aaye?

13 Badika Beena-Efeeze 1:7. Lufu lwa mulambu lwa Yesu Kidishitu, aye baadi ‘mwipane bwa mwanda wetu,’ lwi na muulo ukata kwi muntu ooso mumufule na mufule Nshaye. (Gal. 2:20) Kadi, bibaadi Yesu mukite kunyima kwa lufu na lusangukilo lwaye nyi bitwikashe bulungantu, bwa kulekyelwa milwisho yetu. Yesu baadi  mulombashe mu kinfwanyi byabya bibaadi mu Miiya ya Moyiise mwifuku dya kulekyelwa kwa milwisho. Mu dyadya efuku, tshiite-mwakwidi mukata baadi aata ndambo ya mase a mulambu wa nyema bwa kwenda nao mu mbalo ikile kishila ya tabernakele, na kunyima mu ntempelo a Salomone, na kwialambula kumpala kw’Efile Mukulu bu’ye e paapa. (Lv. 16:11-15) Mu mushindo umune, Yesu batwelele’ye nabene mwiyilu na muulo wa mase aaye bwa kwiulubwila Yehowa. (Eb. 9:6, 7, 11-14, 24-28) Twi na lutumbu lukata mwanda shi twibapete kulekyelwa kwa milwisho yeetu na kwikala na koondo keshimba katooshibwe mwanda twibakumiine mu mase a Yesu!

14, 15. Bwakinyi kuteemesha na kukokyela mwiya wa Yehowa pabitale mase kwi na muulo?

14 Binobino abimweka shi bopusha kalolo bwakinyi Yehowa kwete kwituteka bwa kupela “kudya mase”? (Lv. 17:10) Bopusha bwakinyi Yehowa kwete kwata mase bu kintu kiselele? Kwete kwata mase bu muwa. (Kib. 9:4) Okumiina kulonda mweneno a Yehowa pabitale mase na kulonda mwiya waye wa kupela kwiadya su? Mushindo wibuwa watudi balombene kwikala mu butaale n’Efile Mukulu nyi nkukumiina mu mulambu wa Yesu na kupusha shi mase e na muulo ukata kwi Mupangi eetu.​—Kol. 1:19, 20.

15 Mwanda utale mase ngulombene kupulumukila ooso a kwatudi. Mukwetu a mu kifuko sunga kuuku mmukumbene kupeta mwanda aumutekye bwa kukumiina sunga kupela kumwela mase. Kumpala kwa mwanda wi byabya, muntu mmulombene kwata kitshibilo kya kukumiina sunga kupela tuntu tupeela twa mu mase na ingi mishindo ya kwibukisha. Byabya, bibuwa kukimbuula na kwilumbuula kumpala kwashi mwanda wa kimpulunkamba ufikye. Na bukwashi bwa nteko, kukita byaya akukyebe kwitukwasha bwa kupela kubofula na kwipaa mwiya utale mase. Eyendo, tatukumiina kwinyongosha Yehowa pa kukumiina kukita myanda yaadi mupele! Lelo uno ba munganga bebungi, na bangi bantu abaleshaa buwa bwa kufuba na mase, bakwete kwitulungula bwashi tutuushe mase eetu bwa kupasha myuwa ya bantu. Kadi, bu byatudi mwilo wiselele wa Yehowa atuuku shi Mupangi eetu e na matalwa a kwitulesha mushindo watudi balombene kwata mase. Kwadi, “mase” ooso e selele. Abitungu twikale na kitshibilo kya kukokyela mwiya waye pabitale mase. Na patulama mwikelo wetu wiselele, atulesha shi atusangeela ngofu bukome bwa kupasha bwinabo mase a Yesu​—mase eselele aakwasha bwa kulekyeela milwisho na kupa bantu muwa wa looso.​—Yo. 3:16.

We mwate kitshibilo kya kukokyela mwiya wa Yehowa utale mase su? (Tala paragrafe 14, 15)

BWAKINYI YEHOWA AKYEBE SHI TWIKALE BESELELE?

16. Bwakinyi abitungu shi mwilo wa Yehowa wikale wiselele?

16 Pabaadi Yehowa mupososhe beena Isaleele ku bupika mu Ejiipitu, baadi mwibalungule shi: “Nnami Yehowa, mwinutuushishe mwiumbo dyaa Ejiipitu, bwa’shi ngikale Efile Mukulu eenu; byabya nwikale beeselele, mwanda nee Eeselele.” (Lv. 11:45) Yehowa baadi atekye beena Isaleele bwashi bekale beselele mwanda aye Eeselele. Bu byatudi Batemwe ba Yehowa, abitungu twikale namu beselele. Mukanda wa Beena-Levi awibilesha patooka.

17. Mushindo kinyi watupusha kwishimba pabitale mukanda wa Beena-Levi?

17 Kushi mpaka, kutaluula kwa bingi bipindji bya mukanda wa Beena-Levi kubetukwasha ngofu. Eyendo, bosangeela ngofu kulonga kwa uno mukanda wa mu Bible ufundibwe ku bukome bwa kikudi kiselele. Oolo, kunangushena pa myanda i na muulo ibatupete mu mukanda wa Beena-Levi kubatamisha mpushisho oobe pabitale bwakinyi abitungu twikale beselele. Kadi, myanda kinyi ya muulo yatukyebe kulonga mu uno mukanda wa Mwiyi dy’Efile Mukulu? Nkinyi dingi kyatudi balombene kulonga mu uno mukanda pabitale kufubilaYehowa mufubo wiselele? Atukyebe kutaluula ino myanda mu mwisambo aulondo.