Midiyo ya bantu be mu nsenga ishima mbatuule lukulupilo lwabo mu Bufumu bw’Efile Mukulu. Bakwete kulonda kileshesho kya Yesu, baadi mulambukishe balongi baaye bwa kuteka shi: “Bufumu boobe bufikye, kyookyebe kikitshikye pa nsenga.”​—Mateo 6:10.

Bilekene na bantu bebungi bakwete kwitatshisha ngofu bwa Bufumu bw’Efile Mukulu, bipwilo bibungi tabikwete kwitatshisha menemene bwa uno mwanda nya. Byabya, ungi muntu ataluula myanda ya kala abetamina bu H. G. Wells baadi musangane shi Yesu baadi aata “mudimo wa kulambukisha kyakya kibaadi ayitanyina bu Bufumu bwa Mwiyilu na . . . kinemo kikata” aku namu dino dilongyesha di na “muulo upeela mu . . . bulambukishi bwa bipwilo bibungi bya bwina Kidishitu.”

Mu kwilekena na byabya bipwilo, Batemwe ba Yehowa bakwete kwakwila ngofu pabitale Bufumu bw’Efile Mukulu. Bu kileshesho: Uno jurnale eetu mukata okwete kubadika, bakwete kumwaluula mu ndimi 220. Bakwete kutuusha midiyo 46 ku nimero ooso, na kwiyabila bantu mu nsenga ishima. Mmwanda kinyi ukata ukwete kwakwiila uno jurnale? Banda kutala bi mutwe waye wa mwanda: Kitenta kya Mulami Akilungula Bufumu bwa Yehowa.  *

Bwakinyi Batemwe ba Yehowa bakwete kukita mwabo mooso bwa kwakula na kulungula mwanda wa Bufumu bw’Efile Mukulu? Mwanda atwiuuku shi Bufumu bw’Efile Mukulu nyi mmutwe wa mwanda ukata wa mukanda wi na muulo ngofu pa nsenga ishima​—Bible. Na dingi, twibashinkamishe shi Bufumu bw’Efile Mukulu nyi ndukulupilo penda lumune bwa nkalakasho ikwete kufumakana nayo bantu lelo uno.

Bu byabakwete kwitatshisha bwa Bufumu bw’Efile Mukulu, Batemwe ba Yehowa mbaate kitshibilo kya kulonda kileshesho kya Yesu. Pabaadi pa nsenga, baadi mwikashe Bufumu bw’Efile Mukulu bu mwanda wi na muulo ukata mu muwa na mu mudimo waye. (Luuka 4:43) Bwakinyi Yesu baadi aata Bufumu bw’Efile Mukulu na muulo ukata? Na nkinyi kyabudi bulombene nkukitshina? Atukutekye bwa kutaluula myaluulo ayituusha Bible, bu byabadi baleshe mu miisambo ayilondo.

^ par. 5 Yehowa nyi eshina dy’Efile Mukulu bu byabadi bedileshe mu Bible.