Enda bwa kuleshe myanda i mwanka

Enda bwa kuleshe kashibo ka myanda i mwanka

 MIISAMBO YA BANGILO | BUFUMU BW’EFILE MUKULU​—MBULOMBENE NKUKITSHINA KINYI?

Bufumu bw’Efile Mukulu​—Nkinyi kyabukyebe nkukitshina?

Bufumu bw’Efile Mukulu​—Nkinyi kyabukyebe nkukitshina?

Kushi mpaka, ku bukwashi bwa ino miisambo ibatukatuka mu kumona, bomono shi Bufumu bw’Efile Mukulu bwi na muloo ukata kwi Batemwe ba Yehowa. Pangi, ingi myabi ayikafwisha Bufumu bw’Efile Mukulu ibatwisambila mu uno mwisambo ibakusankisha. Kadi, we mulombene kwiyipusha su yaya milayilo ayikalombana binyibinyi.

Bibuwa wekale na budimu bwa kupela kukumiina mwanda ooso okwete kupusha. (Myeele 14:15) Na dingi, budimu boobe mbulombene kwifwanena na bwa beena Beree ba kala. * Pababebalwingwile mukandu wibuwa bwa musango wa kumpala, Beena Beree abaadi bakumiine myanda ibabapushishe, anka kushi pa mwanda wa shi abaadi abakumiina kwiyipusha. Kadi, na budimu booso abaadi abataluula Bifundwe “bwa kumona su bibaadi byabya eyendo.” (Bikitshino 17:11) Mu angi mayi, Beena Beree abapwandikishanga mukandu wibuwa ubaabadi bapushe na bibaadi abyamba Bifundwe. Ndjo, abo nkushinkamisha shi mukandu wibuwa ubaadi autuukila mw’Eyi dy’Efile Mukulu binyibinyi.

Na muloo ooso, Batemwe ba Yehowa abakutekye bwashi okite bibaabadi bakite. Ku bukwashi bwa programe a kulongyesha bantu Bible ku mashibo aabo, tubakupa mushindo wa kupwandjikisha myanda ikumiine Batemwe ba Yehowa pabitale Bufumu bw’Efile Mukulu na kikwete kulongyesha Bible.

Kukatusha kulonga myanda itale Bufumu bw’Efile Mukulu, kulonga koobe kwa Bible nkulombene nkukwasha bwa kupeta myaluulo ku ingi nkonko ikata ya mu nshalelo.

Kukatusha byabya, kulonga kwa Bible akukukwasha bwa “kwifubwila kwi Efile Mukulu.” (Jaake 4:8) Akupu, bu byokwete kwifubwila peepi n’Efile Mukulu, okamono shi Bufumu bw’Efile Mukulu mbulombene nkukitshina myanda ibuwa bukile​—kushi penda bwa binobino kadi bwa looso. Yesu baadi mwakule mu luteko kwi Nshaye shi: “Muwa wa looso nguno, bakuwukye obe Efile Mukulu umune a eyendo, na yawa abotumine, Yesu Kidishitu.”​—Yowano 17:3Kilombeeno kipya 2009.

 

^ par. 4 Beree baadi musoko wa mu Masedoine a kala.