“EFILE MUKULU nyi nkikudi,” kishy’akimwenekaa kwi bantu. (Yowano 4:24) Anka Bible alesha shi, mu mushindo kampanda bangi bantu abaadi bamone Efile Mukulu. (Beena-Ebreeyi 11:27) Mushindo kinyi wabidi bilombene kukitshika? We mulombene binyibinyi kumona “Efile Mukulu shamwekaa” su?​—Beena-Kolose 1:15.

Banda kupwandikisha nshalelo eetu na bi muntu mpofu. Kwikala bu mpofu byaakumukutshishwa kupusha myanda i mu nsenga? Ta mbyobyo nya. Muntu mpofu apushaa myanda mu mishindo ilekenelekene ayimukwasha bwa kushinguula bantu, bintu, na myanda imwifunyishe. Ungi mpofu bakwile shi: “kumona takwi penda ku meso, kwi mu kinangu.”

Mu mushindo umune, sunga byekala shi twe mulombeene kumona Efile Mukulu na meso a bu muntu, we mulombeene kufuba na ‘meso a mwishimba dy’oobe’ bwa kumumona. (Beena-Efeeze 1:18) Tala mishindo isatu yoodya kukita byabya.

‘AMWEKA PATOOKA MU BIPANGWA’

Muntu mpofu atweshaa myanda mmatwi bukidibukidi na mukumbene kushinguula kintu kibakumu ku minwe kadi kyashi mumone. Mu mushindo umune, we mulombene kufuba na meso oobe a ku mbidi bwa kutaluula bintu bikwifunyishe mu nsenga na kupusha Efile Mukulu shamwekaa baadi mwibipangye. Bible ambashi: “Mwikeelo wê ushyawumweka na meso, kwamba shi bukome bwê bwa ikalaika na bw’Efile bwê mbipwe kumweka patôka mu byabya bibapangile.”​—Beena-Looma 1:20EEM.

Bu kileshesho, banda kutala mbalo yatudi bashaale. Nsenga ta mbeyipangye na mpàngo yashi bantu bemushale mu makyenga nya. Kadi mu nshalelo a muloo. Nsaa yatupusha kapapi kebuwa, yatusangeela kanya akasangulusha, yatutompo kudya kikuba kii nsaasa, sunga kupusha toonyi atuyimbi misambo, atupushaa muloo wibungi. Tomono shi bino mbyabuntu abilesha kalolo, kifulo, na eshimba dya kupaana dy’Efile Mukulu?

Nkinyi kyoodi mulombene kulonga pabitale Efile Mukulu ku bukwashi bwa nsenga na mayilu na byooso bi mwanka? Eyendo, mayilu aalesha bukome bw’Efile Mukulu. Bishinkamiisho bya siyanse bya mafuku ashaale abileesha shi bisaka bya nyenyene byabetamina bu galaksi na ma planete bikwete kwifunya mu lubilo lwibukopo! Nsaa yotala eyilu bufuku, eyipushe shi: Nanyi mwikale nsulo ya buno bukome bukwete kwifunyisha ma galaksi na ma planete mu luno lubilo lwibukopo? Bible kwete kwitulungula shi kwi Mupangi e na “makome akata bibi.” (Yeeshaya 40:26) Bipangwa by’Efile Mukulu abitulesha shi aye “nsha bukome boso”​—e na “bukome bukile bukata.”​—Yobo 37:23, EEM.

“YAWA MWITUSOKWELE EFILE MUKULU”

Ungi nyina bana sha bana babidi bashy’abamonaa kalolo amba shi: “Kwisamba nabo nyi ngumune wa ku mishindo ibuwa ya kwibalongyesha. Ebalungule kyooso kyomono na kyopusha, [na] ekala mwilumbuule bwa kwibapatulwila. Obe ndjo meso aabo.” Bi mumune, “takwi muntu su ngumune tabamwene Efile Mukulu,” Yesu Mwana a Efile Mukulu, ‘e ku lupese lwa Yaaya, ngi mwitusokwele’ye.’ (Yowano 1:18) Bu byadi kipangwa kya kumpala ky’Efile Mukulu na Mwan’eleka, Yesu bafikile bu “meso” etu bwa kutala mwiyilu. Aye ndjo mwitulungule kalolo pabitale Efile Mukulu.

Banda kutala myanda ipeela ya ku myanda yabadi betupatulwile pabitale Efile Mukulu kwi Yesu, aye baadi ku lupese lwa Nshaye munda mwa bipwa binunu na binunu:

  • Efile Mukulu kwete kutungunuka na kufuba. “Nshami, mpa na binobino e ku mufubo.”​—Yowano 5:17.

  •  Efile Mukulu awuku nkalo yetu. “Nshenu awuku kyanudi nakyo lukalo.”​—Mateo 6:7.

  • Efile Mukulu kwete kwitukwasha na kalolo kooso. “Nshenu e mwiyilu . . . atundusha nguba aye kwi bebubi na bebuwa.”​—Mateo 5:45Kilombeeno kipya 2009.

  • Efile Mukulu kwete kupa ooso a kwatudi kinemo. “Tabapanaa bimusodya bibidi kwikuta dimune’nyi? Kutala! Sunga kimune kya kwabidi takiponaa pashi kushi Nshenu kuuka. Bwenu’nwe mpa na nyene yenu mbeyibadikye yooso. Ikalayi bashi na moo: Nwi na muulo ukile wa bimusodya byooso.”​—Mateo 10:29-31.

MUNTU BAADI MULESHE BI EFILE MUKULU SHY’AMWEKAA

Misango ibungi, bampofu abapushaa myanda mu mushindo wilekene na bantu abamono. Mpofu ta mulombeene kupusha mwesheshi bu mbalo i mufito nya, kadi e kwiupusha bu mbalo itaale yabadi bashikiile kwi nsembwe ya nguba. Anka bi mpofu shi mulombeene kumona mutaala sunga etaata, tatwi balombeene kuuka Yehowa atwe banamwinyi. Byabya, Yehowa mmutushe muntu mulombene kwitulesha kalolo ngikashi yaaye na bumuntu bwaye.

Yawa muntu nyi Yesu. (Beena-Fidipe 2:7) Yesu mwitulungule pabitale Nshaye na kwitulesha bi Efile Mukulu. Fidipe mulongi a Yesu bamwipwishe shi: “Mwanana, etuleshe Yaya.” Yesu bamwalulwile shi: “Mummone mmumone Yaya.” (Yowano 14:8, 9) Nkinyi kyoodi mulombeene “kumona” pabitale Yaya kukidila ku bikitshino bya Yesu?

Yesu baadi na kalolo, mwiyishe na muntu a bantu. (Mateo 11:28-30) Bumuntu bwaye bwibuwa bubaadi abukaka bantu kwadi. Yesu baadi akyengye na bantu na kusanka nabo. (Luuka 10:17, 21; Yowano 11:32-35) Nsaa yokwete kubadika sunga kupusha miisambo ya mu Bible pabitale Yesu, kimba bya kufubisha binangu na kupusha bu’be kwete kumona byabya byobadika. Su bonangwila pa mushindo ubaadi Yesu akitshina bantu myanda, okyebe kwikala na mushindo wa kumona kalolo bumuntu bw’Efile Mukulu abukemesha, na kwifubwila peepi naye.

KUSANGA TUPINDJI PAMUNE

Pabitale mushindo awiukaa mpofu myanda ikwete kukitshika mu nsenga, ungi mufundji bambile shi: “atambulaa myanda mu tupindji tupindji, mu mishindo ilekenelekene (kukuma, kununka, kupusha, na bingi), akupu asanga tuno tupindji twa myanda pamune.” Mu mushindo umune, pobandjila bintu bipangye Efile Mukulu, pobala myanda ayakula Yesu pabitale Nshaye, na kutaluula mushindo ubaadi Yesu muleshe ngikashi y’Efile Mukulu, okamono kinfwanyi kibuwa kya Yehowa. Akekala muntu a binyibinyi koodi.

Yobo, baadi na muwa kala, bamwene uno mwanda. Kumpala baadi mwakule “kushi kushinguula.” (Yobo 42:3) Kadi kunyima kwa kutaluula kalolo bipangwa by’Efile Mukulu abikemesha, Yobo bambile shi: “Napushanga nkumo yoobe kwi abesambanga, binobino nemwena ami nabene.”​—Yobo 42:5.

‘Su okimba Yehowa, omumono’

Bino mbilombene nkukitshikila namu. “Su omukimba [Yehowa], omumono.” (1 Myanda 28:9) Batemwe ba Yehowa be na muloo wa nkukwasha bwa kukimba na kupeta Efile Mukulu shy’amwekaa.