Enda bwa kuleshe myanda i mwanka

Enda bwa kuleshe kashibo ka myanda i mwanka

Okwete kutambuka pamune na ndumbulwilo a Yehowa su?

Okwete kutambuka pamune na ndumbulwilo a Yehowa su?

“Meso a Yehowa e pe balulame.”​—1 MP. 3:12.

1. Ndumbulwilo kinyi baadi mwate mbalo ya mwilo wa Isaleele ubaadi usumbule lukumiino bu mwilo bw’eshina dya Yehowa? (Tala kifwatulo ki ku mbangilo kwa mwisambo.)

YEHOWA nyi atudi balombeene kutumbisha bwa kutudibwa kwa kakongye ka beena Kidishitu ba kumpala na kwalushuula kwa lulangwilo lwa binyibinyi mu ano mafuku. Anka bu byabadi bebileshe mu mwisambo ushale, ndubulwilo musangishe balongi ba Kidishitu ba kumpala baadi mwate mbalo ya mwilo wa Isaleele ubaadi usumbule lukumiino bu mwilo bw’eshina dya Yehowa. Ndumbulwilo mupya, baadi mufudibwe na Yehowa ngofu na baadi mupande ku kabutu ka Yeelusaleme mu 70 K.Y.K. (Luk. 21:20, 21) Yaaya myanda ibaadi ikitshikye mu siekle a kumpala ibaadi ayilesha myanda ayikyebe kukitshikila bafubi ba Yehowa ba ano mafuku etu. Ndumbulwilo a myanda a Satana taadi pepi na kufika ku nfudiilo, kadi ndumbulwilo a Efile Mukulu akyebe kupanda. (2 Tim. 3:1) Bwakinyi twibalombeene kukulupila shi abikakidika nka byabya?

2. Nkinyi kibaadi Yesu mwakule pabitale “mpombo ikata,” na mushindo kinyi wayikyebe kubanga?

2 Pabitale kwikala kwaye kushy’akumweka na nfudiilo a uno ndumbulwilo a myanda, Yesu bambile shi: “Akwikala mpombo  ikata, byayishyekele dimo byatshile ku mbangilo a bya-pano nyaa na ku binobino; anka tayikekala dimo kwanka bwa looso.” (Mat. 24:3, 21) Ino mpombo ikile bukata, ayikyebe kubanga nsaa ayikyebe Yehowa kutakula bakata ba beena politike bwa kufwisha kabutu kwi “Babilone mukata,” nsangilo a bipwilo bya madimi. (Bif. 17:3-5, 16) Nkinyi akikyebe kukitshika kunyima kwa byabya?

MWANDA AUKAKITSHI SATANA AUKYEBE KUFWISHA ARMAGEDONE

3. Kunyima kwa kabutu ka bipwilo bya madimi, mushindo kinyi wabakatuuku mwilo wa Yehowa ngoshi kushi kobesha?

3 Kunyima kwa kabutu ka bipwilo bya madimi, Satana na bangi bantu baaye abakyebe kutuuka bafubi ba Yehowa ngoshi. Bu kileshesho pabitale “Goge, a kwiumbo dya Magoge” Bible baadi mutemukye shi: “Ofiki bu mpeshi a kipapi, wekala bu ekumbi dipute eumbo, obe, bisaka byobe byooso bya basalayi na miilo ibungi i nobe.” Bu bi Batemwe ba Yehowa tabe na bilwilo na mbantu ba butaale pa nsenga, abakyebe kumweka nka bu bantu balombeene kutshokolwa musango umune. Kadi kwibatuuka ngoshi nkwidimba ngofu!​—Ez. 38:1, 2, 9-12.

4, 5. Mushindo kinyi aukyebe kukita Efile Mukulu apakimbi Satana kubutula bafubi baaye?

4 Mushindo kinyi aukyebe kukita Efile Mukulu apakimbi Satana kubutula bafubi baaye? Yehowa akyebe kwibakalwila, akyebe kufuba na matalwa aye a bu Nfumu e kunundu kwa booso mwiyilu na pa nsenga. Yehowa amonaa shi kulwa na bafubi baye nyi nkulwa naye. (Badika Zakarii 2:8.) Byabya, Nshetu e mwiyilu akyebe kukita musango umune bwa kwitukalwila. Kuno kwibakuula akukyebe kubanga na kabutu ka ndumbulwilo a Satana ku Armagedone, “ngoshi y’efuku dikata dy’Efile Mukulu sha bukome booso.”​—Bif. 16:14, 16.

5 Pabitale Armagedone, butemuki bwa mu Bible abulesha shi: “‘Yehowa e na kilumbu na bisamba byooso, ayimusha bantu booso. Bapiile ebatadiisha ku mwele, ngi abyakula Nfumu. Mwanana sha bukombe booso abwela shi: Malwa aakwata miilo na miilo; kipapi kikata akibo dya kufudiile nsenga. Dyady’efuku, ku mikalo yooso ya nsenga, bano abekala Nfumu mwipee tabashikibwa nya; tabebasangula bwa kwibashika. Abekala bu bintu bya kufukisha nabyo nsenga.’” (Yel. 25:31-33) Armagedone akafwisha uno ndumbulwilo a myanda e bubi ku nfudiilo. Ndumbulwilo a Satana akyebe kubutudibwa, kadi kipindji kya ndumbulwilo a Yehowa ki pa nsenga akikashala.

KIKWETE KUTAMINA NDUMBULWILO A YEHOWA LELO UNO

6, 7. (a) Bano beena kibumbu kikata kikile abatukila kunyi? (b) Nkutama kinyi kumwekye mu bipwa bishaale?

6 Ndumbulwilo a Efile Mukulu e kwanka na kwete kutama pa nsenga mwanda bantu abemutwele mwibakumiine. Bible etushinkamiisha shi: “Meso a Yehowa e pe balulame, dingi matwi aaye aatemesha nteko yaabo.” (1 Mp. 3:12) Bantu balulame pamune na “kibumbu kikata kikile” kya bantu “abakatukila mu kutompiibwa kukata.” (Bif. 7:9, 14) Bano bantu abakapanda tambekale penda “kibumbu” nya kadi “kibumbu kikata kikile”​—bantu bebungi bukile. Okwete kwimona munkatshi mwa bantu abashala na muwa kunyima kwa “kupombeshibwa kukata”?

7 Bano beena kibumbu kikata kikile abatukila kunyi? Bakwete kubungibwa pamune pa mwanda wa kibaadi Yesu mutemukye bu ungi mwanda wi bu kitundwilo kya kwikala kwaye. Bambile shi: “Na uno mukandu wibuwa wa Bufumu aukalungulwa pa nsenga yoso yishadibwe, bwa kulesha bu-kamonyi kwi maumbo oso na kunyima nfudilo ayifiki.” (Mat. 24:14Kilombeno kipya 2009) Mu ano mafuku a ku nfudiilo, uno ndjo mudimo ukata wa ndumbulwilo a Efile Mukulu. Ku bukwashi bwa mukandu wibuwa na mudimo wa kulambukisha bantu wababakitshi kwi Batemwe ba Yehowa pa nsenga  ishima, midiyo ya bantu mbalongye bwa kulangwila Efile Mukulu “mu kikudi na mu binyibinyi.” (Yo. 4:23, 24) Bu kileshesho, mu bino bipwa ekumi bikile​—kubanga mu kipwa kya mudimo kya 2003 mpa na mu 2012—​bantu bakile pa 2 70 7000 mbatambushibwe bwa kulesha kwilambula kwabo kwi Efile Mukulu. Lelo uno, mu nsenga ishima, mwi Batemwe bakile pa 7 900 000, na midiyo ya bantu bakwete kwibunga nabo, bikishekishe ku Kitentekyesho kya lufu lwa Yesu akikitshikaa kipwa kyooso. Tatwitumbisha pamwanda wa bungi nya, kadi nyi ‘Efile Mukulu nabene kwete kukusha byooso.’ (1 Kod. 3:5-7) Sunga mbyabya, abimweka patooka shi kibumbu kikata kikile kya bantu kikwete kutama na kufiima ngofu kipwa kyooso!

8. Nkufiima kinyi kukwete kumweneka mu ndumbulwilo a Yehowa lelo uno?

8 Bungi bwa bafubi b’Efile Mukulu bukwete kutama mwanda Yehowa nabeene kwete kukwatshishena Batemwe baaye. (Badika Yeeshaya 43:10-12.) Kuno kutama kubaadi kuleshibwe mu ano mayi a butemuki: “Kisaka kipeela akiikala kya bantu kinunu, be kuushy’a booso abekala kisamba kii na binunu bya bantu. Ami Yehowa nakumbasha uno mwanda bukidi apakumbana nguba awo.” (Yesh. 60:22) Mu kingi kipungo, bashingwe mwimu baki pa nsenga abaadi nka bu “kisaka kipeela,” kadi bungi bwabo bubaadi abwende na kufiima bu bibaadi bangi beena Isaleele ba mu kikudi abafiki mu kutwela mu ndumbulwilo a Efile Mukulu. (Gal. 6:16) Bu bi Yehowa kwete kwitwelela myabi kipwa kyooso, kutama kukwete kutungunuka na kubunga kwa kibumbu kikata kikile kya bantu.

AKITUTEKYE YEHOWA

9. Nkinyi akitungu shi tukite su atukulupila nkapeta nshalelo ebuwa abadi betulee mu Eyi dy’Efile Mukulu?

9 Sunga twekala beena Kidishitu bashingwe mwimu sunga ba mu kibumbu kikata kikile, twi balombeene nkapeta nshalelo ebuwa abadi betulee mu Eyi dy’Efile Mukulu. Kadi, bwa nkamupeta abitungu shi tunemekye miiya ya Yehowa. (Yesh. 48:17, 18) Twate kileshesho kya beena Isaleele mu Miiya ya Moyiise. Mpango ya kumpala ya Miiya ibaadi ya kukalwila mwilo wa Isaleele pa kwibapa miiya itale kwiatena kwa mulume na mukashi, myanda ya makuta, kukusha kwa baana, kipwano na bangi, na ingi myanda. (Ef. 20:14; Lv. 19:18, 35-37; Miy. 6:6-9) Kutumikila kwa miiya y’Efile Mukulu akwitukwasha mu mushindo umune​—na atumono shi kukita akikyebe eshimba dy’Efile Mukulu ta mbushito bwitutentekwe nya. (Badika 1 Yowano 5:3.) Byabya, anka bu bibaadi Miiya ikalwile beena Isaleele, su tubeyilondo, Miiya y’Efile Mukulu ayikyebe kwitukwasha na kwitukalwila bwa kwikala na “lukumiino lwibuwa.”​—Tt. 1:13.

10. Bwakinyi abitungu shi twitshibile nsaa ya kulonga Bible na kukita Lulangwilo lwa mu kifuko lubingo looso?

10 Kipindji kya ndumbulwilo a Yehowa pano pa nsenge kikwete kwenda kumpala mu mishindo ilekeenelekeene. Bu kileshesho, mpushisho etu a bya binyibinyi bi mu Bible kwete kwenda na kulongama. Bi na kya kwikala byabya, mwanda “eshinda dya balulame di bu etaata dya pa nkyeelo adyend’aditamanga mpa na munkatshi a efuku.” (Mye. 4:18) Kadi twi balombeene kwiyipusha shi: ‘Apashintuluka mpushisho etu a bya binyibinyi bi mu Bifundwe, nkwete kulonda mpushisho mupya su? Ne na kiubishi kya kubadikanga Bible efuku dyooso su? Ne mubadi a mikanda yetu a kishima su? Ami na kifuko kyande atukita Lulangwilo lwa mu kifuko lubingo looso su?’ Ooso a kwatudi auku shi kukita ino myanda ta nkukile bukopo nya. Misango ibungi mwanda ngwa penda kwitshibila nsaa ya kukita ino myanda. Na dingi kupeta kyukilo kya binyibinyi kya Bifundwe, kwikitumikila na kwenda kumpala mu kikudi kwi na muulo ukile​—bikishekishe ano mafuku e kutompibwa kukata takudi pepi ngofu!

11. Mushindo kinyi wikale misangeelo ya kala mpa na bisangilo na bikongeno bya ano mafuku bikale bu bukwashi bukata?

 11 Ndumbulwilo a Yehowa kwete kukimba buwa bwetu petulungula bwa kulonda dino elango dya Mpoolo mutumibwa: “Tutentekyesheyi byatudya kwikankamishena mu kwifuleena na mu kukita kwa bibuwa. Tatukookanga kwenda mu bikongeno byetu bu bi bangi bapwe kukooka. Anka twikale atwikankamisheena bikishekishe pano patumono shi efuku adifiki Kidishitu dimo tadidi pepi.” (Eb. 10:24, 25) Misangeelo ya ku kipwa na bingi bikongeno bya lulangwilo bibaadi abibaka beena Isaleele mu kikuki. Dingi, misangeelo, bu kileshesho Musangeelo wa Tukuma mu mafuku a Neemi, ibaadi ayipa bantu muloo ukile. (Ef. 23:15, 16; Ne. 8:9-18) Atwikala na muloo wi byabya patudi ku bisangilo, na ku bikongeno. Tukite mwetu mooso bwashi bisangilo na bikongeno bitukwashe bwa kwikala banyingye mu kikudi na kwikala na muloo.​—Tt. 2:2.

12. Mushindo kinyi watudi balombeene kupusha pabitale mudimo wa kulungula mukandu wibuwa?

12 Atwe abatambuka pamune na ndumbulwilo a Efile Mukulu, twi na muloo wa kukita “mufubo [wiselele] wa mukandu wibuwa w’Efile Mukulu.” (Lom. 15:16) Kukita uno “mufubo wiselele” akwitwikasha bu ‘abafubu pamune’ na Yehowa, “Eselele.” (1 Kod. 3:9; 1 Mp. 1:15) Kulungula kwa mukandu wibuwa akukwasha bwa kwikasha eshina dya Yehowa bu diselele. Na nkinemo kikata kya kupebwa “mukandu wibuwa wa ntumbo w’Efile Mukulu sha [muloo].”​—1 Tim. 1:11.

13. Kwikala bukome mu kikudi na muwa mbitale kinyi?

13 Efile Mukulu akyebe shi twikale bukome mu kikudi patumulamata na kukwatshishena ndumbulwilo aaye mu midimo ilekeenelekeene. Moyiise baadi mulungule beena Isaleele shi: “Nenwatshila eyilu na nsenga bu tumonyi lelo: mmuwa na lufu mbyandi mutuule kumpala kwenu, na nsompo na mulao. Osangule muwa bwashi oshaale na muwa, obe na bekulu boobe, pa kufula Yehowa Efile Mukulu oobe, pa kuteemesha eyi dyaaye na pa kumulamata. Byabya ngi byoshaala na muwa, na byofiimisha mafuku oobe mu kushaala pa nsenga ibatshipile Yehowa bwa kupa ba mashobe bano: Abrahame, Isaake, na Yaakobo.” (Miy. 30:19, 20) Muwa wetu ngutale mushindo watukitshi akikyebe Yehowa, kumufula, kuteemesha eyi dyaaye na kumulamata.

14. Mushindo kinyi ubaadi aupusha mukwetu umune pabitale kipindji kya ndumbulwilo a Efile Mukulu akimweneka?

14 Mukwetu Pryce Hughes, baadi mulamate kwi Efile Mukulu na ndumbulwilo aaye, bambile ungi musango shi: “Ne na lutumbu bu binaadi na nshalelo mwipushene na kyukilo kya mpàngo ya Yehowa kubanga kala, kumpala kwa 1914 . . . Su kwi kintu kibaadi na muulo ukata kwandji, nyi nkwikala pepi na ndumbulwilo a Yehowa amweneka. Myanda inaadi mufumankane nayo ngindongyeshe shi kutuula lukulupilo mu binangu bya bu muntu nkukutwa kwa binangu. Su binangu byande bibende lwalwa lupese, musango umune nata kitshibilo kya kulonda ndumbulwilo sha kululama. Mushindo ungi kinyi ulombeene muntu kukuminyibwa na Yehowa na kupeta myabi yaaye?”

TUNGUNUKA NA KUTAMBUKA PAMUNE NA NDUMBULWILO A EFILE MUKULU

15. Tuusha kileshesho akifiki mu Bifundwe akilesha mushindo autungu shi tumone myanda apashintuluka mpushisho etu a myanda ya mu Bible?

15 Bwashi Yehowa akumiine na kwelela ooso a kwatudi myabi, abitungu tukwatshishene ndumbulwilo aaye na kukumiina mpushisho mupya apashintuluka mpushisho etu a Bifundwe. Twate kino kileshesho: Kunyima kwa lufu lwa Yesu, kubaadi beena Kidishitu binunu babaadi beena Yuuda na babaadi na katshintshi kakile bwa Miiya ya Moyiise na tabibaadi bibofule bwashi balekye kwiyilonda nya. (Bik. 21:17-20) Anka, ku bukwashi bwa mukanda  wa Mpoolo kwi beena Ebreeyi, abakuminyine shi ta mbatoshibwe ku bukwashi bwa milambo ‘ibaadi ayilambulwa muyiile ndambukisho ya Moyiise’ nya, anka ku bukwashi bwa ‘mbidi ya Yesu ibalambwilwe bu kitapwa mususa umune bwa looso.’ (Eb. 10:5-10EEM) Kushi mpaka, beena Kidishitu bebungi babaadi beena Yuuda abaadi bashintuule ngyelelo aabo a binangu na kwenda kumpala mu kikudi. Atwe namu twi na kya kulonga na kwikala na binangu bilulame nsaa ayishintuluka mpushisho etu a Eyi dy’Efile Mukulu sunga mudimo wetu wa bulungudi.

16. (a) Myanda kinyi ibuwa ayikyebe kwikasha muwa mu nsenga ipya buwa? (b) Nkinyi kyatutengyela mu nsenga ipya?

16 Booso abashaala balulame kwi Yehowa na ndumbulwilo aaye abakyebe kupeta myabi yaaye. Bashingwe mwimu basha kululama abakyebe kupeta myabi ikata bu bampyanyi naye na Kidishitu mwiyilu. (Lom. 8:16, 17) Su twi na lukulupilo lwa kwikala na muwa pa nsenga, tubande kwela binangu pabitale muloo watwikala nao wa kushaala mu Mpaladiiso. Bu byatudi mu ndumbulwilo a Yehowa, muloo kinyi watudi nao lelo wa kulungula bangi pabitale nsenga ipya ayitulaa Efile Mukulu! (2 Mp. 3:13) Misambo 37:11 ayamba shi: “Beyishe namu abakapyana nsenga, abasangeela mu butaale bw’eyendo.” Bantu “abebaka mashibo bemushaale” na abasangeela “bituukye ku maasa abo.” (Yesh. 65:21, 22) Takwikala dingi kupombeshibwa, bulanda, sunga nsala. (Mis. 72:13-16) Babilone Mukata takyebe dingi kudimba bantu nya, mwanda tekala dingi kwanka. (Bif. 18:8, 21) Bafwe abakebasangusha na kwibapa lukulupilo lwa muwa wa looso. (Yesh. 25:8; Bik. 24:15) Luno ndukulupilo lwibuwa bwikasha bwa midiyo ya bantu belambule kwi Yehowa! Bwashi tumone apakumbana ino milayilo i mu Bifundwe, abitungu tutungunukye na kwenda kumpala mu kikudi, na kutambuka nsaa yooso pamune na ndumbulwilo a Efile Mukulu.

We kwimona mu Mpaladiiso su? (Tala paragrafe 16)

17. Abitungu twikale na binangu kinyi pabitale lulangwilo lwa Yehowa na ndumbulwilo aaye?

17 Bu bi uno ndumbulwilo taadi pepi na ku nfudiilo, tushaale banyingye mu lukumiino na tuleshe lutumbu bwa mpàngo yate Efile Mukulu bwatudya kumulangwila. Byabya nyi bibaadi binangu bya Daavide, mufundji a misambo, bayimbile shi: “Ne mutekye Yehowa kintu kimune​—penda kimune kyankimbi—​kushaala mu nshibo ya Yehowa mafuku a muwa wande ooso, bwa kubandjila bi buwa bwa Yehowa na kwipaana ku mufubo mu ntempelo aaye.” (Mis. 27:4) Ooso a kwatudi alamate kwi Efile Mukulu, alonde ngwa ya mwilo waaye, na atungunukye na kutambuka na ndumbulwilo a Yehowa.