Bwakinyi mbakandjikye kwela bintu bya ba Temwe ba Yehowa mu site sunga mu konte a Internete oobe’be nambene?

Bu byatwabilaa bantu mikanda yetu ayipatuula Bible buntu, bamo bantu abamono’shi kwiyata na kwiyeela mu angi ma site sunga mu konte a Internete ta kwi bubi nya. Anka, kukita bino nkukutwa kutumikila mayi aalesha Mushindo wa kutumika na site * eetu a Internete na bino mbibweshe nkalakashi ibungi. Nka bu byabadi baleshe kalolo mu ano mayi, ta kwi muntu su ngumune e na matalwa a “kwata bifwanyi, mikanda ya kubadika mu ma telefone sunga mu ordinatere, bitundwilo, misambo, ma foto, ma video, sunga miisambo ya mu uno site bwa kwiyeela mu ungi site a Internete nya (ta mulombene kwibyela mu ungi site a Internete ooso yawa, mu site a kwitumishena mikanda, site a kwitumishena ma video, sunga mu ma site a kwisamba na bantu bebungi).” Bwakinyi uno mwiya wi na muulo?

Muntu su ngumune ta mulombene kwata mikanda yetu yabadi bakalwile kwi matalwa a bafundji na kwiyeela mu ungi site a Internete nya.

Bintu byoso bi mu site eetu a Internete mbebikalwile na matalwa a bafundji. Bantu basumbule lukumino na bangi beshikwanyi netu abatompaa kwela mikanda yetu mu ma site aabo a Internete bu kinunwa bwa kukaka ba Temwe ba Yehowa na bangi bantu. Kepatshila ka ano ma site nka kwibwesha mpaka mu binangu bya bantu ababadika. (Misambo 26:4; Nkindji 22:5) Bamo bantu mbafube na myanda i mu mikanda yetu sunga ka kifwatulo ketu ka jw.org bwa kuudisha bintu byabo, na kupwa bintu bya kuudisha, na mu ma programe a twamo twa kumaasa. Ku bukwashi bwa matalwa a bafundji, na kitundwilo kya kukalwila bintu byetu, twi na matalwa abadi betupe kwi mbulamatadi a kukandjika bantu abakyebe kufuba bibubi na bino bintu byetu. (Nkindji 27:12) Byabya su twatadila bantu,  mpa na bakwetu ba Temwe, bwabadya kwikala abeele bintu byetu mu angi ma site sunga kufuba na kifwatulo kya jw.org bwa kuudisha bintu byabo, bena mbulamatadi mbalombene kupela kwitukwatshishena patutunyisha ba ntomboshi na ba nsunga bwabadya kuleka kufubisha bintu byetu.

Kwata bintu byetu mu ingi mbalo kushi mu jw.org nkulombene kwikala masaku. Yehowa mmupe nka penda “mpika a kishima na mupatulukye” bushito bwa kutusha bya kudya bya mu kikudi. (Mateo 24:45) Uno “mpika” kwete kufuba nka na penda ano ma site aaye bwa kutusha bya kudya bya mu kikudi​—www.jw.org, tv.jw.org, na wol.jw.org (mikanda i mu Internete). Na dingi twi nka na penda ma programe asatu a mu ma telefone abauku kwi bantu boso;​—JW Language®, JW Library®, na JW Library Sign Language® (mu ludimi lwa tumaama). Su tubaata bya kudya bya mu kikudi mu angi ma mbalo, mbipwe kulwishibwa na ndumbulwilo a Satana.​—Misambo 18:26; 19:8.

Na dingi, kwela mikanda yetu mu ma site a Internete aapa bantu mushindo wa kufunda yabo myanda akupa bantu basumbule lukumino na bangi bantu mushindo wabadya kufunda myanda ayitakula bantu mu kukutwa kukulupila ndumbulwilo a Yehowa. Bamo bakwetu mbakakibwe mu kwisamba na bantu ku Internete na bino mbibafikishe mu kwisamba myanda ibubi pabitale eshina dya Yehowa. Ku Internete ta mbalo ibuwa bwatudya ‘[kulongyesha] na kasendeleshi baba abetupishena neetu’ nya. (2 Timote 2:23-25; 1 Timote 6:3-5) Twi basangane dingi’shi bantu mbakite ma konte na ma site a Internete a madimi mu eshina dya ndumbulwilo, dya Kasaka ka Bakunkushi-Bakulu, na dya bakwetu be mu kano kasaka. Aku namu, ta kwi muntu su ngumune a mu Kasaka ka Bakunkushi-Bakulu e na aaye site a Internete sunga e na aaye konte mu site a kwisamba na bantu bebungi ku Internete nya.

Kuludika bantu mu jw.org akukwasha bwa kupalakasha “mukandu wibuwa.” (Mateo 24:14) Bintu byabetupa bwatudya kufuba nabyo mu bulungudi bakwete kwenda na kwibilongamisha. Atukumina’shi bino bintu bikwashe muntu oso a kwabadi. Byabya, mu Mayi aalesha mushindo wa kufubisha site, atusangana’shi twi bakumbene kwibitumina muntu sunga kumulesha mbalo yadya kutwela bwa kwibyata mu jw.org. Nsaa yatuludika bantu mu site eetu mukata, atwibalesha nsulo ya binyibinyi ya kupeta bidibwa bya mu kikudi, “mpika a kishima na mupatulukye.”

^ par. 1 Mwaku autwala ku mayi aalesha Mushindo wa kutumika na site wi kuushi mu esaki dya mbangilo dya jw.org, na miya i mwanka ngitale kintu kyoso ki mu site eetu a Internete.