Enda bwa kuleshe myanda i mwanka

Enda bwa kuleshe kashibo ka myanda i mwanka

Dinyooka nyi nkishinkamisho kya kifulo ky’Efile Mukulu

Dinyooka nyi nkishinkamisho kya kifulo ky’Efile Mukulu

“Yehowa anyôkâ yawa ese âdi mufule.”​—BEENA-EBELU 12:6, EEM.

NGONO: 123, 86

1. Misusa ibungi, mu Bible mbapatuule dinyooka naminyi?

ONANGUSHENA naminyi nsaa yopusha kishima “dinyooka”? Bantu bebungi abanangushena’shi nkibawe, anka dinyoka adipushisha ingi myanda kushi penda kibawe. Bible akula’shi dinyooka di na muulo kwatudi na imo misusa abeditemuna pamune na kiukilo, binangu, kifulo, na muwa. (Nkindji 1:2-7; 4:11-13) Bi byabya mwanda dinyooka dy’Efile Mukulu adilesha’shi mmwitufule na akumina twikale na muwa wa ikalaika. (Beena-Ebelu 12:6) Sunga byekala’shi ingi nsaa mu dinyooka dy’Efile Mukulu amwikalaa kibawe, tadikalaa na kifita sunga adilesha bu ntomboshi nya. Byabya, kipatulwilo ki na muulo ngofu kya kishima “dinyooka” akipushisha kulambukisha, bu byabalambukishaa mwana kwi ba nambutwile be na kifulo.

2, 3. Mu dinyooka mmulombene kwikala kulambukisha na kupa muntu kibawe naminyi? (Tala kifwatulo ki ku mbangilo.)

2 Banda kunangushena bwa kino kileshesho. Ungi mwana ki ka nsongwalume abetanyinaa bu Johnny badi aasha ndundo mu nshibo. Nyinaye bamulungwile’shi: “Johnny, tokumanga kwasha ndundo oobe mu nshibo! Mwanda we mulombene kutanya bintu.” Anka bakutshilwe kupusha bibamulungwile nyin’aye, aye nkutungunuka na kwasha ndundo. Ndundo badi mwikupile ku kalondo, ako  nkutanyika! Nyinaye na Johnny bakitshine naminyi bwa kumunyooka? Bamulambukiishe pa kumupatulwila bwakinyi bino bibakitshi bibubi. Badi akumina kumuukisha’shi bibuwa ekale akookyela bamutande, na’shi miya yabamwelela i na muulo na tayi bukopo. Bwa kukwasha Johnny bwadya kuuka dino dilongyesha, batshile kitshibilo kya kumunyooka pa kumunyenga ndundo munda mwa kapindji kapela. Bino tabibadi bisankishe Johnny nya, anka, bibamukwashishe bwadya kutentekyesha’shi mulombene kupeta bipeta bibubi nsaa yakutwa kukookyela bamutande.

3 Atwe bena Kidishitu, twi bantu be mu nshibo y’Efile Mukulu. (1 Timote 3:15) Nshetu, Yehowa, e na matalwa a kwata kitshibilo kya bibuwa na bibubi na kwitunyooka nsaa yatukutwa kumukookyela. Na dingi, su kikitshino kyetu kibatusha bipeta bibubi, dinyooka dya kifulo dya Yehowa ndilombene kwitukwasha bwatudya kutentekyesha bwakinyi kumukookyela kwi na muulo. (Beena-Ngalatea 6:7) Efile Mukulu mmwitufule ngofu na takumina’shi twikale atukyengye nya.​—1 Mpyeele 5:6, 7.

4. (a) Yehowa akumina’shi tulongyeshe bantu naminyi? (b) Mu uno mwisambo atukyebe kwisambila kinyi?

4 Nsaa yatutuusha dinyooka dimeene pa Bible, twi balombene kukwasha mwana sunga mulongi a Bible bwadya kufika mulongi a Kidishitu. Atufubu na Bible bwa kulambukisha balongi betu ba Bible bwabadya kuuka myanda ibuwa na kwibakwasha bwa kupusha na ‘kulama byooso bibabadi betufundjile kwi Yesu.’ (Mateo 28:19, 20; 2 Timote 3:16) Uno ngi mushindo aukumina Yehowa’shi balongyeshibwe bwa’shi nabo namu bamone bya nkakwasha bangi balondji ba Kidishitu. (Badika Tite 2:11-14.) Binobino, tubandeyi kwisambila ino nkonko isatu i na muulo: (1) Dinyooka dy’Efile Mukulu adilesha’shi mmwitufule naminyi? (2) Ndilongyesha kinyi dyatudi balombene kupeta kwi bantu bababadi banyookye kwi Efile Mukulu? (3) Twi kwambula mushindo wa kunyooka wa Yehowa na Mwan’aye naminyi?

EFILE MUKULU ANYOKAA NA KIFULO

5. Dinyooka dya Yehowa adilesha’shi mmwitufule naminyi?

5 Yehowa etuludikaa, etulambukisha na kwitulongyesha mwanda mmwitufule. Akumina’shi tushale pepi naye twikale na muwa wa ikalaika. (1 Yowano 4:16) Kasha tetukayile sunga kukita bya’shi tupushe bu’twe bashi na muulo nya. (Nkindji 12:18) Anka, Yehowa emenaa pa ngikashi yetu ibuwa na kwitutadila bwatudya kwikala na bulungantu bwa kwisangwila. We kumona mushindo wabetulesha kifulo kwi Yehowa kukiila ku dinyooka dyatupete mu Bible, mu mikanda yetu, kwi betutande, sunga kwi bakulu mu kakongye su? Byabya, nsaa i bakulu abekitshisha bwa kwituludika mu butaale na kifulo kyoso kumpala kwatudya kuuka’shi twi bakite mwanda wi bubi, bakwete kwambula kifulo kyabadi betufule kwi Yehowa.​Beena-Ngalatea 6:1.

6. Dinyooka adilesha kifulo ky’Efile Mukulu naminyi sunga byekala’shi muntu tamulombashe dingi myanda itekibwe bwa kwikala na mashito mu kakongye?

6 Ingi nsaa dinyooka tadimenaa nka penda p’elango nya. Su muntu bakitshi mulwisho ukata, tamulombashe dingi ngikashi ayitungu bwadya kwikala na amo mashito a mu kakongye nya. Sunga byakitshika byabya, dinyooka adilesha nka kifulo ky’Efile Mukulu kwadi. Bu kileshesho, mbilombene kumukwasha bwa kumona muulo wa kukisha nsaa ibungi mu kwilongyela Bible, kunangushena ku myanda yabadika, na kwela nteko. Kukita ino myanda nkulombene kumukwasha bwa kunyisha kunyingisha kipwano kyaye na Yehowa. (Misambo 19:7) Mu kukila kwa mafuku, mulombene kupetuula dingi mashito sunga midimo yekalanga mushimishe. Mpa na nsaa yabatusha muntu mu kakongye, bino abilesha nka kifulo kya Yehowa mwanda abikalwila kakongye kwi bantu be na bukitshishi bwi bubi. (1 Beena-Kodinda 5:6, 7, 11) Na dingi bu bi  dinyooka dy’Efile Mukulu ndikale nka dilulame, adikwasha muntu abadi batushe mu kakongye bwadya kushinguula bukata bwa mulwisho waye. Bino bi kumutakula bwadya kwinyongola na kuleka mulwisho waye.​—Bikitshino 3:19.

DINYOOKA DYA YEHOWA ADITUKWASHAA

7. Shebena badi muntu kinyi, na badi mutamishe eyikashi kinyi di bubi?

7 Bwa kushinguula bi muulo wa dinyooka, atukyebe kwisambila bantu babidi bababadi banyookye kwi Yehowa. Umune a kwabadi nyi Shebena, mwina Isaleele badi kwanka mu mafuku a Nfumu Esekiya, na a kabidi nyi Graham, mukwetu mulume a mu ano mafuku eetu. Shebena badi “mukata a ebalasa dya nfumu” Esekiya, na badi na matalwa ebungi. (Yeeshaya 22:15) Anka, Shebena babangile kwitatula na badi akumina’shi bangi bamumone bu’ye e na muulo ngofu. Badi mukitshishe mpa na mashama aaye e na muulo wi bukopo na badi atambukila mu ‘matempu a kwisadika nao.’​—Yeeshaya 22:16-18.

Su tubeyisha na kukumina kushintuula binangu byetu, Efile Mukulu aketwelela myabi (Tala kikoso kya 8-10)

8. Yehowa badi munyookye Shebena naminyi, na mbipeta kinyi bibadi bitukye?

8 Bu bibadi Shebena akimbi ntumbo yaye’ye nabene, Efile Mukulu batshile mudimo waye eupa muntu ababadi abetanyina bu Elyakime. (Yeeshaya 22:19-21) Bino bibadi bikitshikye mu mafuku abadi Nfumu Senakeribe a mu Asirii akyebe kulwisha Yeelusaleme. Kunyima, Senakeribe batumine kisaka kya bindonda byaye na kilwilo kikata mu kutshinyisha bena Yuuda na kutakula Nfumu Esekiya bwadya kwilekyela mu masa mwaye. (2 Banfumu 18:17-25) Esekiya batumine Elyakime na bangi bantu babidi bwabadya nkemonena na bindonda bya Senakeribe. Umune a ku bano bantu nyi Shebena, badi afubu binobino bu mufundi a mikanda. Pano atumono’shi Shebena balongyele bya kwiyisha na tamufiite munda sunga kwinyongola nya. Badi mukumine mwasu wikye pe ubadi nao kumpala. Uno mwanda wa Shebena awitulongyesha ano malongyesha asatu.

9-11. (a) Mmalongyesha kinyi e na muulo atudi balombene kupetela kwi Shebena? (b) Opusha naminyi pabitale mushindo ubabadi bakitshine Shebena myanda kwi Yehowa?

9 Dya kumpala, bu bibadi Shebena mushimishe mwasu waye, bino abitutentekyesha’shi “kwitatula akufwishâ kupona.” (Nkindji 16:18, EEM) Twi kwikala na mudimo sunga bushito mu kakongye, na bamo bantu be kwela binangu’shi twi na muulo ukata. Su bi byabya, atukashala na kwiyisha su? Atukatentekyesha’shi ngobesha yoso yatudi nayo na bintu byoso bibuwa byatukitshi atwibikitshi nka pa mwanda wa Yehowa su? (1 Beena-Kodinda 4:7) Mpoolo mutumibwa badi mwitudimushe’shi: “Nalungula ooso a kwanudi’shi tanwikalanga na kwilungula kukile pa kipimo; ikalayi basha kinangu kimune.”​—Beena-Looma 12:3.

10 Dya kabidi, elango di bukopo dibabadi bape Shebena kwi Yehowa adilesha’shi badi mushinkamishe’shi Shebena mulombene  kushintuluka. (Nkindji 3:11, 12) Dino ndilongyesha di na muulo kwi baba bashimishe mashito mu kakongye. Pamutwe pa kukwata nsungu na kukimba bya kwipasha, mbalombene kutungunuka na kupa Yehowa bintu byabo bya muulo. Be kwata kitshibilo kya kumona dinyooka dya Yehowa bu kishinkamisho kya kifulo kyaye. Tentekyesha’shi Nshetu akafutu baba boso be na kwiyisha. (Badika 1 Mpyeele 5:6, 7.) Dinyooka dya kifulo dya Yehowa ndilombene kwitubumba su tubekala na kwiyisha na kwikala bu ema dibofule.

11 Dya kasatu, atupete dilongyesha di na muulo pabitale mushindo ubabadi bakitshine Shebena myanda kwi Yehowa. Sunga byekala’shi mushindo wabanyokaa muntu kwi Yehowa aulesha’shi mmushikwe mulwisho, aulesha dingi’shi mmufule yawa muntu mukite mulwisho. Yehowa atalaa myanda ibuwa i mwi muntu. Su we nambutwile sunga mukulu mu kakongye, okambula mushindo wabatushaa dinyooka kwi Yehowa su?​—Yunda 22, 23.

12-14. (a) Bamo bantu abakitaa naminyi nsaa yabebanyooko kwi Yehowa? (b) Eyi dy’Efile Mukulu dibadi dikwashe ungi mukwetu bwadya kushintuula binangu byaye naminyi, na mbipeta kinyi bibatukile?

12 Mwanda wa malwa, bamo bantu abenyongolaa ngofu nsaa yabebanyooko mu kipaso kyabendaa mpa na kula n’Efile Mukulu na kula na kakongye. (Beena-Ebelu 3:12, 13) Bino abilesha’shi muntu su ngumune ta mulombene kwibakwasha su? Nya! Twate kileshesho kya Graham, ababadi batushe mu kakongye kunyima bamwalusha. Anka kunyima kwa papa, balekyele kulungula mukandu wibuwa na kwenda mu bisangilo. Ungi mukulu badi mwikitshishe ngofu bwadya kwikala kuuku a Graham, na Graham batekyele uno mukulu bwadya kulonga naye Bible.

13 Mukulu atentekyesha’shi: “Graham badi na kwitatula. Badi akula bakulu babadi bamutushe mu kakongye myanda ibubi. Ngi bwakinyi mu kulonga kwetu kwa misango ibalondele, tubadi besambile ma verse aakwila kwitatula na bukitshishi bwakudi kulombene kwikala nabo. Graham babangile kwimona kalolo mu lumweno lw’Eyi dy’Efile Mukulu, na tabadi asankila myanda ibadi amono nya! Bino bibadi na bukitshishi bukata kwadi! Nsaa ibaukile’shi ekalanga mushikilwe na ‘mutandalo’ wa kwitatula na’shi mwikelo waye wa kuunauna bakulu ngi mwanda ukata wekalanga nao, babangile kushintuluka bukidi bukidi. Babangile kutwela mu bisangilo bya bena Kidishitu byoso, kulonga Eyi dy’Efile Mukulu ngofu, na kwikala na kyubishi kya kwela nteko efuku dyoso. Babangile kulombasha bushito bwaye bwa mu kikudi bwa bu nfumu a kifuko, na bino bibadi bisangashe mukashi’aye na bana baye ngofu.”​—Luka 6:41, 42; Shake 1:23-25.

14 Uno mukulu badi mulombashe’shi: “Dingi efuku, Graham bandungwile mwanda ubadi unkume kwishimba. Aye kwamba’shi: ‘Ne mulongye bya binyibinyi munda mwa bipwa bibungi, na ne mufube mpa na bu mbala-mashinda. Anka binobino ngi byandi mulombene kwakula mu binyibinyi’shi ne mufule Yehowa.’” Kunyima kwa mafuku apeela, abapeele Graham mudimo wa kupa bantu kikolo mu bisangilo, na badi na muloo wa kupeta uno mudimo. Uno mukulu bambile’shi: “Kileshesho kyaye kibandongyeshe’shi nsaa i muntu eyisha kumpala kw’Efile Mukulu pa kukumina dinyooka, apete myabi ibungi!”

AMBULA EFILE MUKULU NA KIDISHITU NSAA YOTUSHA DINYOOKA

15. Abitungu tukite kinyi bwa’shi dinyooka dyetu dikale na bukitshishi bwibubwa?

15 Su atukumina kufika balongyeshi bebuwa, abitungu tubande kwikala balongi bebuwa. (1 Timote 4:15, 16) Mu mushindo umune, su we muntu abafubisha kwi Yehowa bwadya kunyooka bangi, abitungu wekale na kwiyisha na kutadila bwa’shi Yehowa akukunkushe mu muwa oobe. Su bangi abamono’shi we na kwiyisha, abakunemeka na abikekala bibofule bwabadya  kukumina elango dyotusha. Twi kupeta malongyesha ebungi ku kileshesho kya Yesu.

16. Ndilongyesha kinyi dyatudi balombene kupetela kwi Yesu pabitale kutusha dinyooka na kulongyesha?

16 Yesu badi akookyela Nshaye efuku dyoso, sunga byekala bukopo bwa kwibikita. (Mateo 26:39) Badi mutentekyeshe bantu abadi abamuteemesha’shi malongyesha na binangu byaye abifiki kwi Nshaye. (Yowano 5:19, 30) Yesu badi na kwiyisha na kukookyela, na bino bibamukwashishe bwadya kwikala mulongyeshi e na lusa. Bantu be na mashimba alulame abadi abakumina kushala pepi naye. (Badika Luka 4:22.) Mayi a kalolo a Yesu abadi akankamikye bantu boso abadi babofule na batshoobolokye. (Mateo 12:20) Badi aludika batumibwa baye mu mushindo aulesha kalolo na kifulo mpa na nsaa ibadi mulombene kwibafitshila munda pababadi abekakeena bwa kuuka mukile bukata munkatshi mwabo.​—Maako 9:33-37; Luka 22:24-27.

17. Ngikashi kinyi ayikakwasha bakulu bwabadya kupasukila kakongye kalolo?

17 Nsaa yoso i bakulu abatusha dinyooka dimeene mu mayi a kulonda a mu Bible, abitungu bambule Kidishitu. Su abakitshi byabya, abalesha’shi abakumina kulonda buludiki bw’Efile Mukulu na bwa Mwan’aye. Mpyeele mutumibwa bafundile’shi: “Lamaayi mikooko y’Efile Mukulu yabadi beenupe kushi mu kukamika, anka na muloo ooso, bu abikyebe Efile Mukulu; kushi na lwabi anka mu kwilambula kwenu. Tanwikalanga na bufumu bwa kumuna baaba babadi benupe kulama. Anka ikalaayi bu kileshesho kwi kakongye.” (1 Mpyeele 5:2-4) Bakulu abakokyela Efile Mukulu na Kidishitu na muloo ooso abakapete myabi, mpa na bantu boso babakwasha.​—Yeeshaya 32:1, 2, 17, 18.

18. (a) Yehowa atekye ba nambutwile bwabadya kukita kinyi? (b) Efile Mukulu akwashaa ba nambutwile naminyi?

18 Kadi pabitale dinyooka na kulambukisha mu kifuko? Yehowa alungula ba nfumu ba bifuko’shi: “Tanutomboshanga baana beenu; anka bwa kwibakusha, ikalaayi beebalame kalolo, na kwibapa malango aa kwi Yehowa.” (Beena-Efeso 6:4) Kulongyesha na kunyooka bana kwi na muulo su? Atubadika mu mukanda wa Nkindji 19:18, (EEM) shi: “[Nyooka] mwan’obe paki mukinga pakuki kipaso kya kumuludika, anka twekalanga na nsungu ya kukyeba kumwipâ.” Yehowa mmupe ba nambutwile bushito bwa kunyooka bana babo. Su abakutwa kukita bino, abekala na ebasa kwadi! (1 Samwele 3:12-14) Anka Yehowa apeyaa ba nambutwile binangu na bukome bwabadi nabo lukalo nsaa yabamutekye bukwashi mu nteko na kukulupila mu Eyi dyaye na kikudi kyaye ki selele bwakidya kwibakunkusha.​—Badika Shake 1:5.

LONGA MUSHINDO WA KUSHALA MU BUTAALE BWA LOOSO

19, 20. (a) Mmyabi kinyi yatukapete su tubakumina dinyooka dy’Efile Mukulu? (b) Mu mwisambo aulondo atukalongo kinyi?

19 Su tubakumina dinyooka dy’Efile Mukulu na kwambula mushindo wabatushaa dinyooka kwi Yehowa na Yesu, atukapete myabi ikile bungi! Bifuko byetu na tukongye twetu atwikala mu butaale, na muntu oso akapusha’shi mbamufule, e na muulo na e mu bulungantu. Ino nyi ndambo ipeela ya ku butaale na miloo yatukapete mu mafuku aafiki. (Misambo 72:7) Dinyooka dya Yehowa aditulumbuula bwatudya kushala pamune mu butaale bwa ikalaika na kwikala mu buumune mu kifuko na kumona Yehowa bu Nshetu. (Badika Yeeshaya 11:9.) Su tubatentekyesha bino, atukamono dinyooka byadidi binyibinyi: mushindo wibuwa wabetulesha kifulo kwi Efile Mukulu.

20 Mu mwisambo aulondo, atukalongo myanda ibungi pabitale dinyooka mu kifuko na mu kakongye. Atukalongo byatudi balombene kwinyooka atwe banabnene. Na dingi atukalongo byatudi balombene kusuuka kintu kilombene kwitupetesha kinyongwa kukila dinyooka dyatupete.