‘[Eyi] dy’Efile Mukulu di na mûwa na bukome’​—BEENA-EBELU 4:12, EEM.

NGONO: 114, 113

1. Nkinyi akikushinkamiisha’shi Eyi dy’Efile Mukulu di na bukome? (Tala kifwatulo ki ku mbangilo.)

BAFUBI ba Yehowa boso mbashinkamishe’shi eyi dyaye, sunga mukandu waye wadi mutumine bantu, ‘wi na mûwa na bukome.’ (Beena-Ebelu 4:12, EEM) Twi bamone bukome bwa Bible mu muwa wetu na mu nshalelo a bangi bantu. Kumpala kwa kufika ba Temwe ba Yehowa, bamo ba kwatudi babadi ba ngifi, ba ntomi ba bintu bya lengo, sunga ba ntambushi ba masandji. Bangi babadi bende nkumo sunga’shi babadi na makuta e bungi. Anka, babadi abapusha’shi mbakutwe kintu ki na muulo mu muwa wabo. (Mulungudi 2:3-11) Mwanda wa muloo, bebungi bashibaadi na lukulupilo, na bashimine, binobino be na lukulupilo lwa binyibinyi. Mu Kitenta kya Mulami, twibabadikye miisambo ya bantu abaadi bashintuule nshalelo aabo mu miisambo ayamba’shi: “Bible kwete kushintuula bantu.” Dingi mpa na kunyima kw’abo kufika bena Kidishitu, mbalombene kutungunuka na kunyingisha kipwano kyabo na Yehowa ku bukwashi bwa Bible.

2. Bukome bw’Eyi dy’Efile Mukulu bubadi bukwashe bantu ba mu siekele a kumpala naminyi?

2 Tabitukanyisha pa kumona shi bantu bakwete kushintuluka bikata nsaa yabalongo bya binyibinyi! Bakwetu balume na bakashi ba  mu siekele a kumpala abaadi na lukulupilo lwa kwenda mwiyilu, abaadi n’abo namu bashintulukye mu kino kipaso. (Badika 1 Beena-Kodinda 6:9-11.) Pabakwile Mpoolo bwa bantu bashi balombene kutwela mu Bufumu bw’Efile Mukulu, bakwile dingi’shi: “Byabya ngi bibadi bangi ba kwanudi.” Eyi dy’Efile Mukulu na kikudi kyaye ki selele bibadi bikwashe bano bantu bwabadya kushintuluka. Byabya mpa na kunyima kwa’bo kufika bena Kidishitu, bamo ba kwabadi babakitshine bilubilo bikata bibadi bilwishe kipwano kyabo na Yehowa. Bu kileshesho, Bible atemuna umune a ku bakwetu bedibwe mwimu badi mubingibwe mu kakongye. Kunyima kwa mafuku, badi mushintulukye bwadya kumona bya kwalukila mu kakongye ka bena Kidishitu. (1 Beena-Kodinda 5:1-5; 2 Beena-Kodinda 2:5-8) Abitunkankamika pa kumona’shi bakwetu balume na bakashi mbapete ngobesha ya kushintuula myanda ibungi ku bukwashi bwa bukome bw’Eyi dy’Efile Mukulu.

3. Mu uno mwisambo atukyebe kwisambila kinyi?

3 Eyi dy’Efile Mukulu di na bukome bwi bungi. Bu byabadi betupe dyanka kwi Yehowa, atukumina kwidifubisha kalolo. (2 Timote 2: 15) Mu uno mwisambo atukyebe kwisambila myanda yatudi balombene kukita bwa kufubisha bukome bwa Bible (1) mu muwa wetu’twe banabene, (2) mu mudimo wa bulungudi, na (3) nsaa yatulongyesha kumpala kwa kakongye. Myanda yatukalongo mu uno mwisambo ayiketukwasha bwa kulesha kifulo na lutumbu lwetu kwi Nshetu a mwiyilu, etulongyesha bwa buwa bwetu.​—Yeeshaya 48:17.

MU MUWA WETU’TWE BANABENE

4. (a) Abitungu tukite kinyi bwa’shi Eyi dy’Efile Mukulu dikale na bukitshishi mwatudi? (b) Okitaa naminyi bwa kupeta nsaa ya kubadika Bible?

4 Bwa kutadila Eyi dy’Efile Mukulu dikale na bukitshishi mwatudi, abitungu twikale atwidibadika efuku dyoso. Bwa kukita bino abitungu kwikitshisha. (Yooshwa 1:8) Bebungi ba kwatudi be na myanda ibungi ya kukita, anka tabitungu kuleka kintu su nkimune, mpa na mashito eetu, bwaadya kwitukutshishwa kubadika Bible efuku dyoso nya. (Badika Beena-Efeso 5:15, 16.) Twi kukimba nsaa ya kumubadika ku namashika, ingi nsaa munkatshi mw’efuku, sunga bufuku. Abitungu tutumikile ano mayi a mufundji a misambo bafundile’shi: “Ne na kifulo kikata kya miiya yoobe, mafuku ooso neyinangushena.”​—Misambo 119:97.

5, 6. (a) Bwakinyi abitungu twikale atunangushena pa myanda yatubadika? (b) Kunangushena nkulombene kwitupetesha bipeta bibuwa naminyi? (c) Kubadika Bible na kunangushena pa myanda ibodi obadika nkukukwashe naminyi?

5 Anka, kubadika Bible ta nkupwa kwa mwanda nya. Abitungu tunangushene, sunga kwela binangu kalolo pa myanda yatubadika. (Misambo 1:1-3) Su tubakitshi bino ngi tupete mushindo wa kutumikisha binangu bi mu Bible mu muwa wetu. Byabya, bikale’shi atubadika Bible  atudi naye ku maboko sunga atudi naye mu kaamo ka telefone sunga kingi kintu, abitungu tutadile Eyi dy’Efile Mukulu ditushintuule na kwitutakula mu kukita myanda kampanda.

6 Kunangushena kwetu nkulombene kwitukwasha naminyi? Nsaa yatubadika Bible, abitungu twimane kapindji na kwiyipusha’shi: ‘Uno mwanda aundongyesha kinyi pabitale Yehowa? Nkwete kutumikila uno mwanda mu nshalelo ande naminyi? Biki’abintungu kushintuula myanda kinyi?’ Nsaa yatunangushena pa Eyi dy’Efile Mukulu na kwela nteko pabitale myanda yatubadika, atukakumina kwiyitumikila. Yaya nsaa atukamono bi bukome bwa Bible mu muwa wetu.​—2 Beena-Kodinda 10:4, 5.

MU MUDIMO WA BULUNGUDI

7. Twi kufuba n’Eyi dy’Efile Mukulu kalolo nsaa yatudi mu bulungudi naminyi?

7 Bi na muulo ukata bwatudya kwikala atufubisha Eyi dy’Efile Mukulu misusa ibungi nsaa yatudi mu bulungudi na patulongyesha bantu. Ungi mukwetu mulume bambile’shi: “Su bodya kwikala na Yehowa nabene mu bulungudi bwa ku nshibo na nshibo, bodya kwikala wakula obe nabene su bodya kumulekyela bwa’shi aye namu akule?” Nsaa yatubadikila muntu Bible, atulekyela Yehowa bwa’shi esambe naye. Verse odi musangule kalolo mulombene kwikala na bukome kukila kingi kintu kyoso kyodi mulombene kwakula. (1 Beena-Tesalonika 2:13) Nsaa yodi mu bulungudi, wekitshishaa bodya kubadika Bible misango yoso yodi na mushindo wa kumubadika su?

8. Bwakinyi tabitungu twimene nka penda mu kubadikila bantu ma verse nsaa yatudi mu bulungudi?

8 Byabya, kubadikila bantu batulungula mukandu wibuwa ma verse a mu Bible, ta nkupwa kwa mwanda nya. Bantu bebungi tabapushaa myanda i mu Bible kalolo nya. Uno mwanda ubadi kwanka mpa na mu siekele a kumpala, na wi kwanka mpa na lelo uno. (Beena-Looma 10:2) Tatupwandikishanga’shi bantu bakwete kupusha ma verse atwibabadikila kalolo. Twi kwibakwasha pa kwibabadikila bishima sunga  myanda i na muulo i mu verse na kwibapatulwila kyayipushisha. Su tubakitshi bino, Eyi dy’Efile Mukulu ndilombene kukuma mashimba na binangu bya bantu.​—Badika Luka 24:32.

9. Twi kukwasha bantu bwabadya kunemeka Bible kukiila ku mayi atwakula kumpala kwa kubadika verse naminyi? Tusha kileshesho.

9 Mayi atwakula kumpala kwa kubadika verse ngalombene dingi kutakula muntu bwadya kunemeka Bible. Bu kileshesho, twi kwamba’shi: “Tubande kutala akyakula Mupangi eetu pa uno mwanda.” Su atwisamba na muntu shi mukule mu kifuko kya bena Kidishitu, twi kwakula’shi: “Tubande kutala abitulungula Bifundwe bi selele.” Su tubafumankana na muntu shi’abasukaa myanda ya bipwilo, twi kumwipusha’shi: “Tobandile kupusha mayi e mu uno mukanda wa kala su?” Su tubatentekyesha’shi muntu ooso mmukule mu kifuko kilekene na e na aaye malongyesha aadi mukumine, atukakitshi mwetu moso bwatudya kubanga mwisambo na mayi aamupa lukalo lwa kwituteemesha.​—1 Beena-Kodinda 9:22, 23.

10. (a) Ungi mukwetu mulume badi mumone mwanda kinyi? (b) We mumone bukome bw’Eyi dy’Efile Mukulu naminyi mu mudimo oobe wa bulungudi?

10 Bantu bebungi mbasangane’shi, kufubisha Eyi dy’Efile Mukulu nkulombene kwikala na bukitshishi bwibuwa kwi bantu babalungula mukandu wibuwa. Bu kileshesho, ungi mukwetu bayile mu kutala muntu mununu abadi alekyela ma jurnale a kubadika munda mwa bipwa bibungi. Dingi efuku, pamutwe pa kumulekyela penda nimero ipya ya Kitenta kya Mulami, uno mukwetu batshile kitshibilo kya kumubadikila verse. Badi mumubadikile 2 Beena-Kodinda 1: 3, 4, amba’shi: “Yaaya a lusa n’Efile Mukulu sha kusambana mu byooso; etusambaa mu malwa eetu booso.” Ano mayi abadi akume uno muntu mununu kwishimba, aye nkuteka bwa’shi amubadikile uno verse dingi. Kunyima uno muntu bambile’shi, aye na mukashi aaye be na lukalo lwa kusambibwa. Pa mwanda wa uno verse, badi mukumine kuuka myanda ibungi i mu Bible. Eyi dy’Efile Mukulu di na bukome bukata nsaa yatwidifubisha mu bulungudi!​—Bikitshino 19:20.

NSAA YATULONGYESHA KUMPALA KWA KAKONGYE

11. Mbushito kinyi bwi na bakwetu balume abalongyesha kumpala kwa kakongye?

11 Twi bafule kutwela mu bisangilo, mu bikongeno bikata na bipela. Kabingilo kakata katutwelela nka kulangwila Yehowa. Dingi ku bisangilo atupetaa bukwashi kukidila ku myanda yatulongo. Bwa kano kabingilo, bakwetu balume abetulongyesha kumpala kwa kakongye be na kinemo na bino mbikale bushito bukata bwabadi nabo. (Shaake 3:1) Abitungu batale shi malongyesha abo aatuukila mu eyi dy’ Efile Mukulu. Su twi na buno bushito, mushindo kinyi watudi balombene kufuba na bukome bw’eyi dy’Efile Mukulu bwa kulongyesha bantu abetuteemesha?

12. Abitungu muntu eele mwisambo akite naminyi bwa kushinkamisha’shi mwisambo waye autukila mu Bible?

12 Abitungu Bifundwe bikale na muulo mu mwisambo oso awedibwa. (Yowano 7:16) Byabya, abitungu kutala kalolo mushindo wele mwisambo oobe na myanda sunga bileshesho byofubisha, tabikakanga binangu bya bantu kukila byabadi balombene kwibitula ku Bible. Ikala otentekyesha’shi, kubadika Bible ta kwi mumune na kulongyesha myanda i mwanka nya. Kwilekena na byabya, su okamba kubadika ma verse ebungi, bantu bebungi tabealamina nya. Sangula kalolo ma verse odi mulombene kufuba nao. Dingi ata nsaa yakwiabadika, kupatuula, kutusha bileshesho, na kwibitumikisha. (Neemiya 8:8) Su abakupa mwisambo wi na plan, ekitshishe bwa kumwilongyela na kwilongyela ma verse e mwanka. Ekitshishe bwa kupusha bipushene myanda i mu plan na ma verse. Kubapu,  o badikye angi ma verse bwa kulongyesha myanda ikata i mu mwisambo. (We kupeta ingi myanda i buwa mu mukanda wa Tirez profit de l’École du ministère théocratique mu dilongesha dya 21 na ku dya 23.) Na dingi ki na muulo ukata nyi nkuteka Yehowa bwa’shi akukwashe bodya kutusha malongyesha e na muulo aatukila mu Bible.​— Badika Esela 7:10; Nkindji 3:13, 14.

13. (a) Ungi mukwetu mukashi badi mukumibwe kwishimba na kifudwe kibaadi mupushe ku bisangilo naminyi? (b) Mushindo wa bafubu na Bible mu bisangilo byetu wi na bukitshishi kinyi kodi?

13 Pabadi ungi mukwetu mukashi a mu Australie ki mwana mukinga, badi mupete myanda ibukopo, na sunga mbibadi mupwe kwiuka Yehowa, tabadi mushinkamishe’shi Yehowa mumufule nya. Pabadi mu bisangilo, uno mukwetu mukashi badi mupushe verse badi mumukume kwishimba. Aye nkubanga kunangushena ku kino kifundwe na kubanga kukimbuula mu ingi mikanda, ibadi imuludikye ku ingi verse ya mu Bible. Nyi aye nkushinkamisha’shi Yehowa mumufule. * Tobopushishe namu kifundwe kampanda kikukume kwishimba podi mu bisangilo, mu bikongeno bya kifunda sunga bya mafuku asatu mu uno mushindo su?—Neemiya 8:12.

14. Twi kulesha naminyi’shi twi bafule na atwata Eyi dya Yehowa na muulo?

14 Tatwi bya kutumbula Yehowa bwa Bible, Eyi dyaye su? Badi mulee’shi adikekala kwanka bwa loso, na mmulombashe mulayilo waye. (1 Mpyeele 1:24, 25) Ngi bwakinyi atukumina kwikitshisha bwa kubadika Bible efuku dyoso, kutumikila myanda yatubadika mwanka mu nshalelo eetu, na kwidifubisha bwa kukwasha bangi bantu. Nsaa yatukitshi bino, atulesha’shi twi bafule kino kintu kya muulo na atwikinemeka, na ungi mwanda wi na muulo, atukatumbisha Yehowa Efile Mukulu aye sha Bible.

^ par. 13 Tala kashibo akamba’shi “ Mwanda ubadi ushintuule binangu byande.”