Enda bwa kuleshe myanda i mwanka

Enda bwa kuleshe kashibo ka myanda i mwanka

 MWISAMBO WA KULONGA 32

Tamisha kifulo kyoobe

Tamisha kifulo kyoobe

“Kînyi kyankwete kwinutekyela nyi nkino: kifulo kyenu kikishekishe kutama.”—Fid. 1:9, EEM.

LOONO 106 Twikaleyi na kifulo

MYANDA I MWANKA *

1. Mba nanyi abaadi bakwashe bwa kutuusha kakongye mu Fidipe?

PABAFIKILE Mpoolo, Silase, Luka na Timotee mu Fidipe kibundji kibaadi ku bupika bwa bena Looma, abasangene bantu bebungi abaadi abakumiina mukandu wa Bufumu. Bano bakwetu bananka basha katshintshi abatushishe kakongye kapya, na bakwetu bapya ababangile kwibunga, pangi nu nshibo ya Lidii mukwetu mukashi sha eyikashi dya kukukila benyi.—Bik. 16:40.

2. Ndukalakashi kinyi lubafumankene nalo kaka kakongye kapya?

2 Mu mafuku apeela, kano kakongye kapya kabapetele lukalakashi. Satana baadi mutakule beshikwanyi ba bya binyibinyi bwabadya kulwisha mudimo wa bulungudi wa bano bena Kidishitu. Abaadi bakwate Mpoolo na Silase, bebakupila nfimbo na kwibela mu lukano. Kunyima kw’abo kwibatusha mu lukano, abayile mu kutala baba balongi bapya na kwibanyingisha. Akupu Mpoolo, Silase, na Timotee abakatukile mu Fidipe, pangi Luka bashele mwanka. Nkinyi kibaadi kano kakongye kapya kakite? Ku bukwashi bwa kikudi kya Yehowa, kabatungunukile nka na kwenda kumpala na kufubila Yehowa. (Fid. 2:12) Mpoolo baadi na kabingilo ka kwikala na muloo pa mwanda wabo!

3. Nka bu byabadi bebileshe mu Beena-Fidipe 1:9-11, nkinyi kibaadi Mpoolo mutekye?

3 Kunyima kwa bipwa pangi ekumi, Mpoolo baadi mufundjile kakongye ka ku Fidipe mukanda. Su obadika wawa mukanda, omono kifulo kibaadi nakyo Mpoolo bwa bakwabo bena Kidishitu. Bafundjile’shi: “Nyi mwinufule anwe boso na kifulo  kikata kya Kidishitu Yesu.” (Fid. 1:8) Baadi mwibafundjile’shi, nkwete kuteka bwenu. Baadi mutekye Yehowa bwadya kwibakwasha bwashi kifulo kyabo kitame, bwabadya kushinguula bintu bina muulo ukata, bekale bashii katoba, bash’abakokosha bangi na batungunukye na kupa kikuba kya kululama. Kushi mpaka, atwe boso atukumiina’shi ano mayi a Mpoolo ngalombene kwitukwasha lelo uno. Byabya, tubadikyeyi bibaadi Mpoolo mufundjile bena Fidipe. (Badika Beena-Fidipe 1:9-11.) Akupu, atutaluula myanda ibaadi mutemune na kutaluula byatudya kwiyitumikila.

TAMISHA KIFULO KYOOBE

4. (a) Muyile 1 Yowano 4:9, 10, Yehowa baadi mwituleshe kifulo naminyi? (b) Mbikunyi abitungu’shi atwe namu tumufule?

4 Yehowa baadi mwituleshe kifulo kikata p’aye kwitutumina Mwana’aye bwadya kwitufwila mwanda wa milwisho yetu. (Badika 1 Yowano 4:9, 10.) Kifulo kikata kya Yehowa akitutakula bwa kumufula. (Lom. 5:8) Mushindo kinyi autungu’shi tufule Efile Mukulu? Yesu balulwile luno lukonko pabalungwile Mufadisee’shi: “Fula Yehowa Efile Mukulu oobe n’eshimba dyoobe dyooso, na kikudi kyoobe kyooso mpaa na kinangu kyoobe kyooso.” (Mat. 22:36, 37) Tatukumiina shi tufule Yehowa na mashimba abidi nya. Kadi atukumiina’shi kifulo kyetu bwaye kikale akitama efuku dyoso. Mpoolo balungwile bena Fidipe’shi abitungu kifulo kyabo “kikishekishe kutama.” Nkinyi akitungu’shi tukite bwa kutamisha kifulo kyetu bw’Efile Mukulu?

5. Kifulo kyetu nkilombene kutama naminyi?

5 Bwa kufula Efile Mukulu abitungu tubande kumuuka. Bible amba’shi: “Yawa shyaafulu mukwabo taauku Efile Mukulu, mwanda Efile Mukulu nyi nkifulo.” (1 Yo. 4:8) Mpoolo mutumibwa bakwile’shi, kifulo kyetu bw’Efile Mukulu akikatama nsaa yatupete ‘kiwukilo na kapatupatu kooso.’ (Fid. 1:9) Pabatubangile kulonga Bible, tubabangile kufula Efile Mukulu sunga byatushibaadi babande kuuka myanda ibungi pabimutale. Patubatungunukile na kulonga pabimutale, kifulo kyetu bwaye kibaadi akyende na kutama. Nyi bwakinyi bi na muulo bwa’shi twikale atwilongyela Eyi dy’Efile Mukulu efuku dyoso na kunangushena ku myanda yatubadika!—Fid. 2:16.

6. Muyile 1 Yowano 4:11, 20, 21, mushindo kinyi watudya kutamisha kifulo kyetu?

6 Kifulo kikata ky’Efile Mukulu akitutakula bwa kufula bakwetu. (Badika 1 Yowano 4:11, 20, 21.) Pangi twi kupwandikisha’shi kufula bakwetu bena Kidishitu nkubofule. Anka, twibafule bakwetu bena Kidishitu mwanda tukwete kulangwila Yehowa na tukwete kwitatshisha bwa kumwambula. Tukwete kwambula kileshesho kya Yesu, aye baadi mutushe mpa na muwa waye mwanda wa kifulo kyaye kikile bukata. Kadi, ingi nsaa bikwitwikela bukopo bwa kukokyela mwiya wa kwifulena. Tutaluuleyi kileshesho kya kakongye ka bena Fidipe.

7. Elango dibaadi Mpoolo mupe Efodi na Sentishe aditulongyesha kinyi?

7 Efodi na Sentishe abaadi abafubu na kisumi “pamune” na Mpoolo mutumibwa. Anka, abaadi pangi bekutwene na bu loole bwabo nkutshibika. Mu mukanda ubaadi mutumine kakongye kaabadi bano bakwetu bakashi, Mpoolo badi mutemune Efodi na Sentishe na kwibapa elango bwa’shi “bepushene.” (Fid. 4:2, 3) Mpoolo baadi dingi mupe kakongye kashima dino elango’shi: “Kitaayi byooso kushii kuunûna sunga kwela mpaka.” (Fid. 2:14, EEM) Kushi mpaka, dino elango dya Mpoolo tadibaadi dikwashe penda bano bakwetu bakashi nya, anka dibaadi dikwashe  kakongye kashima bwakadya kunyisha kwifulena.

Bwakinyi abitungu twikale na mweneno ebuwa pabitale bakwetu? (Tala kikoso 8) *

8. Nkinyi kilombene kwitukutshishwa kufula bakwetu, na mbikunyi byatudya kwikikambila?

8 Nka bu Efodi na Sentishe, ingi nsaa bikwitwikela bukopo bwatudya kufula bakwetu su twayimena penda pa bilubilo byabo. Atwe boso atulwishaa efuku dyoso. Byabya, su twemena pa milwisho ya bakwetu, bikwitwikela bukopo bwa kwibafula. Bu kileshesho, su mukwetu aluba kwitukwasha bwa kusuula Nshibo ya Bufumu, twi kumufitshila munda. Su twabanga kutala penda bingi bilubilo byatuuku bya kala bya yawa mukwetu, atunyisha kumufitshila munda na kifulo kyetu bwaye akitshimbi. Su ofumankana na uno mwanda, bibuwa otentekyeshe’shi: Yehowa amonaa milwisho yetu yoso na ya bakwetu. Sunga byatumulwishishaa, kwete nka kutungunuka na kwitufula atwe boso. Nyi bwakinyi, abitungu twambule kifulo kya Yehowa, na twikale na binangu bibuwa pabitale bakwetu. Nsaa yatwifulena, atunyisha kunyingisha buumune bwetu.—Fid. 2:1, 2.

“KIKILE BYOOSO KU BUUWA”

9. Mu bintu ‘bikile byoso ku buwa’ bibaadi Mpoolo mutemune mu mukanda ubaadi mufundjile bena Fidipe, mwi kinyi?

9 Kikudi ki selele kibaadi kitakule Mpoolo bwadya kupa bena Kidishitu ba mu Fidipe, na bangi boso elango dya “Kushinguula kikile byooso ku buuwa.” (Fid. 1:10) Mu bino bintu bikile ku buwa mwi kwikasha eshina dya Yehowa di selele, kukumbana kwa milayilo yaye, butaale na buumune mu kakongye. (Mat. 6:9, 10; Yo. 13:35) Su bino bintu byekala na muulo mu nshalelo etu, atulesha’shi twibafule Yehowa.

10. Nkinyi akitungu’shi tukite bwa kumweneka bu batookye selele?

10 Mpoolo baadi dingi mwakule’shi abitungu twikale “batookye selele.” Bino tabilesha’shi abitungu twikale bapwidikye nya. Tatwibalombene kwikala batookye selele bu Yehowa nya. Anka, Yehowa aketumono bu batookye selele su atukitshi mwetu moso bwa kutamisha kifulo kyetu na patukitshi bintu bikile byoso ku buwa. Kipaso kyatudya kulesha kifulo kyetu mpa kupela kukokosha bakwetu.

11. Bwakinyi abitungu tupele kukokosha bakwetu?

11 Eyi dya kulonda dya kupela kukokosha bangi di na muulo ukata. Twi kukokosha bangi naminyi? Twi kukokosha bangi mu mushindo wetu wa kukisha kapapi, nfwadilo etu, sunga patusangula mudimo. Pangi kyatukitshi takii bubi nya. Kadi, su byatukitshi abikokosha kondo k’eshimba ka ungi mukwetu, mmwanda wibubi. Yesu bakwile’shi su twa kokosha mukwetu bilombeene’shi alwisha kipwano kyaaye na Yehowa, bibuwa betwanye ebwe dikata mu nshingo na kwitwela mu kalunga!—Mat. 18:6.

12. Kileshesho kya ba mulume na mukashi ba mbala-mashinda akitulongyesha kinyi?

12 Tala bibaadi bangi ba mulume na mukashi ba mbala-mashinda batumikile elango dya Yesu. Abaadi mu kakongye na ungi mulume na mukashi bakyabakatuka mu kubatshishibwa na bakudile mu bifuko bibaadi na miiya ikilekile. Bano ba mulume na mukashi abaadi abauku’shi mwina Kidishitu tamulombene kubandjila ma filme sunga ekala ebuwa. Abaadi bakalakashwe pakumona bano ba mbala-mashinda abatala filme. Kunyima kwa byabya, bano ba mbala-mashinda abalekyele kwenda mukutala filme, mpa na pabaadi bano ba mulume na mukashi balongyeshe kondo kabo k’eshimba na kushingula kibuwa na kibubi. (Eb. 5:14) Pabo kukita byabya, bano ba mulume na mukashi ba mbala-mashinda abaadi baleshe’shi mbafule bano ba mulune na  mukashi bakibaadi abakatuka mu kubatshibwa kushi penda mu ngakwilo kadi mu bikitshino.—Lom. 14:19-21; 1 Yo. 3:18.

13. Mbikunyi byatudi balombene kutakula mukwetu mu kukita mulwisho?

13 Ungi mushindo watudi balombene kukokosha mukwetu nyi kumutakula mu kukita mulwisho. Bi kukitshika naminyi? Banda kunangushena uno mwanda. Munda mwa mafuku ebungi, ungi mulongi a Bible baadi etatshisha bwa kuleka kutoma malwa, mpa na bibobeesha kuleka kwiatoma. Bamono’shi abitungu alekye kwiatoma bwa loso. Bashintuula myanda ibungi mu muwa waye na babatshishibwa. Mwenda mafuku, ungi mwina Kidishitu bamwitamina ku musangeelo na ba mupa malwa na kumulungula’shi: “Binobino todi mwina Kidishitu; we na kikudi kya Yehowa. Kimune kya ku kikuba kya kikudi ki selele nyi mbutontshi bwa mbidi. Su wekala na butontshi bwa mbidi, wekala na ngobesha ya kutoma tupela.” Nangushena kilombene kukitshika su uno mukwetu alonda dino elango dibubi!

14. Mushindo kinyi a witukwasha bisangilo byetu bwa kutumikila malango e mu mukanda wa Beena-Fidipe 1:10?

14 Bisangilo byetu abitukwasha bwa kutumikila elango di mu mukanda wa beena-Fidipe 1:10 mu mishindo ibungi. Wa kumpala, programe a bidibwa bya mu kikudi, etutentekyesha bintu bi na muulo ku meso kwa Yehowa. Wa kabidi, atulongo bya kutumikila byatulongo bwa kwikala batookye selele. Na wa kasatu, atwinyingiishena “mu kifulo na mu mifubo ibuwa.” (Eb. 10:24, 25) Nsaa ayitunyingisha bakwetu, kifulo kyetu bwa Yehowa  na bwa bakwetu akinyisha kutama. Patufulu Yehowa na bakwetu n’eshimba dyetu dyoso, atukakitshi mwetu moso bwa kupela kukokosha bakwetu.

TUNGUNUKA NA ‘KWIKALA MUULE NDAA NA KIKUBA KYA KULULAMA’

15. ‘Kwikala bawule ndaa na kikuba kya kululama’ akulesha kinyi?

15 Mpoolo baadi asambila n’eshimba dyaye dyoso bwa’shi bena Fidipe ‘bawule ndaa na kikuba kya kululama.’ (Fid. 1:11) Eyendo’shi mu kino ‘kikuba kya kululama’ mwi kifulo kyabo bwa Yehowa na mwilo waye. Bino mbitale dingi mpà na kulungula bangi pabitale lukumiino lwabo mwi Yesu mpa na lukulupilo lwabo lukile buwa. Mu Beena-Fidipe 2:15 mwi kingi kileshesho kya ‘kwilesha bu bimunyi by’etaata pano pa nsenga.’ Kyakya kileshesho, akitutentekyesha bibaadi Yesu etamina balongi baye “bwitâta adimunyika ba pano pa nsenga.” (Mat. 5:14-16, EEM) Balungwile balongi baye bwabadya “kwikasha bantu bu balongi,” na bebalwingwile dingi’shi ‘abekala tumonyi . . . mpaa na kufudiile nsenga.’ (Mat. 28:18-20; Bik. 1:8) Tukwete kupa “kikuba kya bululame” nsaa yatukitshi uno mudimo wi na muulo muyile ngobesha yetu.

Pabaadi mu lukano mu Looma, Mpoolo baadi mufundjile kakongye ka mu Fidipe mukanda. Dingi baadi akitshi mwaye moso bwa ku lambukisha basalayi abaadi abamulama, na bantu abaadi abafiki mu ku mutembela (Tala kikoso 16)

16. Mukanda wa Beena-Fidipe 1:12-14 aulesha naminyi’shi twi balombene kutemba bu bimunyi sunga twekala na nkalakashi mu nshalelo etu? (Tala kifwatulo ki ku kipusu.)

16 Sunga twekala na nshalelo e naminyi, twi balombene kutemba bu bimunyi. Ingi nsaa, kyakya akimweneka bu kilombene kwitukutshishwa kulungula mukandu wibuwa, ki kwitupa mushindo wa kwiulungula. Bu kileshesho, Mpoolo mutumibwa baadi mu lukano mu Looma pabadi mufundjile bena Fidipe mukanda. Kadi, nkano ibabadi bamwanye tayibadi imukutshishwe kulungula mukandu wibuwa kwi basalayi abaadi abamulama na bantu babadi abafiki kwadi nya. Mpoolo badi alungula na kisumi mu luno lukalakashi, na bino  bibadi binyingishe bakwetu na kwibapa bukome bwa “kulungula mukandu w’Efile Mukulu kushi mô.”—Badika Beena-Fidipe 1:12-14, EEM; 4:22.

Ikala Okimbi nsaa yoso mushindo wa kwipana mu bulungudi(Tala kikoso 17) *

17. Mbikunyi bilombene bangi bakwetu kutungunuka na kulungula mukandu wibuwa sunga bekala mu nkalakashi?

17 Bakwetu balume na bakashi be na mushindo wa kulonda kileshesho ky’eshimba dinyingye dya Mpoolo. Mwanda mbashale mu maumbo mwabashii na mushindo wa kulungula patooka sunga ku nshibo na nshibo, nyi bwakinyi abakimbi ingi mishindo ya kulungula mukandu wibuwa. (Mat. 10:16-20) Mu dimune dya ku ano maumbo, mukunkushi a kifunda badi mutushe binangu bya’shi mulungudi oso alungule mu “teritware” aye bupenka mwi bena kifuko naye, bekungishanyi naye, bena kalasa naye, bena mudimo naye, na bantu beukena nabo. Munda mwa bipwa bibidi, bungi bwa tukongye twa mu kyakya kifunda bubafwimine. Pangi twi na bulungantu bwa kulungula mukandu wibuwa. Byabya, twi kupeta dilongyesha dikata ku kileshesho kya bakwetu balume na bakashi: twikale atukimbi mishindo ya kwipana mu bulungudi, bashinkamishe’shi Yehowa etupa bukome bwatudi nabo lukalo bwa kukambila bitompwanga.—Fid. 2:13.

18. Abitungu twikale na kitshibilo kinyi?

18 Binobino, twateyi kitshibilo kya kutumikila elango di mu mukanda wa Mpoolo kwi bena Fidipe. Tutaluleyi bintu bi na muulo, twikale kushi katoba, tushikwe kukokosha bangi, na tupe kikuba kya kululama. Paapa kifulo kyetu akitama na atutumbisha Nshetu a kifulo, Yehowa.

LOONO 17 “Nakumiina”

^ par. 5 Mu ano mafuku, nyi amutungu’shi tutamishe kifulo kyetu bwa bakwetu bena Kidishitu kukila angi mafuku oso. Mukanda wa Beena-Fidipe awitukwasha bwatudya kutamisha kifulo kyetu sunga nsaa yabidi bukopo.

^ par. 54 BI MU BIFWATULO: Pabakwete kusuula mu Nshibo ya Bufumu, mungi mukwetu, Joe, balekye kufuba bwa kwisamba na mukwetu na mwana aaye. Mike kwete kwenda na kukolopa bafiitshi munda. Amba’shi, ‘abitungu Joe afube pamutwe pa kwisamba.’ Kunyima, Mike bamono mushindo wi Joe akwasha mukwetu mukashi bapu kununupa na kalolo kooso. Uno mwanda wibuwa ubamono ubatentekyesha Mike byadya kunangushena pabitale ngikashi ibuwa ya mukwabo.

^ par. 58 BI MU BIFWATULO: Mwiumbo mushii ba Temwe na mushindo wa kulungula patooka, mukwetu esamba mu bufyefye na muntu eukena naaye. Kunyima, mu nsaa ya kwikisha paadi ku mudimo, mukwetu atusha bu kamonyi kwi mwina mudimo naaye.