Enda bwa kuleshe myanda i mwanka

Enda bwa kuleshe kashibo ka myanda i mwanka

 MWISAMBO WA KULONGA 24

Ponesha kinangu kyoso kikutwene na kyukilo ky’Efile Mukulu!

Ponesha kinangu kyoso kikutwene na kyukilo ky’Efile Mukulu!

‘Atuponesha nangunangu na kwitatula kooso akwikamisha ku kyukilo ki’Efile-Mukulu.’—2 KOD. 10:5, Esambi dipya 2015.

LOONO 124 Twikale na lulamato

MYANDA I MWANKA *

1. Mmayi kinyi a kudimusha abaadi Mpoolo mutumibwa mufundjile bena Kidishitu bedibwe mwimu?

“TANWAMBULANGA mwikêlo wa ba pano pa nsenga.” (Lom. 12:2, EEM) Ano mayi a kudimusha, Mpoolo baadi mwiafundile bena Kidishitu ba mu siekele a kumpala. Bwakinyi baadi mufunde ano mayi bwa balume na bakashi abaadi belambule kwi Efile Mukulu na abaadi bedibwe mwimu ku bukwashi bwa kikudi ki selele?—Lom. 1:7.

2-3. Satana atompaa kwitwikasha kula na Yehowa naminyi, kadi mbikunyi byatudya kukatusha myanda ibubi “ishimate ngofu” mu binangu byetu?

2 Mpoolo baadi ekalakasha mwanda bangi bena Kidishitu, abaadi abalondo binangu bibubi na malongyesha a bantu a mu ndumbulwilo a Satana. (Ef. 4:17-19) Bino bi kufwila oso a kwatudi. Satana nfumu a uno ndumbulwilo, kwete kufubisha mayele elekene bwa kwitwikasha kula na Yehowa. Bu kileshesho, su atukumiina kwiata na muulo ukilekile sunga kwenda nkumo, e kufuba na byabya binangu bwa kwitwikasha kula na Yehowa. E kufuba dingi na myanda yatudi balongye kwetu ku nshibo, ku kalasa, na kwi bantu betwifunyishe bwa kwitutakula mu kunangushena mu kipaso kyakumiina’shi tunangushene.

3 Mbibofule bwatudya kukatusha myanda “ishimate ngofu” mu binangu byetu su? (2 Kod. 10:4, NWT) Pusha bibalulwile Mpoolo: “Atuponesha nangunangu na kwitatula kooso akwikamisha  ku kyukilo ki’Efile-Mukulu. Atutonto binangu byooso bwa kwibifisha ku kukokyela Kidishitu.” (2 Kod. 10:5) Eyendo, ku bukwashi bwa Yehowa, twi balombene kutonta binangu byoso bibubi. Nka bu bilombene bwanga kukatusha mitanyo ayitukila ku bulembe, Eyi dy’Efile Mukulu di kwitukwasha bwa kukatusha bukitshishi bwibubi bwa ndumbulwilo a Satana.

“KUKIMBA BINANGU BIPYA”

4. Bebungi ba kwatudi mbashintuule myanda kinyi pababadi bakumiine bya binyibinyi?

4 Banda kutentekyesha myanda ibodi mushintuule pobokumiinyine bya binyibinyi bya mu Eyi dy’Efile Mukulu bwa musango wa kumpala, na kwata kitshibilo kya kufubila Yehowa. Bebungi ba kwatudi abaadi balekye kukita myanda ibubi bwa kufubila Yehowa. (1 Kod. 6:9-11) Twi na lutumbu lukata kwi Yehowa p’aye kwitukwasha bwa kukambila yaya myanda ibubi!

5. Mbintu kinyi bibidi bi mu Beena-Looma 12:2?

5 Anka, tatupwandikishanga’shi, tatwi na lukalo lwa kushintuluka nya. Sunga byekala’shi twi balekye kukita milwisho ikata ibatudi atukitshi kumpala kwa kubatshishibwa, abitungu twitatshishe bwa kusuuka kintu kyoso ki kwitutakula mu kukita dingi yaya milwisho. Twi kwibikita naminyi? Mpoolo aluula’shi: “Tanwambulanga mwikêlo wa ba pano pa nsenga, anka nulekyêle Efile Mukulu kwalûla mwikêlo wenu pa kwinupa binangu bipya.” (Lom. 12:2, EEM) Abitungu tukite bintu bibidi. Kya kumpala, abitungu tulekye ‘kwambula mwikêlo wa ba pano’ sunga binangu bya uno ndumbulwilo. Kya kabidi, abitungu “kwalula mwikêlo” pa kushintuula ngelelo eetu a binangu.

6. Atupete dilongyesha kinyi ku mayi abakwile Yesu e mu mukanda wa Mateo 12:43-45?

6 Kwaluluka kubadi akwakula Mpoolo nkwilekeene na kushintuluka kwa byatumweka. Nkutale myanda yetu yooso. (Tala kashibo akamba shi: “ Twi bashintulukye su atwidimbi bu bashintulukye?”) Abitungu tushintuule binangu byetu byoso, bi mu mashimba eetu  na byatupusha. Byabya, ooso a kwatudi e na kya kwiyipusha’shi: ‘Kushintuluka kwande bwa kufika mwina Kidishitu, nkutale penda byamweneka kwi bangi su ne mwina Kidishitu a binyibinyi mwishimba na mu binangu?’ Abitungu tuleshe kwilekeena. Mu mayi abaadi Yesu mwakule mu mukanda wa Mateo 12:43-45, Yesu balesheshe kyatudi balombene kukita. (Badika.) Ano mayi aetupa dilongyesha dikata: T’abitungu penda kukatusha binangu bibubi nya, abitungu tusuukye binangu byoso bishii mu kwipushena na by’Efile Mukulu.

“NWIKALE BAPYA MU KWALULUKA KWA MPÀNGO YA MU BINANGU BYENU”

7. Twi balombene kushintula eshimba na binangu byetu naminyi?

7 Twi balombene kwalula binangu byetu na kushintula bumuntu bwetu bufwame su? Eyi dy’Efile Mukulu adyalula’shi: “Abikyebe’shi nwikale bapya mu kwalulula kwa mpàngo na mu binangu byeenu, nufwale muntu mupya mupangiibwe ku kifwatulo ky’Efile Mukulu mu bululame na bwiselele bwa mu biinyibiinyi.” (Ef. 4:23, 24) Eyendo’shi, twi balombene kushintuluka, anka ta mbibofule bwa kwibikita nya. Abitungu twitatshishe bikata, kushii penda kukambila binangu bibubi na kuleka kwa kukita bibubi nya. Abitungu tushintuule “mpàngo ya mu binangu” byetu. Bino abilesha kushintuula nkalo yetu, mwikeelo wetu na akitutakula mu kukita kintu kampanda. Bino abitekye kwitatshisha nsaa yooso.

8-9. Mwanda ubadi ufikile ungi mukwetu aulesha naminyi’shi abitungu tushintuule kyatudi munda?

8 Tubandeyi kutala kileshesho kya mukwetu mulume badi na mwikeelo wa bu ntomboshi. Kunyima kwa’ye kwimika kutoma na kulwa ngoshi, badi mulombashe myanda itekiibwe bwa kubatshishibwa, abyo nkutusha bu kamonyi bukile buwa mu kibundji kibadi mushale. Kadi dingi efuku ku kyolwa, mafuku apela naye kubatshibwa, badi mutompibwe mu kipaso kyashibadi atengyela nya. Ungi muntu badi mukolwe bafikile kwaye ku nshibo abanga kukimba kulwa naye ngoshi. Ku mbangilo, uno mukwetu bapelele kulwa. Kadi pababangile yawa muntu mukolwe kwakula bibubi pabitale eshina dya Yehowa, mukwetu mulume bafiitshile munda bikile mu kipaso kibakutshilwe kupoosha nsungu yaaye. Aye nkukupila yawa muntu badi mukolwe. Bwakinyi bakitshine byabya? Sunga byekala’shi kulonga kwaye kwa Bible kubamukwashile bwa kuleka kulwa ngoshi, tabadi mubande kwikala na ngobesha ya kushintuula mpàngo ya mu binangu byaye nya. Mu ungi ngakwilo, tabadi mushintuule bumuntu bwaye bufwame nya.

9 Sunga mbyabya, uno mukwetu t’abakokyele nya. (Nki. 24:16) Ku bukwashi bwa bakulu, badi mutungunukye na kushintuluka. Badi mpa na mufikye bu mukulu mu kakongye. Akupu dingi efuku ku kyolwa pabadi pasha pa Nshibo ya Bufumu, badi mufumankane na mwanda wi mumune na ubaadi mupete takudi bipwa. Ungi muntu mukolwe badi akyebe kukupila mukulu umune a mu kakongye. Uno mukwetu bakitshine kinyi? Na kwiyisha kooso, badi munangushene na yawa muntu mukolwe, aye nkufukamisha binangu byaye na kumukwasha bwadya kufika ku nshibo yaaye. Bwakinyi uno mukwetu bakitshine bilekeene na bibakitshine musango wa kumpala? Mwanda’shi mukwetu badi mushintule mpàngo ya mu binangu byaye. Bafikile binyibinyi muntu sha butaale na muntu mwiyishe. Bino bibadi bitumbishe Yehowa!

10. Nkinyi akitungu’shi tukite bwa kushintuula bi mwishimba dyetu?

10 Kuno kushintuluka t’akukitshikaa bukidibukidi sunga kushii kwitatshisha nya. Abitungu tukite ‘bukopo bwetu booso’ munda mwa bipwa bibungi. (2 Mp. 1:5, Esambi dipya) Kuno kushintuluka t’akukitshika penda mwanda wa’shi, tubapu kukita mafuku ebungi na kufubila  Yehowa nya. Abitungu twitatshishe bikata bwa kushintuula bi mwishimba dyetu. Kwi myanda kampanda i na muulo yatudi balombene kukita bwa kushintuluka. Tubadeyi kutalula ingi ya ku yanka.

KYATUDYA KUKITA BWA KUSHINTUULA MPÀNGO YA MU BINANGU BYETU

11. Luteko lwi kwitukwasha bwatudya kushintuula mpàngo ya mu binangu byetu naminyi?

11 Kwela luteko nyi kintu kya kumpala ki na muulo kyatudya kukita. Abitungu tutekye nka bu bibatekyele mufundji a misambo’shi: “Efile Mukulu panga eshimba diiselele munda mwande, otweshe kikudi kipya munda mwande.” (Mis. 51:12) Abitungu tushinguule’shi twi na lukalo lwa kushintuula mpàngo ya mu binangu byetu, na kuteka Yehowa bwa’shi etukwasha. Twi kushinkamisha naminyi’shi, Yehowa etukwasha bwatudya kushintuluka? Twi kunyingishibwa pa kupusha bibadi Yehowa mulee bena Isaleele abadi na mashimba apape mu mafuku a Esekyele shi: “Neebapa eshimba dya bululame, naatuulu munda mwenu kikudi kipya . . . na neebapa eshimba dya mbidi” adilondo buludiki bw’Efile Mukulu. (Esek. 11:19) Yehowa badi akumiina kukwasha bena Isaleele bwabadya kushintuluka, na akumiina kwitukwasha naamu.

12-13. (a) Muyile Misambo 119:59 bwakinyi abitungu’shi tunangushene? (b) Nkonko kinyi yodya kwiyipusha?

12 Kunangushena nyi nkintu kya kabidi ki na muulo kyatudya kukita. Nsaa yatubadika na kishima Eyi dy’Efile Mukulu efuku dyoso, abitungu twate nsaa ya kunangushena bwa kutundula binangu sunga mweneno a myanda atudya kushintuula. (Badika Misambo 119:59; Eb. 4:12; Shak. 1:25) Abitungu tutundule binangu na mpushiisho ooso e kwitutakula ku binangu bya uno ndumbulwilo. Twi na kya kukumina n’eshimba dyetu dyoso kubofula kwetu na kufuba ngofu bwatudya kwikupwa.

13 Bu kileshesho we kwiyipusha’shi: ‘Ne kwikala na lwabi sunga mukao mwishimba mwande su?’ (1 Mp. 2:1) ‘N’epushaa bu’mi e buwa kukila bangi ku mwanda wa kabila kande, byandji mulongye sunga bupeta bwandji nabo su?’ (Nki. 16:5) ‘Namonaa bangi bashii ba kabila kande na bashii na bintu byandji nabyo bu bashadile kwandji su?’ (Shak. 2:2-4) ‘Nalakilaa bintu bi mu ndumbulwilo a Satana su?’ (1 Yo. 2:15-17) ‘Nasankilaa maasha e na myanda ibutete sunga y’etombo su?’ (Mis. 97:10; 101:3; Am. 5:15) Ngaluulo yotusha ku ino nkonko ngilombene nkukwasha bwa kuuka kyodi mulombe kwitatshisha bwa kukita. Su twi na ngobesha ya kushintuula bino binangu bibukopo ‘bishimate mwatudi,’ atukyebe kusangasha Nshetu e mwiyilu.—Mis. 19:14.

14. Bwakinyi kusangula ba kuuku bebuwa kwi na muulo?

14 Kusangula ba kuuku bebubwa nyi nkintu kya kasatu ki na muulo. Byatwibitundula sunga kukutwa kwibitundula, bakuuku betu be na bukitshishi bukata kwatudi. (Nki. 13:20) Ku mudimo sunga ku kalasa, twi befunyishwe na bantu bashi balombene kwitukwasha bwatudya kwikala na mweneno a myanda a Efile Mukulu. Anka, twi balombene kupeta ba kuuku bebuwa ku bisangilo byetu bya bwina Kidishitu. Kwakwa, twi balombene kwinyingishena “mu kifulo na mu mifubo iibuuwa.”—Eb. 10:24, 25.

IKALAYI ‘BANYINGYE MU LUKUMIINO’

15-16. Satana apimaa kushintula ngyelelo eetu a binangu naminyi?

15 Tentekyesha shi Satana e na kitshibilo kya kushintuula ngyelelo eetu a binangu. Kwete kufubisha bintu byoso bwa kukatusha mweno e buwa a mu Eyi dy’Efile Mukulu atudi naye.

16 Satana kwete kutungunuka na kwipusha lukonko lumune lubayipwishe Eeva mu lupango lwa Edene’shi: “Eyendo Efile Mukulu mwinulungule shi . . . ?” (Kib. 3:1) Mu ndumbulwilo akunkushiibwa na Satana, atukambaa kupusha nkonko ayitusha mpaka ku byatukumiina bu’shi:  ‘Eyendo shi Efile Mukulu t’akumina eyibakishi dya balume na balume sunga bakashi na bakashi? Eyendo shi Efile Mukulu t’akumiina osankila Nowele sunga efuku dyobe dya kutandjika? Eyendo shi Efile Mukulu akumiina bwashi opele kwedibwa mase? Eyendo shi Efile Mukulu akumiina bodya kutshiba kipwano na muntu odi mufule abadi batushe mu kakongye?’

17. Abitungu tukite kinyi su muntu etwipusha nkonko ayitwesha mpaka pabitale lukumiino lwetu, na muyile Beena-Kolose 2:6, 7 nkinyi kilombene kukitshika?

17 Abitungu twikale bashinkamishe myanda yatukumiina. Mwanda su t’atupete ngaluulo ku nkonko i na muulo pabitale nkumiino yetu, twi balombene kwelesha mpaka ku myanda yatukumiina. Yaaya mpaka i kubanga kulwisha ngyelelo eetu a binangu na lukumiino lwetu. Su bi byabya, nkinyi kyatudi balombene kukita? Eyi dy’Efile Mukulu aditulungula bwatudya kushintuula binangu byetu bwa’shi tushinkamishe’twe banabene “kyakya kibuwa, kyakya kimulongamine [Efile Mukulu] na kyakya kipwidikye.” (Lom. 12:2) Pa kwilongyela nsaa yoso, atwikala bashinkamishe bya binyibinyi byatudi balongye mu Bible. Atushinkamisha dingi’shi miiya ya Yehowa i buwa. Paapa, nka bi mutshi wi na mishi ibukopo, atukeekala bashimate bibukopo na “banyingye mu lukumiino.”—Badika Beena-Kolose 2:6, 7.

18. Nkinyi kilombene kwitukwasha bwatudya kwikalwila ku bukitshishi bwa ndumbulwilo a Satana?

18 Takwi muntu mulombene kunyingisha lukumiino lwetu pa mbalo yetu. Byabya, tungunuka na kwiyikasha muntu mupya mu kwalula kwa mpàngo ya mu binangu byobe. Ikala otekye nsaa yoso bukwashi bwa kikudi kiselele kya Yehowa. Nangushena ngofu na kutungunuka na kutaluula binangu byobe. Kimba ba kuuku bebuwa, ikala mwifunyishwe na bantu balombene nkukwasha bwa kushintuula ngyelelo oobe a binangu. Su bokitshi byabya, okekalwila ku bukitshishi bwa uno ndumbulwilo a Satana na kuponesha “nangunangu na kwitatula kooso akwikamisha ku kyukilo ki’Efile-Mukulu.”—2 Kod. 10:5.

LOONO 50 Luteko lwa kwilambula

^ par. 5 Kulonga tulasa, bipikwa byetu sunga mbalo yatudi bashale, bi na bukitshishi bwibuwa sunga bwibubi mu binangu byetu. Twi kumona’shi twi balamate ngofu ku binangu kampanda bibubi na’shi bibukopo bwatudya kwibileka. Uno mwisambo aulesha byatudya kukambila binangu bibubi byoso byatudi nabyo.