Enda bwa kuleshe myanda i mwanka

Enda bwa kuleshe kashibo ka myanda i mwanka

 MWISAMBO WA KULONGA 21

Todimbibwanga na “binangu bya ba pano”

Todimbibwanga na “binangu bya ba pano”

“Binangu byaa baa pano nkulootakana ku meeso eEfile Mukulu.” —1 KOD. 3:19.

LOONO 98 Bifundwe—mbiyokyelwe n’Efile mukulu

KYABAKWILA MWANKA *

1. Eyi dy’Efile Mukulu aditupa kinyi?

TWI balombene kupudisha lukalakashi loso lwalwa—mwanda Yehowa Mmulongyeshi eetu Mukata. (Yesh. 30:20, 21) Eyi dyaye aditupa byoso byatudi nabyo lukalo bwa’shi twikale ‘bakumbane’ na twikale ‘bakumbanyinyiine bwa mufubo ooso wi buwa.’ (2 Tim. 3:17) Nsaa yatudi na nshalelo mwipushene na malongyesha a mu Bible, atwikala basha binangu, kukila bano abamba shi atulondo “binangu bya ba pano pa nsenga.”—1 Kod. 3:19; Mis. 119:97-100.

2. Nkinyi kyatukyebe kulonga mu uno mwisambo?

2 Nka bu byatukyebe kwibimona, binangu bya pa nsenga abitukaka ku nkalo yetu ya mbidi. Byabya, twi kumona shi bibukopo bwatudya kukambila binangu na bikitshino bya bantu ba pa nsenga. Nyi bwakinyi, Bible amba shi: “Dimukai muntu tenukwatanga ku muteo ku mîsambo ya bisumanga aitûku ku binangu bya bantu.” (Kol. 2:8, EEM) Mu uno mwisambo, atutaluula mushindo ubaadi bantu babangye kukumiina madimi abidi a Satana. Mu mwanda oso, atukyebe kumona bwakinyi binangu bya ba pano pa nsenga bi bu kulotakana, na bikale binangu bya Mwiyi dy’Efile Mukulu bikile kintu kyoso kyatudi balombene kupeta mu uno ndumbulwilo.

KUSHINTULUKA KWA MWENENO A BANTU PABITALE KWIFIKENA PEEPI KWA MULUME NA MUKASHI

3-4. Mu kipindji kya kumpala kya siekele a 20, mweneno a bantu pabitale kwifikeena peepi kwa mulume namukashi baadi mushintulukye naminyi mu Etats-Unis?

3 Mu États-Unis, mu kipindji kya kumpala kya siekele a 20, mweneno a bantu bwa miiya itale kwifikena peepi kwa mulume na mukashi, baadi mushintulunkye bikata. Kumpala bantu abaadi abakumiina shi, nka penda bantu beyibakishene nyi  bakumbene kwifikena peepi, na bibaadi bufu kwakula yaya myanda pe bantu. Kadi yaya miiya ibapoone, na mweneno e bubi nkupalakana.

4 Mu kipindji kya kasatu kya siekele a 20, bantu abaadi batuule binangu byabo nka ku miloo na makuta, na mweneno aabo pabitale kwifikena peepi kwa mulume na mukashi, baadi mushintulukye ngofu ku nfudiilo kwa Ngoshi ya kumpala ya nsenga ishima. Ungi muntu akimbuulaa myanda amba shi: “Mu ma filme, maasha, ngono, mikanda na mu ma piblisite, ababangile kulesha bintu bya bantu abakitshi myanda ibutete.” Mu aa mafuku, bantu ababangile kusha masha aalesha myanda ibutete, na nfwadilo aabo baadi mulwile ngofu. Bible baadi mutemukye pabitale mafuku a ku nfudiilo’shi, bantu abakekala “bafule milòo ya mbidi.”—2 Tim. 3:4, EEM.

Bafubi ba Yehowa tabakwete kukunkushibwa na miiya ibubi ya uno ndumbulwilo itale mwikelo (Tala kikoso 5) *

5. Mu bipwa 1960, mweneno a bantu pabitale miiya itale mwikelo wibuwa baadi mushintulukye naminyi?

5 Mu bipwa 1960, bantu bebungi ababangile kushala pamune bu ba mulume na mukashi kwabashii beyibakishene, kwiyibakishena ba mulume na mulume sunga mukashi na mukashi, na kwipaa dibaka kushii mwanda. Mishindo ibungi ya kukisha kapapi ibaadi nka na myanda ibutete. Bino byoso mbitushe bipeta kinyi? Ungi mufundji bambile’shi, nsaa i bantu abapele kulonda “miiya itale kwifikena peepi kwa mulume na mukashi,” byabya abitushaa nkalakashi bu: Kwilekena kwa ba mulume na mukashi, kushala na penda muledi umune mu kifuko, kupeta nkalakaashi ya mu binangu, kwipana mu kubandjila kwa pornografi sunga ingi nkalakashi i byabya. Kupalakana kwa mikumbo ayitukila mu kutambuka kwa lusandji bu, SIDA abishinkamisha binyibinyi’shi binangu bya ba pa nsenga tabi na muulo.—2 Mp. 2:19.

6. Ba pa nsenga be na mweneno kinyi pabitale kwifikena peepi kwa mulume na mukashi na abilombasha mpàngo kinyi ya Satana?

6 Mweneno a ba pa nsenga pabitale kwifikena peepi kwa mulume na mukashi, nyi yawa abadi naye kwi Satana. Kushi mpaka, akumina kumona bantu abata kwifikena peepi kwa mulume na mukashi bilekene na mpango y’Efile Mukulu, na pa kukita kwa byabya, abakutwa kunemeka kya buntu kya dibaka kyabadi bape bantu kwi Efile Mukulu. (Ef. 2:2) Kutambuka kwa lusandji, t’akubepuula penda kya buntu kya Yehowa kitale kutanda nya, anka akukutshishwa bantu abatambuka lusandji bwa kupeta muwa wa ikalaika.—1 Kod. 6:9, 10.

MWENENO A BIBLE PABITALE KWIFIKENA PEEPI KWA MULUME NA MUKASHI

7-8. Bwakinyi mweneno a Bible pabitale kwifikena peepi kwa mulume na mukashi e buwa kukila mweneno a ba pa nsenga?

7 Bantu abakumina binangu bya uno ndumbulwilo  bakwete kubepuula miiya ya mu Bible itale mwikelo wibuwa, abeamba’shi be na nkatshinkatshi. Bantu be byabya mbalombene kwiyipusha’shi: ‘Bwakinyi Efile Mukulu betupangile na malaka a kwifikena peepi akupu etulungula’shi twilame?’ Bakwete kwela ino nkonko mwanda abedimbi pa kupwandikisha’shi su bantu abakumina kukita kintu kampanda mbalombene kwikita. Anka Bible akula bilekene na byabya. Etulungula’shi t’abitungu tukookyele abitutumu malaka atudi nao, anka twi na ngobesha ya kulwa na binangu bya kukita bibubi. (Kol. 3:5) Dingi, Yehowa mmupe bantu kya buntu kya dibaka, mbalo ilombane bwa kupudisha malaka a kwifikena peepi. (1 Kod. 7:8, 9) Mu uno mushindo, mulume na mukashi mbalombene kwifikena peepi kushi kenyongoshi akatukila mu kutambuka kwa lusandji.

8 Mu kwilekena na binangu bya ba pa nsenga, Bible etupa mweneno ebuwa pabitale kwifikena peepi kwa mulume na mukashi. Amba’shi kwifikena peepi kwa mulume na mukashi akupeyaa bantu muloo. (Nki. 5:18, 19) Dingi, Bible amba’shi: “Ooso a kwatudi ayibakile aaye mukashi bwa kushaala mu bwiselele na mu kinemo, kushii kwikala na malaka bu ee nao bantu bisumanga bashabauku Efile Mukulu.”—1 Tes. 4:4, 5.

9. (a) Mu siekele a 20, mwilo wa Yehowa ubadi unyingishe bantu naminyi pabitale kulonda binangu bikile buwa bi Mwiyi dy’Efile Mukulu? (b) Elango kinyi dibuwa adisanganyibwa mu 1 Yowano 2:15, 16? (c) Muyiile byabidi mu Beena-Looma 1:24-27, mbikitshino kinyi bibutete byatusha kwambula?

9 Mu siekele a 20, mwilo w’Efile Mukulu taubadi udimbibwe na mweneno a baaba abaadi ‘bepâne mu bukitekite.’ (Ef. 4:19) Babatompele kulamata ku miiya ya Yehowa. Kitenta kya Mulami 15/05/1926, kibadi kileshe’shi, “mulume sunga mukashi abitungu ekale mwilame na e selele mu binangu na mu bikitshino, bikishekishe nsaa yadi na muntu shi mulume sunga mukashi naye.” Kukatusha bikwete kukitshika mu nsenga lelo uno, mwilo wa Yehowa ukwete kulonda binangu bikile buwa bi Mwiyi dy’Efile Mukulu. (Badika 1 Yowano 2:15, 16.) Twi na lutumbu lukata bw’Eyi dy’Efile Mukulu! Twi na lutumbu lukata kwi Yehowa mwanda mwitupe bidibwa bya mu kikudi abitukwasha bwa kukambila binangu bya ba pa nsenga pabitale mwikelo wibuwa. *Badika Beena-Looma 1:24-27.

KUSHINTULUKA KWA MWENENO A BANTU PABITALE KWIATA NA MUULO

10-11. Bible mmudimushe bantu pabitale myanda kinyi ayikitshika mu mafuku a ku nfudiilo?

10 Bible badi mudimushe’shi mu mafuku a ku nfudiilo bantu abekala “befule abo banabeene.” (2 Tim.3:1, 2) T’abitukanyisha pa kumona ba pa nsenga abanyingisha kwikala na binangu bya kwifula nya. Ungi mukanda aulesha’shi, mu bipwa bya 1970 na kukila paapa “kubadi mikanda ibungi ibaadi ayikwatshishena binangu bya kwifula.” Ingi mikanda “ayitakula abeyibadika bwa kuuka na kukumina binangu bya kwifula na kwitatula muyile byabadi.” Banda kutala kileshesho kya mwanda ubabadi baleshe mu wawa mukanda: “Efule obe nabene mwanda we buwa kukila bangi bantu boso.” Wawa mukanda aulesha’shi, “muntu mmulombene kwiatshila kitshibilo kya kukita kyakya kyakumina kwikala, na kukita kyakya kyamono’shi kibuwa na kilombane.”

11 Tobopushishe bino binangu su? Satana balungwile Eeva bwashi akite kintu ki byabya. Bambile’shi: “Ekala buu Efile, na mulombene kushinguula buuwa na bubi.” (Kib. 3:5) Lelo uno, bantu bebungi abetatulaa mu kipaso kyabapwandjikisha shi takwi muntu sunga Efile Mukulu, mulombene kwibalungula kibubi na kibuwa. Bu kileshesho, bino binangu abimwenekaa bikishekishe mu kipaso kyabamonaa dibaka kwi bantu.

Mwina Kidishitu atuulu nkalo ya bangi pa mbalo ya kumpala—bikishekishe ya ba mu nshibo yaaye (Tala kikoso 12) *

12. Bantu ba mu uno ndumbulwilo bakwete kukwatshishena mweneno kinyi a pa nsenga?

 12 Bible atekye balume na bakashi bwabadya kwinemekyeshena na kulombasha mitshipo yabo ya dibaka. Kwete kunyingisha ba mulume na mukashi bwabadya kushala pamune, p’amba shi: “Mulume akalekye nshaaye naa nyinaaye, bwa kulamata mukashi aaye, abo booso abakeekala mbidi imune.” (Kib. 2:24) Kadi, baba be ku bukitshishi bwa binangu bya pa nsenga be na mweneno mwilekene, bakwete kwamba shi mulume atale nkalo yaye mukashi namu atale yaye. Ungi mukanda awakwila pabitale kwipaa kwa dibaka awamba shi: “Mu angi maumbo, nsaa ayiyibakishena bantu, abelaa mitshipo kumpala kwa bantu shi, abashala pamune bwa muwa wabo ooso. Kadi bantu bebungi mbashituule wawa mutshipo, bela ungi wa shi, atushala pamune nka su twibefulene.” Yawa mweneno e naye bantu pabitale dibaka mmufishe bangi mu kutshiba bifuko na kutapa bangi ku mashimba. Kushi mpaka, mweneno a bantu ba mu uno ndumbulwilo pabitale dibaka mmulwile.

13. Bwakinyi Yehowa mmushikwe bantu basha kwitatula?

13 Bible amba’shi: “Sha-kwitatula ooso, Yehowa mmumushikwe.” (Nki. 16:5) Bwakinyi Yehowa mmushikwe sha-kwitatula? Mwanda baaba basha kwitatula na abekukwatshishena bakwete kwiata na muulo ukilekile aulesha kwitatula kwa Satana. Banda kunangushena, Satana apwandikishanga shi Yesu—aye ababadi bafube naye kwi Efile Mukulu bwa kupanga bintu byoso—mmulombene kumukunamina na kumulangwila! (Mat. 4:8, 9; Kol. 1:15, 16) Baba bantu abeata na kinemo kikilekile abalesha binyibinyi shi, binangu bya pa nsenga nkulootakana ku meeso kw’Efile Mukulu.

ABIAMBA BIBLE PABITALE KWIATA NA MUULO UKILEKILE

14. Mushindo kinyi wi mukanda wa Beena-Looma 12:3 awitukwasha bwa kwikala na nkatshinkatshi pabitale byatwiata atwe banabene?

14 Bible etukwasha bwatudya kwikala na nkatshinkatshi pabitale kwifula atwe banabene. Anka, amba shi, kwifula atwe banabene mu kipaso kilombane takwi bubi nya. Yesu bambile  shi: ‘Fula muntu noobe buu’be nabene,’ abilesha shi abitungu twikale na nkatshinkatshi pabitale nkalo yetu. (Mat. 19:19) Byabya, Bible t’etulongyesha’shi twikale atwiata na muulo ukilekile nya. Anka amba’shi: “Tanukitanga kintu su nkimune bwa kwipikena, anka mu kwiyisha, ikalayi anumono bangi bu bee kunundu kwenu.”—Fid. 2:3; badika Beena-Looma 12:3.

15. Bwakinyi opwandikisha’shi elango dya Bible pabitale kwiata na muulo ukilekile dibuwa?

15 Lelo uno, bantu bebungi bakwete kwiata bu be na binangu, mbalombene kubepula binangu bya mu Bible pabitale kwiata na muulo. Mbalombene kupwandikisha’shi, su omona mungi muntu bu e kunundu koobe abakumwenenena. Kadi, nkipeta kinyi kitukile ku binangu bya kwitatula bya ndumbulwilo a Satana? Nkinyi kyodi mupwe kumona? Basha kwitatula be na muloo su? Be na muloo mu bifuko byabo su? Be na ba kuuku bebuwa su? Be mu kipwano kibuwa n’Efile Mukulu su? Muyiile byodi mumone, nkinyi akitusha bipeta bibuwa—nkulonda binangu bya uno ndumbulwilo su nkulonda binangu by’Eyi dy’Efile Mukulu?

16-17. Twi na lutumbu pabitale kinyi, na bwakinyi?

16 Bantu abalondo binangu bya baba babamono kwi uno ndumbulwilo bu basha binangu, be nka bi bantu be mu mutamba abepusha benabo eshinda dya kwenda aku namu booso bwabo mbapwe kushimina. Yesu bambile pabitale “basha binangu” ba mu mafuku aye’shi: “Ba mpofu abakunkunkusha bampofu, su mpofu akunkusha mpofu, boso babidi abakapono mu bwina.” (Mat. 15:14) Eyendo, binangu bya ba pano nkulotakana ku meso kw’Efile Mukulu.

Bafubi b’Efile Mukulu bakwete kutentekyesha na muloo oso nsaa ibuwa yabadi bakishe mu mudimo wa Yehowa (Tala kikoso 17) *

17 Elango dibuwa dya mu Bible adikalaa na mudimo wa “kulambukisha, bwa kukuminyisha, bwa kulumbuula, bwa kuludika mu kululama.” (2 Tim. 3:16) Twi na lutumbu lukata pa mwanda Yehowa, ku bukwashi bwa ndumbulwilo aaye kwete kwitukalwila ku binangu bya uno ndumbulwilo! (Ef. 4:14) Bidibwa bya mu kikudi byakwete kwitupa abitupa bukome bwatudi nabo lukalo bwa kulonda miiya ya Mwiyi dyaaye. Nyi nkinemo kikata kya kukunkushibwa na binangu bishi na nfudiilo bi mu Bible!

LOONO 54 “Eshinda...byadidi’bi”

^ par. 5 Uno mwisambo awitukwasha bwatudya kunyisha kushinkamisha’shi, nka penda Yehowa nyi mwikale Nsulo ya bukunkushi bwibuwa. Dingi, kulonda binangu bya pa nsenga kwi masaku, kadi kutumukila binangu bya mu Eyi dy’Efile Mukulu akwitukwasha.

^ par. 9 Bu kileshesho, tala Les Jeunes s’interrogent—Réponse pratique, Volime 1, shap. 24-26, na Volime 2, shap. 4-5.

^ par. 50 BIFWATULO BYABADI BAPATUULE: Atumono ba Temwe babidi mulume na mukashi abakisha nsaa pamune. Mukwetu mulume na mukwetu mukashi bakwete kukita mudimo wa bulungudi ku mbangilo kwa bipwa 1960.

^ par. 52 BIFWATULO BYABADI BAPATUULE: Mu bipwa 1980, mulume apasukila mukashi aaye e na maladi nsaa i mwana aye mukashi kwete kutala.

^ par. 54 BIFWATULO BYABADI BAPATUULE: Lelo uno, bakwete kutentekyesha na muloo nsaa ibuwa yabadi bakishe mu mudimo wa Yehowa. Mwana abo mukashi na kifuko kyaye bakwete kusangala pamune.