Enda bwa kuleshe myanda i mwanka

Enda bwa kuleshe kashibo ka myanda i mwanka

Ikala oyimbi na muloo!

Ikala oyimbi na muloo!

“Mbikile buuwa kuyimbil’Efile Mukulu eetu.”​—MISAMBO 147:1.

NGONO: 9, 138

1. Kuyimba akwitukwasha bwa kukita kinyi?

UNGI mufundji a ngono mwende nkumo bambile’shi: “Bishima abyeleshaa muntu binangu. Misambo ayitakulaa muntu mu kupusha muloo. Anka ngono ayimweleshaa binangu.” Patuyimbi ngono yetu, atutumbisha Nshetu a mwiyilu Yehowa na kumulesha byatudi bamufule. Ayitutakula bwatudya kwipusha pepi naye. Mbibofule bwatudya kupusha bwakinyi kuyimba kwi na muulo ukata mu lulangwilo lwi selele, byatwikala’shi atuyimbi patudi bupenka sunga pamune na bakwetu balume na bakashi.

2, 3. (a) Bangi bantu be kupusha naminyi pabitale kuyimba n’eyi di bukopo mu kakongye? (b) Mu uno mwisambo atukataluula nkonko kinyi?

2 Byabya, opushaa naminyi pabitale kuyimba n’eyi di bukopo mu kakongye? Abikukalakashaa su? Mu bingi bipikwa, bana balume abapushaa bukopo bwa kuyimba munkatshi mwa bantu. Bino binangu mbilombene kwikala na bukitshishi bwi bubi mu kakongye koso kashima, bikishekishe su bakulu mu kakongye bapusha bukopo bwa kuyimba sunga’shi bekala bepaane mu kukita ingi myanda mu nsaa ya kuyimba.​—Misambo 30:12.

3 Kuyimba nyi mwanda wi na muulo ukata mu lulangwilo lwa Yehowa. Ngi bwakinyi tabitungu twekala atusembakana mu nsaa ya kuyimba sunga kukutwa kupetekyelwa mu kino kipindji kya bisangilo  byetu nya. Byabya, abitungu twiyipushe boso bwetu’shi: ‘Napushaa naminyi pabitale kuyimba mu bisangilo? Ne kukita naminyi su napushaa bukopo bwa kuyimba munkatshi mwa bantu? Na mushindo kinyi wandi mulombene kwikala nayimbi na muloo?’

KUYIMBA NYI MWANDA WI NA MUULO MU LULANGWILO LWA BINYIBINYI

4, 5. Mpàngo kinyi ibabadi baate pabitale kuyimba mu ntempelo a mu Isaleele a kala?

4 Kubanga kala, balangwidi ba Yehowa abadi bafube na ngono bwa kumutumbisha. Mu mafuku abadi bena Isaleele na lulamato kwi Yehowa, kuyimba kubadi mwanda wi na muulo ukata mu lulangwilo lwabo. Bu kileshesho, pabadi Daavide alumbuula mudimo wa ku ntempelo, badi mulumbuule bena Levi 4 000 bwabadya kwikala abatumbisha Yehowa na byombwanga. Munkatshi mwabo mubadi bantu 288 babadi balongyeshibwe na “babaukanga bya kuyimbila Yehowa na kalolo kooso.”​—1 Myanda 23:5; 25:7.

5 Kuyimba misambo kubadi mwanda wi na muulo mu efuku dya kufungula ntempelo. Bible etulungula’shi: “Baaba babeelanga mpungi na tuyimba, babaadi bebungye pamune kalolo; babayimbanga pamune bwa kutumbisha na kusaamuna Yehowa, . . . paapa nshibo ibawuudile n’[ekumbi] dya ntumbo y’Efile Mukulu.” Banda kunangushena uno mwanda bibaudi unyingishe lukumino lwa bena Isaleele!​—2 Myanda 5:13, 14; 7:6.

6. Neemiya badi mwate mpàngo kinyi ya kuyimba ngono na byombwanga mu mafuku abadi bu guvernere mu Yeelusaleme?

6 Neemiya, badi mulumbuule bena Isaleele bwabadya kwibakuula midimba ya Yeelusaleme. N’aye namu badi mulumbuule bena Levi bwabadya kuyimba ngono na byombwanga. Nyimbilo aabo e buwa badi mwikashe musangeelo wa kubanga kufubisha midimba buwa ngofu. Neemiya badi mubungye “bisaka bibidi bikata bya beena misambo.” Bino bisaka bya bena misambo bibabangile kutambuka kunundu kwa midimba ya kibundji mu mpese ilekeene mpa na pababadi bafumankane pamune pa mudimba wi peepi na mbalo ibadi ntempelo. Mayi aabo abadi bukopo mu kipaso kibabadi abebapusha mpa na kwi bantu be kula. (Neemiya 12:27, 28, 31, 38, 40, 43) Twi kwikala bashinkamishe’shi Yehowa badi musangale ngofu pa kupusha balangwidi baye abayimbi misambo ya kumutumbisha na muloo ooso.

7. Yesu badi muleshe naminyi’shi kuyimba kwi na muulo mu lulangwilo lwa bena Kidishitu?

7 Mu mafuku a Yesu, ngono ibadi nka na muulo mu lulangwilo lwa binyibinyi. Banda kupwandikisha myanda ibakitshikile mu bufuku bwa muladilo wa lufu lwaye. Kunyima kwa Yesu kukita Kidibwa kya Mwanana, abayimbile ngono ya kutumbisha Yehowa.​—Badika Mateo 26:30.

8. Bena Kidishitu ba kumpala mbetulekyele kileshesho kibuwa kya kutumbisha Efile Mukulu na ngono naminyi?

8 Bena Kidishitu ba kumpala mbetulekyele kileshesho kibuwa kya kutumbisha Efile Mukulu na misambo. Mu kwilekena na bena Isaleele, abadi abende ku ntempelo bwa kulangwila Yehowa, bano bena Kidishitu abadi abebungila ku mashibo a bantu. Sunga byekala’shi ano mashibo taabadi buwa na’shi taabadi aakemesha bantu bu bibadi ntempelo, bano bakwetu abadi nka abayimbi na katshintshi. Ngi bwakinyi, Mpoolo mutumibwa balungwile bakwabo bena Kidishitu’shi: ‘Elambukisheeneyi, na kwikankamisheena ku muntu na mwinaye, mu ngono, mu ngono ya kumutumbisha, misambo ya mu kikudi, nwayimbilanga Efile Mukulu na mashimba eenu na kinangu kya lutumbu.’ (Beena-Kolose 3:16, Kilombeeno kipya 2014) Abitungu twikale atuyimbi ngono i mu mukanda wetu wa ngono na “kinangu kya lutumbu.” N’ayo namu i munkatshi mwa ‘byakudya’ byabetupa “pa nguba atungibwa” kwi “mpika a kishima na mupatulukye.”​—Mateo 24:45.

NKINYI KILOMBENE NKUKWASHA BWA KUYIMBA KALOLO?

9. (a) Bwakinyi bangi bantu abapushaa bukopo bwa kuyimba na muloo nsaa yabadi mu bisangilo sunga ku bikongeno? (b) Abitungu tukite naminyi bwa kuyimba bwa kutumbisha Yehowa, na mbanyi abatungu’shi bekale bu kileshesho? (Tala kifwatulo ki ku mbangilo.)

9 Ntubingilo kinyi tulombene nkutakula mu kupusha bukopo bwa kuyimba? Bi kwikala’shi bantu ba mu mbalo yodi mushale sunga ba mu kifuko kyenu ta be na kipikwa kya kuyimba. Sunga’shi oteemeshaa ba ngomba balongye ngofu abayimbi ku kisaashi sunga ku televizion, popwandikisha nyimbilo oobe na abo, opusha buufu sunga bu’be shi mulombene kuyimba. Anka boso bwetu twi na bushito bwa kuyimba bwa kutumbisha Yehowa. Byabya bwa kuyimba kalolo, ebweshe mukanda oobe wa ngono kwiyilu, ebweshe mutwe oobe, na oyimbe na muloo! (Esela 3:11; badika Misambo 147:1.) Mu Mashibo a Bufumu ebungi lelo uno mwi ma ecran aalesha bishima bi mu misambo yetu, na bino mbilombene nkukwasha bodya kuyimba n’eyi di bukopo. Abitusangasha dingi pa kumona’shi binobino kuyimba ngono ya Bufumu kwi mu programe a kalasa ka bakulu kabetanyina bu Kalasa ka mudimo wa Bufumu. Bino abilesha’shi bi na muulo bwa’shi bakulu bekale kileshesho pabitale kuyimba ngono mu bisangilo.

10. Abitungu tutentekyeshe mwanda kinyi su atupushaa moo wa kuyimba n’eyi di bukopo?

10 Bantu bebungi abapushaa moo wa kuyimba n’eyi di bukopo mwanda abapwandikisha’shi be n’eyi dikile kunongama sunga’shi ta be n’eyi di buwa. Byabya, banda kunangushena uno mwanda. “Atukokolaa atwe boso mu bipaso bibungi” nsaa yatwakula, anka bino tabitutakulaa mu kupela kwakula nya. (Shake 3:2) Byabya bwakinyi twi balombene kutadila eyi dyetu dikutwe kupwidika bwadidya kwitukutshishwa kuyimba bwa kutumbisha Yehowa?

11, 12. We kwikala oyimbi kalolo naminyi?

11 Pangi twi kupusha bukopo bwa kuyimba mwanda tatuuku bya kuyimba. Anka kwi myanda  ipeelepeele yatudi balombene kukita bwa kulongamisha nyimbilo eetu. *

12 We mulombene kuyimba n’eyi dibukopo su bolongo bya kwikala oyooka kalolo. Nka abikalaa kaalo ka nsembwe akatembesha ampule, muwa oobe oyooka kalolo namu aupa eyi dyobe bukome nsaa ywakula sunga yoyimbi. Ikala oyimbi n’eyi dywakulaa nadyo sunga dikaamine kukila papa. (Tala malango e mu Tirez profit de l’École du ministère théocratique, esaki 181 na 184, mu ka mutwe ka mwanda akamba’shi: “Utilisez correctement votre provision d’air.”) Dingi, mu Bible ingi nsaa abanyingisha balangwidi ba Yehowa bwa kwela “biila bya muloo” p’abayimbi bwa kumutumbisha.​—Misambo 33:1-3.

13. Patuula mushindo watudi balombene kuyimba kalolo.

13 Mu lulangwilo lwa mu kifuko sunga saa yoodi obe nabene, tompa kukita bino: Sangula loono lumune lodi mukumine ku ngono yetu i mu mukanda wa ngono. Badika mayi a ngono n’eyi dikamine na, di bukopo. Kya kabidi, fuba na dyadya eyi dimune wakule myaku yoso musango umune kushi kuyooka. Kubapu, oyimbe nka wawa mwaku na dyadya eyi dikamine. (Yeeshaya 24:14) Eyi dyoyimbi nadyo adipete bukome bwibungi. Tolekyelanga bufu bwa kukutshushwa kwiyimba!

14. (a) Kubuula mukanwa ngofu kwi kwitukwasha bwa kuyimba kalolo naminyi? (Tala kashibo akamba’shi: “ Byodya kwikala oyimbi kalolo.”) (b) Elango kinyi dya kulumbuula lukalakashi lw’eyi dilombene nkukwasha?

14 Bwa kwikala n’eyi dya kuyimba bii bukopo, abitungu wekale wasama mukanwa ngofu. Byabya nsaa yoyimbi, buula mukanwa kukila byobulaa nsaa ywesamba. Kadi we kukita naminyi su opusha’shi we n’eyi diikye sunga dikile kunongama? We kupeta malango ebuwa mu kashibo akamba’shi: “Quelques problèmes particuliers à surmonter,” ke mu Tirez profit de l’École du ministère théocratique, esaki 184.

KUYIMBA KOBE KUTUUKILE MWISHIMBA

15. (a) Mwanda kinyi ubabadi baukishe bantu abadi mu kikongeno kya ku kipwa kya mu 2016? (b) Ntubingilo kinyi twabadi batushishe mukanda wa ngono upya?

15 Muntu ooso batwelele mu kikongeno kya ku kipwa kya mu 2016, badi na muloo wibungi nsaa ibadi mukwetu Stephen Lett a mu Kasaka ka Bakunkushi-Bakulu mwakule kutuuka kwa mukanda wa ngono upya wi na mutwe wa mwanda awamba’shi: Tuyimbileyi Yehowa na muloo. Mukwetu Lett badi mupatuule’shi, kamune ka ku tubingilo atwitutakula mu kukimba mukanda wa ngono upya mpa mwanda wa’shi bekeele batushe Bible a Traduction du monde nouveau mupya a mu 2013. Mayi a ngono mbeashintuule bwa kukatusha bishima byabadi bakatushe mu Bible a Traduction du monde nouveau. Na dingi, mbakumbashe ingi ngono ipya ayisambila mudimo wa bulungudi na mulambu wa nkuulo. Akupu, bu bikale’shi kuyimba nyi mwanda wi na muulo mu lulangwilo lwetu, Kasaka ka Bakunkushi-Bakulu akekalanga na lukalo lwa kutusha mukanda wa ngono wi buwa bukalabale. Ngi bwakinyi kipusu kya mukanda wa ngono kyabadi bakite ki mumune na kya Bible a Traduction du monde nouveau.

16, 17. Ngingi myanda kinyi yabadi bashintuule mu mukanda wa ngono upya?

16 Bwa’shi mukanda wa ngono wikale ubofule bwa kufuba nao, mbatshibuule ngono muyiile mitwe ya mwanda. Bu kileshesho, ngono 12 ya kumpala ayakula pabitale Yehowa, ngono 8 ayilondo ayakula pabitale Yesu na mulambu wa nkuulo. Kumbangilo kwa mukanda wa ngono kwi mulongo wa mitwe ya mwanda yooso. Bino mbilombene kukwasha ngofu, bu kileshesho, nsaa i mukwetu e na mwisambo wa bantu boso akyebe kusangula loono.

17 Bwa kukwasha bantu boso bwabadya kuyimba na mashimba abo ooso, bimo bishima bi mu misambo mbebishintuule bwa’shi mukandu wi mwanka wikale aupushika kalolo. Imo ngono mbashintuule myanda i mwanka bwa’shi imone bya kutusha malongyesha aepushena na bisangilo mpa na mudimo wa bulungudi. Bu kileshesho, musambo ubadi na mutwe wa mwanda awamba’shi: “Tusangale na bya buntu by’Efile” ubadi awisambila penda myanda ipeela, ngi bwakinyi mbeushintuule na kutusha mutwe wa mwanda awamba’shi: “Kulongyesha Eyi dy’Efile Mukulu.”

Ikalayi anwilongyela ngono mu lulangwilo lwa mu kifuko (Tala kikoso kya 11-14)

18. Bwakinyi abitungu twikale atwilongyela ngono i mu mukanda wetu wa ngono? (Tala mayi e kuushi kw’esaki.)

18 Ngono ibungi i mu mukanda wa Tuyimbileyi Yehowa na muloo i nka bu nteko. Ino ngono i nkukwasha bodya kulungula Yehowa myanda i mwishimba dyobe. Ingi ngono ayitunyingisha ku “kifulo na mu mifubo ibuwa.” (Beena-Ebelu 10:24) Abitungu tulamine melodi, nyimbilo, na bishima bi mu misambo yetu. Umune wa ku mishindo yatudi balombene kukita bino nkuteemesha ngono yabadi bakobole yabadi bayimbe kwi bakwetu balume na bakashi. Ino misambo yabadi bakobole we kwiyipeta mu jw.org. Su bwekala welongyela ngono kwenu ku nshibo, ouku bya kuyimba kalolo na muloo. *

19. Bantu boso be mu kakongye mbalombene kulangwila Yehowa naminyi?

19 Tentekyesha’shi kuyimba kwi na muulo ukata mu lulangwilo lwetu. Nyi mushindo ukata watudi balombene kulesha Yehowa’shi, twi bamufule na twi na lutumbu bwa myanda yoso yadi mwitukitshine. (Badika Yeeshaya 12:5.) Nsaa yoyimbi na muloo, okankamika bangi bwabadya kuyimba namu na muloo. Bantu boso be mu kakongye, ba nsongwa, bantu bakulu, sunga bantu bapya mu bya binyibinyi, mbalombene kulangwila Yehowa mu uno mushindo. Ngi bwakinyi topushanga bukopo bwa kuyimba n’eshimba dyobe dyoso. Tukokyeleyi ku ano mayi abakwile mufundji a misambo shi: “Imbilayi Yehowa!” Eyendo, tuyimbileyi Yehowa na muloo!​—Misambo 96:1.

^ par. 11 Bwa kuuka myanda ibungi pabitale bya kulongamisha eyi dyobe dya kuyimba, tala programe a televizion a JW a mu 12/2014 (Twela mu video à la demande DEPUIS NOTRE STUDIO)).

^ par. 18 Kipindji kyoso kya kumpala na kya kunyima kwa midi kya bikongeno byetu byoso akibangaa na minite ekumi ya kupusha ngono yabadi bayimbe na byombwanga. Ino misambo ayitukwashaa bwatudya kwikala na muloo wa kuyimba na kulumbuula binangu byetu bwatudya kutemesha programe kalolo. Ngi bwakinyi abitungu twikale bashale mu ma mbalo eetu na twilumbuule bwa kuteemesha nsaa ayibanga kuyimba ino misambo.