Enda bwa kuleshe myanda i mwanka

Enda bwa kuleshe kashibo ka myanda i mwanka

Okumina kuukibwa na nnanyi?

Okumina kuukibwa na nnanyi?

“Efile Mukulu mmululame; ta mmulombeene kuluba kyanudi bakite, na kifulo kyanudi baleeshe bw’eshina dyaaye.”—BEENA-EBELU 6:10.

NGONO: 39, 30

1. Ndukalo kinyi lwatudi batandjikye nalo boso bwetu?

OPUSHAA naminyi su muntu ouku na onemekaa aluba eshina dyobe, sunga’shi akulungula’shi takuuku? Bino mbilombene nkubofusha ngofu. Bwakinyi? Mwanda oso a kwatudi mmutandjikye na lukalo lwa’shi bangi bantu bamukumine. Anka tatukumina’shi baukye penda mashina eetu nya. Atukumina’shi baukye bi bu muntu bwetu na myanda yatudi bakite.—Mbadiko 11:16; Yoobo 31:6.

2, 3. Nkinyi kilombene kukitshika pabitale lukalo lwetu lwa kukuminyibwa na bangi bantu? (Tala kifwatulo ki ku mbangilo.)

2 Su ta twi badimukye, luno lukalo lwa kuukuminyibwa ndulombene kulwila. Ndumbulwilo a Satana mulombene kwitutakula bwatudya kwikala na lukalo lwa kwenda nkumo na kwikala muntu mukata. Nsaa ayikitshika bino, tatulangwila Nshetu Yehowa na kumupa kinemo kimulombanyine nya.—Kibafumbwilwe 4:11.

3 Mu mafuku a Yesu, bamo bakata ba bipwilo babadi na mweneno e bubi pabitale kuukibwa. Yesu badi mudimushe balongi baye’shi: “Dimukaayi na balambukishi ba bishila, abo bakumiine kutambakana mu misapi ila, na kwedibwa myooyo ya kineemo mu  bifumankeeno, bishalelo bya kumpala mu bitumbwilo, na mbalo ya kumpala mu madyo akata.” Bambile dingi’shi: “Abakafwambushibwa bikata.” (Luka 20:46, 47) Mu kwilekena na byabya, Yesu badi mukampule mukashi kilele badi mulambule tukuta tubidi, aku namu pangi takubadi ungi muntu su ngumune badi mumone bibakitshine nya. (Luka 21:1-4) Abimweneka kalolo’shi, mweneno a Yesu pabitale kuukibwa badi mwilekene ngofu na a bangi bantu. Uno mwisambo auketukwasha bwa kulama mweneno ebuwa a kuukibwa, mweneno abakumina kwi Yehowa Efile Mukulu’shi twikale naye.

MUSHINDO WA KUUKIBWA UKILE BUWA

4. Mmushindo kinyi wa kuukibwa ukile buwa, na bwakinyi?

4 Mmushindo kinyi wa kuukibwa ukile buwa? Ta mushindo wa kuukibwa wabakimbi kwi bantu pa kulonga tulasa twi bungi, kwikala na busunga abwende ku meso, sunga kwenda nkumo mu myanda ya kukisha kapapi nya. Mpoolo badi mupatuule mushindo wa kuukibwa ukile buwa nsaa ibambile’shi: “Binobino bibanuuku Efile Mukulu, twambe’shi: buu bibaanuukiibwa kwadi, mbii-kunyi byanudy’a kwalukiila dimo ku bintu bishii kapu, bya-bisumanga, n’eshimba dya kwibifubila dimo?” (Beena-Ngalatea 4:9) ‘Kuukibwa n’Efile Mukulu’ nyi nkineemo kikata, mwanda aye nyi Nfumu e kunundu kwa bintu byoso bi mwiyilu na bi pa nsenga! Yehowa auku bumuntu bwetu, mmwitufule, na akumina’shi twikale pepi naye. Yehowa betupangile bwatudya kwikala bakuuku baye.—Mulungudi 12:13, 14.

5. Abitungu tukite kinyi bwatudya kuukibwa n’Efile Mukulu?

5 Atuuku’shi Moyiise badi kuuku a Yehowa. Nsaa ibatekyele Yehowa’shi: “Nguukishe eshinda dyoobe,” Yehowa bamwalulwile’shi: “Kibofiki mu kuteka, nekikitshi, mwanda we mupete buuwa ku meeso ande, dingi nakuuku mwishina dyoobe.” (Efilu 33:12-17) Yehowa mmulombene kwituuka pa bupenka. Byabya abitungu tukite kinyi bwatudya kufika ba kuuku baye? Abitungu tumufule na kulambula muwa wetu kwadi.—Badika 1 Beena-Kodinda 8:3.

6, 7. Kinyi kilombene kutshiba kipwano kyetu na Yehowa?

6 Byabya, abitungu tulame bukuuku bwetu na Nshetu a mwiyilu. Nka bu bena Kidishitu ba kumpala ba mu Ngalatea, abitungu tulekye kwikala bu bapika ba “bintu bishii kapu, [na] bya-bisumanga” bya uno ndumbulwilo, mpa na kinemo na nkumo byabitusha. (Beena-Ngalatea 4:9) Baba bena Kidishitu ba mu Ngalatea abadi bapwe kuuka Efile Mukulu, na Efile Mukulu namu badi mupwe kwibauka. Anka Mpoolo bambile’shi bano bakwetu bamune babadi ‘abalukiila dimo’ ku bintu bya bisumanga. Mu ungi ngakwilo, badi ebayipusha’shi: ‘Bwakinyi nwi bashintulukye na kubanga kufula bino bintu bimune bishii kapu bya-bisumanga, n’eshimba dya kwibifubila dimo?’

7 Uno mwanda ngulombene kwitufikila natwe su? Oolo. Nka bu Mpoolo, nsaa ibatutwelele mu bya binyibinyi, pangi tubadi balekye myanda ibadi ayituyisha nkumo na tubadi bapwe koobesha myanda ibungi mu ndumbulwilo a Satana. (Badika Beena-Fidipe 3:7, 8.) Pangi tubadi balekye ma bourse sunga matalwa a kwenda mu kulonga buntu, mudimo wibuwa, sunga ungi mwanda ulombene kwitupetesha makuta ebungi. Sunga’shi tubadya kwenda nkumo sunga kupeta makuta ebungi mwanda twi na ngobesha ya kuyimba sunga kwasha maasha kalolo. Anka tubadi basumbushene ino myanda yoso atwe nkwiyileka. (Beena-Ebelu 11:24-27) Bi kwikala bu kukutwa kwa binangu su twabanga kwinyongola bwa bino bitshibilo bibuwa na kubanga kunangushena’shi nshalelo eetu badya kwikala bibuwa su tubadya kutungunuka na kulonda bino bintu bibatudi balekye! Uno mwikelo ngulombene kwitwalushe ku mongo na kubanga  kulonda bintu bya mu uno ndumbulwilo, bintu bibatudi bapwe kwata kitshibilo kya kwibimona bu “bintu bishii kapu, [na] bya-bisumanga.”

NYINGISHA LUKALO LOOBE LWA KUUKIBWA NA YEHOWA

8. Nkinyi akinyingisha lukalo lwetu lwa kuukibwa na Yehowa?

8 Lukalo lwetu lwa kukuminyibwa na Yehowa ndulombene kutama ngofu mu kipaso kyatukapele kukuminyibwa na bantu ba mu uno ndumbulwilo naminyi? Abitungu tulamine myanda ibidi ya binyibinyi i na muulo. Wa kumpala, misusa ibungi Yehowa auku baba boso abamufubila na lulamato. (Badika Beena-Ebelu 6:10; 11:6) Yehowa ataa muntu ooso amufubila na lulamato na muulo, na dingi apushaa’shi kwilwankana muntu su ngumune a kwabadi ‘nkukutwa kwa kululuma.’ Misusa yoso Yehowa aukaa “baba be bu baye.” (2 Timote 2:19 Esambi dipya 2015) Auku “eshinda dya balulame” na dingi auku bya kwibapasha.—Misambo 1:6; 2 Mpyeele 2:9.

9. Tusha kileshesho akilesha mushindo ubadi Yehowa muleshe’shi mmukumine mwilo waye.

9 Ingi misusa, Yehowa badi muleshe’shi mmukumine mwilo waye mu mishindo i pabwayo. (2 Myanda 20:20, 29) Bu kileshesho, banda kupwandikisha mushindo ubadi Yehowa mupashe mwilo waye ku kalunga kamonga nsaa ibabadi abebalondo kwi Faraone na basalayi baye. (Efilu 14:21-30; Misambo 106:9-11) Uno mwanda ukata ubakitshikile ubadi ukemeshe bantu ngofu mu kipaso kibabadi’nka abeutentekyesha kwi bantu babadi mu kyakya kipindji kya nsenga mpa na kunyima kwa bipwa 40. (Yooshwa 2:9-11) Mu binyibinyi uno mwanda awitukankamika nsaa yatutentekyesha mushindo ubadi Yehowa mufule mwilo waye na kufubisha bukome bwaye bwa kwiupasha mu mafuku a kala, mwanda mu kapindji kapela’mu Goge, a kwiumbo dya Magoge aketutuuku ngoshi. (Esekyele 38:8-12) Mu aa mafuku, atukekala na muloo ngofu wa kwikala bakuminyibwe n’Efile Mukulu kadi kushii kwikala bakuminyibwe mu uno ndumbulwilo e bubi.

10. Mbya binyibinyi kinyi abitungu tutule meeso etu ku byanka?

10 Mwanda wa binyibinyi wa kabidi watudi balombene kulamina ngwa’shi Yehowa mulombene kwitufuta mu kipaso kyatushi’abapwandikishanga. Su bantu bakita myanda i buwa bwa’shi bebamone kwi bangi, Yehowa mulombene kupela kwibapa efuto. Bwakinyi? Mwanda, Yesu bakwile’shi, nsaa yabetumbisha kwi bangi, dyadya ngi dyabo efuto. (Badika Mateo 6:1-5.) Ku lungi lupese, Yehowa “amonaa mu bufyefye” baba boso abakitshina bangi bibuwa kushi kukimba kinemo na kuukibwa na bangi bwa bibuwa byabakitshi. Alaminaa byoso byabakitshi na kwibafuta, sunga kwibelela myabi. Na dingi ingi nsaa Yehowa afutaa bafubi baye mu mishindo ya kukaanya. Byabya tubandeyi kwisambila bingi bileshesho.

YEHOWA BAPEELE NSONGWAKASHI SHA KWIYISHA KINEMO KIKATA

11. Yehowa badi mwelele Madiya mwabi naminyi?

11 Yehowa basangwile Madiya nsongwakashi sha kwiyisha bwadya kwikala nyinaye na Mwanaye Yesu. Madiya badi mushale mu ka musoko kapela kababadi abetanyina bu Naazarete, kabadi kula na ku Yeelusaleme kubadi Ntempelo ebuwa ngofu. (Badika Luka 1:26-33.) Bwakinyi Yehowa badi musangule Madiya? Mwikeyilu Gabryele bamulungwile’shi obe “abadi belele mwabi kwi Efile Mukulu.” Twi balombene kumona’shi badi na kipwano kibukopo na Yehowa kukiila ku myanda ibabadi bamulungule kwi mukwabo Elizabete. (Luka 1:46-55) Yehowa badi mumone Madiya, aye nkumwelela mwabi mu kipaso kyashii badi apwandjikisha mwanda badi na lukumino mwadi.

12, 13. Mushindo kinyi ubabadi bape Yesu kinemo nsaa ibadi mutandjikwe na nsaa ibamutwadile Madiya ku Ntempelo kunyima kwa mafuku 40?

 12 Nsaa ibabadi batande Yesu, ba nnanyi bababadi balungule kwi Yehowa pabitale kutandikwa kwaye? Ta mulungule muntu su ngumune e na matalwa sunga mukunkushi a mu Yeelusaleme na mu Beeteleeme nya. Anka, badi mutume ba mwikeeyilu kwi balami ba mikoko basha kwiyisha babadi abalama mikoko mu kisuku pasha pa kibundji kya Beeteleeme. (Luka 2:8-14) Akupu, bano balami ba mikoko babadi bakafikye mu kutala Mwana batandjikwa. (Luka 2:15-17) Madiya na Yoosefe babadi balombene kukema pa kumona abapa Yesu kinemo mu uno mushindo. Mushindo wa Yehowa wa kukita myanda ngwilekeene ngofu na mushindo wabakitaa myanda kwi Diabulu. Satana pabadi mutume bantu abakitaa lubuko lwa nyenyenyi bwabadya nkatala Yesu na bamutande, muntu oso a mu Yeelusaleme badi muukye kutandikwa kwa Yesu, na bino bibadi bibweshe kafutakanyi kebungi. (Mateo 2:3) Bu kipeta, bana ba bantu bebungi bashi na mwanda babadi bayipayibwe.—Mateo 2:16.

13 Miya ya Yehowa ibadi mupe bena Isaleele ibadi ayamba’shi mafuku 40 kunyima kwa kutanda mwana mulume, nyina mwana badi na kya kwenda naye mu kumulambula kwi Yehowa. Madiya na Yoosefe na Yesu babakatukile ku Beeteleeme batambuka lwendo lwa bilometre kitema na ku Ntempelo mu Yeelusaleme. (Luka 2:22-24) Pabadi mwishinda, Madiya badi pangi mwiyipusha su Tshite Mwakwidi badi mukumbene kukita kintu kampanda ki pabwakyo bwa kupa Yesu kinemo. Yesu badi mupete kinemo, kadi mu mushindo wabashibadi bakulupile kwi Madiya’shi bi kukitshika. Yehowa basangwile Simeone, badi “mululame na baaneemekang’Efile Mukulu,” na mutemuki mukashi Aana badi mukashi kilele tabadi mu bipwa 84, babalungwile bantu’shi Yesu e na kya kufika Mesiya mulayibwe, sunga Kidishitu.—Luke 2:25-38.

14. Yehowa badi mufute Madiya naminyi?

14 Yehowa badi mutungukye na kukumina Madiya mwanda wa bibadi alama Yesu kalolo su? Oolo. Efile Mukulu badi mufundishe ingi myanda ibabadi abakula na ibabadi abakitshi kwi Madiya mu Bible. Bamwene’shi Madiya tabadi na ngobesha ya kwenda na Yesu mu Kulungula mukandu wibuwa munda mwa bipwa bisatu na kipindji bibadi mukite mudimo waye wa bulungudi nya. Pangi pa mwanda wa’shi badi mukashi kilele, badi mulombene kushala ku Nazarete. Badi mukutwe kumona myanda ibuwa ibabadi bamone kwi bangi. Anka badi kwanka nsaa ibafwile Yesu. (Yowano 19:26) Kunyima, Madiya badi ku Yeelusaleme na balongi ba Yesu kumpala kwa kutambula kikudi ki selele mu Mpentekoote. (Bikitshino 1:13, 14) Badi mwedibwe mwimu pamune na bangi balongi. Su mbyabya, bino abilesha’shi badi mupete mushindo wa kwikala na Yesu mwiyilu bwa looso. Mbinyibinyi, dino nyi efuto dikata bwa mudimo waye wa lulamato!

YEHOWA BAPEELE MWAN’AYE KINEMO

15. Yehowa badi muleshe’shi mmukumine Yesu pabadi pa nsenga naminyi?

15 Bakata ba bipwilo na ba politike tababadi bape Yesu kinemo nya. Anka, Yehowa badi mwakule Aye nabene misusa isatu mwiyilu, bwa’shi Mwan’Aye aukye’shi Mmumufule. Bino bibadi bilombene kukankamika Yesu ngofu! Kunyima kwa Yesu kubatshishibwa mu Mwela wa Yoordano, Yehowa bakwile’shi: “Uno mMwan’ande a-kifulo, nee na muloo pa mwanda we.” (Mateo 3:17) Abimweneka’shi Yowano mubatshishi ngi ungi muntu badi mupushe ano mayi. Dingi, kipwa kimune kumpala kwa lufu lwa Yesu, batumibwa baye basatu babapushe eyi dya Yehowa adyakula pabitale Yesu adyamba’shi: “Uno nyi mmwan’ande a kifulo kikata, nee na muloo pamwanda we. Mutemesheeyi.” (Mateo 17:5) Ku nfudilo,  kumpala kwa lufu lwa Yesu, eyi dya Yehowa dibatukile mwiyilu akula dingi na mwan’aye.—Yowano 12:28.

Mmyanda kinyi ibolongo ku mushindo ubadi Yehowa mupe Mwan’aye kinemo? (Tala kikoso kya 15-17)

16, 17. Yehowa badi mupe Yesu kinemo mu mushindo wa kukaanya naminyi?

16 Yesu badi mukye’shi bantu babadi abamwitanyina bu sha kasaabu na’shi badi na kya kufwa lufu lwi bufu. Sunga mbyabya, batekyele’shi kikyebe ky’eshimba dy’Efile Mukulu kikitshikye ku’shi kyaye. (Mateo 26:39, 42) “Bakuminyine kutambula malwa, abengyeshena buufu” mwanda badi akumina kuukibwa na Nshaye, kushii kuukibwa nkwi bantu ba mu uno ndumbulwilo. (Beena-Ebelu 12:2) Yehowa badi mupe Yesu kinemo naminyi?

17 Yesu pabadi ki pa nsenga, batekyele bwadya kupeta ntumbo ibadi nayo ku kibangilo, pabaadi mwiyilu na Nshaye. (Yowano 17:5) Bible tamwakule mbalo su ngimune’shi badi mukulupile kwikala na mbalo ikile ibadi nayo nya. Tamutekye efuto di pabwadyo bwa kukita kikyebe ky’eshimba dya Yehowa pano pa nsenga nya. Byabya Yehowa badi mukite kinyi? Badi mupe Yesu kinemo mu kipaso kya kukaanya. Nsaa ibabasangwile Yesu kwi Yehowa, “bamukâmîshe panundu pa boso” mwiyilu. Badi dingi mupe Yesu muwa wa mu kikudi ushi ulombene kufwa, kintu kyashibadi mubande kutambula kumpala koso! * (Beena-Fidipe 2:9; 1 Timote 6:16) Dino nyi efuto dikata na dya kukaanya dyabadi bape Yesu kwi Yehowa bwa mudimo waye wa lulamato!

18. Nkinyi akiketukwasha bwa kukimba kukuminyibwa na Yehowa kushi kukimba kukuminyibwa mu uno ndumbulwilo?

18 Nkinyi akiketukwasha bwatudya kukimba kukuminyibwa na Yehowa pamutwe pa kukuminyibwa mu uno ndumbulwilo? Twi bakumbene kulamina mu binangu byetu’shi misusa yoso Yehowa aukaa na afutaa bafubi baye basha lulamato na dingi ebafutaa mu mishindo yabashi’abapwandikisha. Abitungu tunangushene kipaso akiketwelela Yehowa myabi mu mafuku aafiki. Anka bwa binobino, bu byatunyingiila myanda na nkalakashi mu uno ndumbulwilo e bubi, abitungu tutentekyeshe’shi uno ndumbulwilo akidi binobino. Na kuukibwa koso kwa mu uno ndumbulwilo akukidi nako. (1 Yowano 2:17) Anka Nshetu sha kifulo, Yehowa, tamulombene kwilwankana mudimo wetu na kifulo kyatudi baleshe bw’eshina dyaye, mwanda “mmululame.” (Beena-Ebelu 6:10) Kushi mpaka, akalesha’shi mmwitukumine pangi mu mushindo watushatupwandjikinga!

^ par. 17 Yesu tabadi akulupila dino efuto nya mwanda mu Bifundwe bya kina Ebelu ta mbateemune muwa ishi bya kufwa nya.