Enda bwa kuleshe myanda i mwanka

Enda bwa kuleshe kashibo ka myanda i mwanka

Otentekyesha su?

Otentekyesha su?

We mubadikye kalolo Bitenta bya Mulami bituukye binobino su? Banda kutala su we kwalula ino nkonko ayilondo:

Nkishinkamisho kinyi ki mu Bifundwe akilesha’shi Efile Mukulu etuulaa pa mbalo yetu?

Pabaadi bena Isalele a kala mu bupika mu Ejiipitu, Efile Mukulu badi auku nkalakashi yabo na aye nkupusha bi makyenga abo. (Efilu 3:7; Yeeshaya 63:9) Twi bapangibwe kwifwanyiko dy’Efile Mukulu, na abitungu twituule pa mbalo ya bangi. Etuulaa pa mbalo yetu sunga nsaa yatwimono bu bashi balombene kupeta kifulo kyaaye.—wp18.3, esk. 8-9.

Malongyesha a Yesu abadi akwashe bantu bwa kukambila ntondo naminyi?

Bena Yuuda bebungi ba mu mafuku a Yesu babadi na ntondo. Kidishitu balesheshe muulo wa kwikala na kwiyisha aye nkutopeka kwitatula mwanda w’elangi dy’ekoba kampanda. Balungwile balondji baaye bwabadya kwiatena bu bana na bana.—w18.06, esk. 9-10.

Ndjilongyesha kinyi dyatupetela ku mushindo ubabadi bapele kutwesha Moyiise mu Nsenga ya mulayilo kwi Efile Mukulu?

Moyiise badi mu kipwano kibuwa na Yehowa. (Miiya Ikituulwe 34:10) Pepi na nfudiilo a bipwa 40 mu kabaaka, mwilo ubabangile kwidiladila bwa mususa wa kabidi pa mwanda wa kukutwa kwa mema. Efile Mukulu balungwile Moyiise bwadya kwisamba na lubwebwe. Anka, Moyiise, batanyine lubwebwe. Yehowa badi mufitshile Moyiise munda mwanda bakutshilwe kukokyela mayi aaye a kulonda sunga pa mwanda’shi Moyiise tabadi mwalushe ntumbo kwi Efile Mukulu bwa kyakya kilengyeleshi nya. Bino abitulongyesha muulo wa kukokyela Yehowa na kumupa ntumbo.—w18.07, esk. 13-14.

Twi kukita kilubilo naminyi su twatshiba kiimu muyiile byatumono ku meso?

Kwi bintu bisatu abitakula bantu mu kutshiba kiimu muyiile abimwenaka na meso: ekoba sunga kisamba, bupeta, na bungi bwa bipwa. Bi na muulo bwa’shi twikale atumono bantu bu abibamonaa Efile Mukulu kushii ntondo! (Bikitshino 10:34, 35)—w18.08, esk. 8-12.

Bena Kidishitu batabadi banunu mbalombene kukwasha bangi mu ingi mishindo kinyi?

Mwina Kidishitu bapu kukula mushintuule mudimo waye e nka na muulo kwi Efile Mukulu, mmukumbene kukita bibungi bwa kukwasha bangi. Mukumbene kukwasha muntu mwiyibakishene na mungi shi mwina kukumina, kukwasha balungudi bashabafubu dingi, kulonga Bible na bantu, na kutamisha mudimo waaye.—w18.09, esk. 8-11.

Bena Kidishitu be na bintu kinyi mu kasheete kabo ka biina mudimo bya kulongyesha nabyo?

Mwi ma karte na masaki a lwitamino. Ma trakte 8 ebuwa, mpa na Kitenta kya Mulami na Réveillez-vous ! Mu kashete ka bintu bya kulongyesha nabyo mwi dingi ma broshire, mikanda ibidi ikata ya kulonga nayo Bible na bantu, na ma video ananka ebuwa mpa na video a Bwakinyi abitungu kulonga Bible?w18.10, esk. 16.

Mwina Kidishitu mmulombene “kuula bya biinyibiinyi” naminyi bu byabadi baleshe mu mukanda wa Nkindji 23:23?

Tatufutaa makuta bwa kuula bya binyibinyi nya. Byabya, abitungu tukishe nsaa na bukome bwetu bwa kwibipeta.—w18.11, esk. 4.

Nkinyi kyatulongyela ku mushindo ubadi Osea mukitshine mukashi aye Gomere myanda?

Gomere badi mutambukye lusandji misusa ibungi, anka Osea badi mumufwile lusa aye nkushaala naaye. Su mwina Kidishitu mwibakile batambuka lusandji, mwinaaye abalwishisha mmukumbene kumufwila lusa. Su befikena dingi pepi na mwina dibaka naye, te na matalwa dingi muyile Bifundwe a kutshiba dibaka nya.—w18.12, esk. 13.