Enda bwa kuleshe myanda i mwanka

Enda bwa kuleshe kashibo ka myanda i mwanka

Ba nsongwa, mupangi enu akumina’shi nwikale na muloo

Ba nsongwa, mupangi enu akumina’shi nwikale na muloo

“Etupeyaa bintu byooso bii bungibungi, bwatudy’a kusepeela nabyo.”—1 TIMOTE 6:17.

NGONO: 135, 39

1, 2. Bwakinyi abitungu kutemesha Mupangi obe nsaa ya kusangula kya kukita na muwa obe? (Tala kifwatulo ki kumbangilo.)

SU WE nsongwa pangi we mupete malango ebungi pabitale mafuku obe e kumpala. Balongyeshi, bakunkushi abatushaa malango, na bangi bantu mbalombene nkulungula’shi abitungu wende ku kilongyelo kikata sunga kupeta mudimo aukukwasha bwa kupeta makuta ebungi. Anka Yehowa akupa elango dilekene na dyadya. Eyendo’shi, wepane ngofu ku kalasa bwashi opete mushindo wa kwikwasha mu nshalelo. (Beena-Kolose 3:23) Auku dingi’shi, pokii nsongwa we na kya kwata bitshibilo bi na bukitshishi ku mafuku obe e kumpala. Nyi bwakinyi akupa mayi a kulonda bwa nkukunkusha na nkukwasha bwashi wekale na nshalelo amusangasha mu ano mafuku a ku nfudiilo.—Mateo 24:14.

2 Tentekyesha’shi, Yehowa auku kintu kyoso. Auku abikitshika mu mafuku e kumpala, na auku kalolo patapadi nfudiilo a uno ndumbulwilo a myanda. (Yeeshaya 46:10; Mateo 24:3, 36) Yehowa akuuku dingi. Auku kilombene nkupa muloo na kilombene nkubungamisha. Malango a bantu ngakumbene kupushika bu e  buwa, anka su taatukila Mwiyi dy’Efile Mukulu, ta ngakambe buwa nya.—Nkindji 19:21.

NKA PENDA KWI YEHOWA NGI AKUFIKAA BINANGU

3, 4. Kutemesha elango dibubi kwa Adame na Eeva nkwibatushile bipeta kinyi na bana babo?

3 Malango ebubi e kwanka takudi bipwa bibungi. Satana nyi muntu a kumpala batushishe elango dibubi. Balungwile Eeva’shi aye na Adame abekala na muloo wibungi su beatshila kitshibilo kya bya kwikala mu nshalelo abo. (Kibangilo 3:1-6) Anka Satana badi akimbi penda buwa bwaye! Lukalo lwaye lubadi lwa’shi Adame na Eeva mpa na bana babakatanda, bamukokyele na kumulangwila, pamutwe pa Yehowa. Anka Satana tabadi mukitshine bantu kintu su nkimune. Yehowa nyi badi mwibape bintu byoso bibabadi nabyo. Bebapele lupango lwibuwa lwa kushaala, na mbidi yaabo ipwidikye bwabadya kwikala na muwa wa looso.

4 Mwanda wa malwa, Adame na Eeva babapelele kukokyela Efile Mukulu. Pababakitshine byabya, babatshibile kipwano kyabo na Yawa bebapele muwa. Nkutukye bipeta bibubi bukile. Anka abikalaa bilongo byabatshibi ku mutshi, Adame na Eeva ababangile kununupa na kufwa. Baana babo namu babadi bakyengye, mpa n’atwe boso’nyi tukwete kukyenga. (Beena-Looma 5:12) Bantu bakile bungi lelo uno bakwete kulengula abyamba Efile Mukulu na kukita nka kyabo kyabakumina. (Beena-Efeso 2:1-3) Mbipeta kinyi abituku? Bible amba’shi: ‘Takwi binangu’ nsaa i muntu atombokyela Yehowa.—Nkindji 21:30.

5. Yehowa badi auku kinyi pabitale bantu, na bibadi bya binyibinyi su?

5 Yehowa badi auku’shi akwikala bantu, mpa na ba nsongwa bebungi, abakakumina kumwiuka na kumufubila. (Misambo 103:17, 18; 110:3) Bano ba nsongwa be na muulo ukata kwi Yehowa! We umune a kwabadi su? Su mbyabya okwete kupeta “bintu byooso” abifiki kwi Efile Mukulu, na bino abikupa muloo mu nshalelo. (1 Timote 6:17; Nkindji 10:22) Atutalula bintu binanka bya ku byanka. Bidibwa bya mu kikudi, bakuuku bebuwa, bipatshila bibuwa, na bulungantu bwa binyibinyi.

YEHOWA KWETE NKUPA BYAKUDYA BYA MU KIKUDI

6. Bwakinyi abitungu wekale wetatshisha bwa nkalo yobe ya mu kikudi, na Yehowa etupa kinyi bwa kwitukwasha?

6 Nyema tayina nkalo ya mu kikudi, nyi kwamba’shi tayipushaa lukalo lwa kukimba kuuka Mupangi ayo nya. Anka atwe twi na lwalwa lukalo. (Mateo 4:4) Nsaa yatutemesha Efile Mukulu, atupete kapatupatu, binangu, na muloo. Yesu bambile’shi: “Baba abashingûla byabadi na lukalo lw’Efile Mukulu, be na wa kusepêla.” (Mateo 5:3, EEM) Efile Mukulu etupa Bible na kufuba na “mpika a kishima na mupatulukye” bwa kwitupa mikanda ayitukwasha bwa kunyingisha lukumino lwetu. (Mateo 24:45) Atwitaminaa ino mikanda bu byakudya bya mu kikudi mwanda abidisha lukumino lwetu na kunyingisha kipwano kyetu na Yehowa. Tukwete kupeta bidibwa bya mu kikudi bilekene!—Yeeshaya 65:13, 14.

7. Bidibwa bya mu kikudi by’em abikakukwasha naminyi?

7 Bidibwa bya mu kikudi mbilombene nkupa binangu na mushindo wa kunangushena kalolo, abikukalwila mu mishindo i bungi. (Badika Nkindji 2:10-14.) Bu kileshesho, ino ngikashi ayikakukwasha bodya kutundula myanda ya madimi, bu madimi a kwamba’shi ta kwi Mupangi sunga’shi makuta na bintu bya ku mbidi ngi bilombene nkupa muloo. Ino ngikashi ayikakukwasha dingi bwa kushikwa malaka sunga bingi bipikwa bilombene nkakwinyongosha. Kita mobe moso bwa kwikala na binangu na kunangushena bibuwa. Ku nfudilo okatundula’shi, Yehowa mmukufule na akumina’shi wekale bi buwa.—Misambo 34:8; Yeeshaya 48:17, 18.

8. Bwakinyi abitungu wefubwile pepi n’Efile Mukulu binobino, na bino abikukwasha naminyi bwa mafuku e kumpala?

 8 Kubashala mafuku apela kipindji kyoso kya mu ndumbulwilo a Satana akibutudibwa. Nka penda Yehowa nyi ayikala na mushindo wa kwitukalwila na kwitupa bintu byatudi nabyo lukalo, bilombene kwikala bu bidibwa byetu bya kabidi. (Abakuke 3:2, 12-19) Ino nyi nsaa ya kwifubwila pepi n’Efile Mukulu na kunyingisha lukumino lobe mwadi. (2 Mpyeele 2:9) Su bokitshi byabya, yaya nsaa omono abikitshika mu nshalelo oobe, okapusha nka bibapushishe Daavide pambambile’shi: “Nee na Yehowa kumpala kwande ngub’ooso; byaadi ku yande ilume, ntshii kuponeshwa.”—Misambo 16:8.

YEHOWA KWETE NKUPA BA KUUKU BE BUWA

9. (a) Muyiile byatubadika mu Yowano 6:44, Yehowa akitaa kinyi? (b) Nkwilekena kinyi kosangana pofumankana na muntu abisumanga na Temwe a Yehowa?

9 Nsaa yofumankana na muntu shi mu bya binyibinyi, omuuku kalolo su? We mulombene kuuka eshina dyaye na bi mpala yaaye, pangi touku myanda yaye ibungi nya. Kwi kwilekena kukata nsaa yofumankana na Temwe a Yehowa. Ouku’shi mmufule Yehowa. Na’shi Yehowa mmumone kintu kampanda kibuwa mwadi na mmumwitamine kwadi bwashi atwele mu kifuko kya balangwidi baye. (Badika Yowano 6:44.) Sunga yawa muntu ekala atukila kunyi sunga mushindo wadi mukule, bopu kuuka bibungi pabimutale, na aye namu auku bibungi pa bikutale!

Yehowa akumina’shi wekale na ba kuuku be buwa na bipatshila bi buwa (Tala kikoso kya 9-12)

10, 11. Bafubi ba Yehowa be na myanda kinyi imumune, na bino mbikutale namu naminyi?

10 Nsaa yofumankana nka na ungi Temwe, ouku’shi nobe naye nwi na myanda ikata imumune. Ouku’shi sunga wesamba lungi ludimi, anwe boso anwisamba ludimi lumune, “ludimi lwi selele” lwa bya binyibinyi. (Sefanya 3:9, NWT) Bino abilesha’shi anwe boso nwi bakumine mwi Efile Mukulu, nwi na ngikashi imumune ya mu nshalelo, na nwi na lukulupilo lumune bwa mafuku e kumpala. Ino myanda ayinukwasha bwanudya kwikulupishena na kunyingisha bukuuku bwenu abukekala kwanka bwa looso.

11 Byabya nsaa yolangwila Yehowa, we mukumbene kwamba’shi we na bakuuku bakile buwa. We na bakuuku mu nsenga ishima sunga byekala’shi twe mubande kwimonena  nabo! Ouku bangi bantu kukatusha mwilo wa Yehowa bakwete kusangeela kino kya buntu ki na muulo su?

YEHOWA AKUKWASHA BODYA KWIKALA NA BIPATSHILA BIBUWA

12. Mbipatshila kinyi bibuwa byodi mukumbene kwata?

12 Badika Mulungudi 11:9–12:1. We na bipatshila byokwete kwitatshisha bwa kulombasha su? Pangi we na bipatshila bya kubadika Bible efuku dyoso sunga kutusha ngalulo ibuwa mu bisangilo. Sunga’shi pangi okwete kwitatshisha bwa kufuba na Bible kalolo bwa kutusha bipeta bibuwa mu bulungudi. Opushaa naminyi nsaa yomono’shi okwete kwenda kumpala sunga apakulungula bangi’shi okwete kwenda kumpala? Pangi opusha muloo, na nyi byopusha! Bwakinyi? Mwanda okwete kukita kyakya akikumina Yehowa’shi okite, bu bibakitshine Yesu.—Misambo 40:8; Nkindji 27:11.

13. Kufubila Efile Mukulu kwi na muulo kukila kutula binangu ku bipatshila bya ino nsenga naminyi?

13 Nsaa yotulu binangu byobe ku mudimo ofubila Yehowa, okwete kukita mudimo aukupa muloo na nshalelo ebuwa. Mpoolo bambile’shi: “Ikalaayi banyingye, bashii kusanyishwa, nwikale na katshintshi ku mufubo wa Mwanaana, uukaayi’shi kufumbakeena kwenu kwa mufubo wa Mwanaana ta nkwa bisumanga nya.” (1 Beena-Kodinda 15:58) Kadi bantu pabata bipatshila bya mu ino nsenga bu kukimba makuta, kwenda nkumo, tabe na muloo wa binyibinyi nya. Sunga bekala abobesha, mu mashimba abo abepusha bu bashi na kintu. (Luka 9:25) Atulongyela uno mwanda ku kileshesho kya Nfumu Salomone.—Beena-Looma 15:4.

14. Kileshesho kya Salomone akikulongyesha kinyi?

14 Salomone badi umune a ku ba mpeta bakata na muntu badi bukome kukila bangi, bamwene uno mwanda. Beambile’shi: “Nyipâne mu kukitanga kwa myanda ya mulô, ntale su bibuwa.” (Mulungudi 2:1-10, EEM) Byabya Salomone bebakile mashibo akile buwa, nkukita mpango na mafuba ebuwa, na bakitshine kyoso kibadi mukumine. Badi mupete muloo na disanka su? Salomone p’abadi atentekyesha myanda yoso ibadi mukite bambile’shi: “Nashingulwile’shi, ayo yôso mbisumanga.” Bakumbeshe’shi: “Tamubadi kamweno ka bînyîbinyi.” (Mulungudi 2:11, EEM) Bopete elango ku kileshesho kya Salomone su?

15. Bwakinyi abitungu wekale na lukumino, na mmushindo kinyi walukukwasha, bu byatulongo mu Misambo 32:8?

15 Bangi bantu abapetaa malango mu nshalelo kunyima kwa kukita bilema na kukyenga mwanda wa bipeta bibubi bitukye. Yehowa t’akumina’shi bino bikufikile. Akumina’shi omupushishe na omukokyele. Bino abitekye kwikala na lukumino, anka twemulombene kwinyongola bwa bitshibilo bywata mu nshalelo obe mwanda wa lukumino lobe nya. Na Yehowa tamulombene kuluba ‘kifulo kyodi muleeshe bw’Eshina dyaaye.’ (Beena-Ebelu 6:10) Byabya etatshishe ngofu bwa kunyingisha lukumino lobe. Paapa wata bitshibilo bibuwa mu nshalelo na wemwena’shi Nshobe e mwiyilu akumina’shi wekale bibuwa.—Badika Misambo 32:8.

EFILE MUKULU AKUPA BULUNGANTU BWA BINYIBINYI

16. Bwakinyi abitungu twate bulungantu na muulo na kwibufubisha kalolo?

16 Mpoolo bafundjile’shi: “Kooso kwi kikudi kya Yehowa, kwi bulungantu.” (2 Beena-Kodinda 3:17) Yehowa mmufule bulungantu, na bakupangile bwashi ofule namu bulungantu. Anka akumina’shi ofube na bulungantu bobe mu mushindo wibuwa aukukalwila. Pangi bangi benobe bakwete kutala poronografi, abakitshi myanda ibutete, abasha maasha aatulu muwa wabo mu masaku, sunga kutoma bintu abikolanaa sunga maalwa. Bwa mususa wa kumpala, bino bintu bi kumweneka bu miseku sunga bu bya kwasha nabyo, kadi abitushaa bipeta bibubi, bu mikumbo, kwikala ku  bupika, sunga lufu. (Beena-Ngalatea 6:7, 8) Ba nsongwa bepane mu bino bintu mbalombene kwimona bu be bulungantu, aku namu ta mbalungantu.—Tite 3:3.

17, 18. (a) Kukokyela Efile Mukulu akwitwikasha mu bulungantu bwa binyibinyi naminyi? (b) Adame na Eeve babadi mu bulungantu kukila bantu boso lelo uno naminyi?

17 Ku lungi lupese, su atukokyela Yehowa mbwa buwa bwetu. Kwi buwa bwa mbidi yetu na kwitwikasha na bulungantu bwa binyibinyi. (Misambo 19:7-11) Na su bofubisha bulungantu bobe bibuwa, nyi kwamba’shi su bwata kitshibilo kya kukokyela miiya ipwidikye y’Efile Mukulu, olesha Efile Mukulu na baledi bobe’shi we muntu a kukulupila. Baledi bobe pangi mbalombene nkukulupila ngofu na kukupa bulungantu bwibungi. Yehowa mmulee’shi kubashala mafuku apela bwashi ape bantu baye basha lulamato bulungantu bupwidikye, bwabetamina mu Bible bu “bulungantu na ntumbo bya baana b’Efile Mukulu.”—Beena-Looma 8:21.

18 Buno nyi bulungantu bubadi nabo Adame na Eeva. Mu lupango lwa Edene, mubadi nka penda kintu kimune kibabadi bebapeleshe kwi Efile Mukulu’shi tabakitanga. Tababadi na kya kudya bikuba bya mutshi umune nya. (Kibangilo 2:9, 17) Onangushena’shi Efile Mukulu badi mukutwe kululama na badi na myanda i bukopo pa’ye kwibelela uno mwiya su? Ta mbyabya nya! Nangushena pabitale miya yabakwete kwela kwi bantu na kukitshisha bangi pa bukopo bwa kwiyikokyela. Anka Yehowa bapele Adame na Eeve penda mwiya umune.

19. Myanda kinyi yabetulongyesha kwi Yehowa na Yesu ayiketukwasha bwa kwikala balungantu?

19 Yehowa e na binangu bibungi abimweneka mu kipaso kyetukitshina myanda. Pamutwe pa kwitupa miya i bungi, etulongyesha na lwishinko loso bwatudya kukokyela mwiya wa kifulo. Etulongyesha bwatudya kwikala na nshalelo mwipushene na mayi aye a kulonda na kushikwa myanda i bubi. (Beena-Looma 12:9) Mu mwisambo wa pa mwengye, mwana aye, Yesu, badi mwitukwashe bwa kupusha bwakinyi bantu bakwete kukita myanda i bubi. (Mateo 5:27, 28) Bu byakekala Nfumu a Bufumu bw’Efile Mukulu, mu nsenga ipya, Yesu akatungunuka na kwitulongyesha bwatudya kumona myanda i buwa na i bubi bu by’eyimonaa. (Beena-Ebelu 1:9) Yesu aketupa dingi mbidi na binangu bipwidikye. Pwandikisha byabikekala nsaa yakush’akwikala kintu akitutompo bwa kukita myanda ibubi na t’atukyengye dingi bwa kukutwa kupwidika. Ku nfudilo, atukasangala mu “bulungantu na ntumbo” bitulee Yehowa.

20. (a) Yehowa afubishaa bulungantu bwaye naminyi? (b) Obe namu we kumwambula naminyi?

20 Mu ndumbulwilo mupya, bulungantu bwetu abwikala’nka na mikalo. Mu mushindo kinyi? Atukekala dingi na lukalo lwa kunyingishibwa na kifulo ky’Efile Mukulu na kya bangi bantu netu. Nsaa yatukunkushibwa na kifulo, atwambula Yehowa. Sunga Yehowa ekala na bulungantu bushi na mikalo, akunkushaabintu byoso na kifulo, mpa na mushindo wetukitshinaa myanda. (1 Yowano 4:7, 8) Byabya abilesha’shi, twi balombene kwikala na bulungantu nka su tubambula Efile Mukulu.

21. (a) Daavide bapushishe naminyi pabitale Yehowa? (b) Nkinyi kyatukesambila mu mwisambo aulondo?

21 We na lutumbu kwi Yehowa bwa bintu byoso byadi mukupe su? Mmukupe bidibwa bya mu kikudi, ba kuuku be buwa, bipatshila bi buwa, lukulupilo lwa bulungantu bupwidikye mu mafuku aafiki, na bingi bya buntu bikile buwa. (1 Timote 6:17) Pangi wepushaa bu Daavide nsaa ibatekyele Yehowa mu mayi e mu Misambo 16:11 shi: “Ondambukish’eshinda dya muuwa. Muloo ukile bukata wi peepi na lukyebo lwobe; ku ilume yoobe kwi miloo ishii mpwilo.” Mu mwisambo aulondo, atukesambila ingi myanda ya binyibinyi i na muulo ayitukila mu mukanda wa Misambo 16. Ayikakukwasha bwa kumona mushindo odi mulombene kwikala na nshalelo e buwa!