Atuitatshishaa bua kukitshina muntu oso mianda na kifulo, kalolo na kanemo koso. Su Kamonyi ka Yehowa kamune kababofula sunga kuleka kulanguila dingi, atuisambaa naye bua kumushinkamiisha’shi tui bamufule na kutompa kumukuasha buadia kuifubuila dingi peepi n’Efile Mukulu.​—Luka 15:4-7.

 Ingi nsaa, bikitshino bia muntu mbilombene kumufuisha mu kukatushibua mu kakongie. (1 Bena Kodinda 5:13) Anka, pa muanda tui bafule balanguidi netu, kumpala kua bioso atuitatshishaa bua kumukuasha bua’shi takatushibuanga mu kakongie. Na sunga biekala’shi bakatushibua mu kakongie, atutungunuka na kumulesha kifulo na kanemo, anka bu abitunyingisha Bible bua kukita.​—Maako 12:31; 1 Mpiele 2:17.

Nkinyi akifuishaa muntu mu kukatushibua mu kakongie?

 Bible alesha patooka’shi su muina Nkidishitu bakitshi muluisho ukata na bapele kushintuluka, abitungu kumukatusha mu kakongie. a (1 Bena Kodinda 5:11-13) Bible etulungula miluisho ikata ilombene kufuisha muntu mu kukatushibua mu kakongie. Bu kileshesho, mu mulongo wa yaaya miluisho mbatemune lusandi, bunkoluenkolue, kuipayishena, na kukiengiesha ba mu nshibo, na buifi.​—1 Bena Kodinda 6:9, 10; Bena Ngalateya 5:19-21; 1 Timote 1:9, 10.

 Anka, t’atukatushaa musango umune muntu bakitshi muluisho ukata mu kakongie nya. Kia kumpala bakulu ba mu kakongie b abatompaa kukuasha yawa muntu bua’shi ashintulukie. (Bena Loma 2:4) Abetatshisha bua kumukunkusha mu kuilanga pa kumukitshina mianda na kalolo koso. (Bena Ngalateya 6:1) Kukita bino nkulombene kutakula muntu mukite muluisho buadia kutundula kilubilo kiaye na buadia kuilanga kuishimba. (2 Timote 2:24-26) Su biekala’shi abakitshi muabo moso bua kumukuasha, kadi atungunuka nka na kukita muluisho kushi kuilanga kuishimba, abitungu kumukatusha mu kakongie. Bakulu abalungula penda kakongie’shi yawa muntu taki dingi Kamonyi ka Yehowa.

 Mbipeta kinyi bibuwa abituukaa nsaa y’abakatusha muntu mu kakongie baata kitshibilo kia kutungunuka na kukita muluisho? Kia kumpala, kakongie akakuatshishena miiya y’Efile Mukulu pabitale muikelo wiselele na akekaluila ku bukitshishi buibubi. (1 Bena Kodinda 5:6; 15:33; 1 Mpiele 1:16) Kia kabidi, yawa muntu mukite muluisho, kukatushibua kuaye mu kakongie nkulombene kumutakula mu kuleka kukita muluisho na kushintuula nshalelo aaye.​—Bena Ebelu 12:11.

Tumonyi tua Yehowa atukitshinaa bantu bakatushibue mu kakongie mianda i naminyi?

 Bible amba’shi bena Nkidishitu abitungu ‘bapele kuikala mu kipuano’ na muntu mukatushibue mu kakongie, na ‘tabadianga sunga na yawa muntu.’ (1 Bena Kodinda 5:11) Biabia t’atukishaa nsaa pamune na muntu mukatushibue mu kakongie nya. Anka, t’atumulenguula bua loso nya. Atumukitshina mianda na kanemo koso. E na bulungantu bua kufika mu bisangilo bietu, muanda mbalombene kumusema kui Tumonyi tua Yehowa. c Mmulombene dingi kuteka bakulu buabadia kumukuasha buadia kualukiila mu kakongie.

 Kadi su biekala’shi muntu kampanda mmukatushibue mu kakongie kadi mukashi na bana baye be nka Tumonyi tua Yehowa? Sunga biekala’shi taki’alanguila dingi na kifuko kiaye, kipuano kiabo kia mu kifuko ta nkifue nya. Bu biabidi’shi be mu nshibo yaaye, kipuano kiaye na mukashi na bana baye akitungunuka na abatungunuka na kuikitshishena mianda na kifulo kioso.

 Muntu baadi mukatushibue mu kakongie mmulombene kuteka dingi bakulu buabadia kumutembela dingi, nsaa y’abesamba naaye abamupa malango a mu Bible na kumunyingisha buadia kualukiila kui Efile Mukulu. (Zekariya 1:3) Su balekie kukita miluisho na balesha’shi akumiina n’eshimba dimune kuikala na nshalelo muipushene na miiya ya mu Bible, mmulombene kualukiila dingi mu kakongie. Kakongie ‘akamufuila lusa na kalolo koso,’ nka bibaadi bikite kakongie ka bena Nkidishitu ba mu Kodinda nsaa ibaadi muntu mukite muluisho ukata mushintuule muikelo waye.​—2 Bena Kodinda 2:6-8.

Baaba babaadi bakatushibue mu kakongie abapusha naminyi lelo uno?

 Pusha abiakula tungi Tumonyi tua Yehowa tubaadi tukatushibue mu kakongie na kunyima tuata kitshibilo kia kualukiila kui Efile Mukulu.

 “Panaadi muate kitshibilo kia kualukiila mu kakongie, naadi mupuandikishe’shi bakulu abekala na lukalo lua kuuka mianda yoso yandi mukite munda mua bipua makumi biangikalanga pasha pa kakongie. Pamutue pa biabia, abambile nka penda’shi: ‘Atukumiina’shi otuule binangu biobe ku akitungu’shi okite binobino.’ Pababakuile biabia, eshimba dibaadi dimbatame.”​—Maria, a mu Etats-Unis.

 “Kakongie kabaadi na muloo wa kumona’shi nalukiila. Naadi muipushe’shi ne na muulo. Bakuetu balume na bakashi babaadi bankuashe bua kuipusha’shi Yehowa banfuila lusa na buandia kutungunuka na kuenda kumpala. Bakulu abaadi abankuasha efuku dioso buandia kunyingisha dingi kipuano kiande na Yehowa. Abaadi abansamba na kunkuasha buandia kumona’shi Yehowa angataa na muulo na mmunfule.”​—Malcom, Sierra Leone.

 “Ne na muloo wa kumona’shi Yehowa mmufule muilo waye mu mushindo w’akumiina’shi kakongie kashaale ke selele. Sunga bangi bantu bash’abauku mbalombene kupuandikisha’shi kukatusha muntu mu kakongie kui bubi, kukita biabia nyi nkintu ki na muulo na akilesha kifulo. Ne na lutumbu lukata kui Nshetu e muiyilu sha kifulo na Efile Mukulu afuilenaa lusa.”​—Sandi, Etats-Unis.