Yehowah Boqor Sulaymaan qalbi caqli iyo waxgarasho leh buu siiyay. Boqornimadii Sulaymaan gudaheed reer binu Israa’iil waxay ku noolaayeen nabad iyo barwaaqo aan meel kale ka jirin

BAL nolosha sidee bay ahaan lahayd haddii ay qaran dhan iyo boqorkeedaba Sayidnimada Yehowah aqbalaan oona sharciyadiisa addeecaan? Afartankii sano ee boqornimada Sulaymaan baa muujisa jawaabta.

Daaʼuud intuunan dhiman wuxuu doortay wiilkiisa Sulaymaan inuu boqor noqdo. Ilaahay baa riyo Sulaymaan ugu sheegay inuu weyddiisto wax u siiyo. Sulaymaan xigmad iyo aqoon buu weyddiistay si uu dadka caddaalad iyo xigmad ugu xukumo. Hadalkaas Yehowah wuu ka farxiyay oo Sulaymaan wuxuu siiyay qalbi caqli iyo waxgarasho leh. Yehowah wuxuu ballanqaaday inuu siin doono hodannimo iyo sharaf iyo cimri dheer haddii uu mar walba addeeco.

Sulaymaan caan buu ku noqday xukunkiisa xigmadda leh. Mar waxaa u yimid laba naagood oo ilmo yar ku murmaya. Middood walba waxay sheegatay inay tahay hooyadii ilmaha. Sulaymaan wuxuu amray in ilmaha laba loo kala gooyo oo naag kasta badh la siiyo. Naagihii mid way yeeshay laakiin hooyadii runta ahayd waxay ku bariday in tii kale ilmaha la siiyo. Sulaymaan si cad buu u arkay inay tan calool jilicsanaatay tahay wiilka hooyadiis oo iyaduu wiilkii siiyay. Waqti gaaban Israaʼiil oo dhan xukunkii Sulaymaan bay maqleen oo dadkii waxay garteen in xigmadda Ilaah isaga ku jirto.

Dhismada macbudka Yehowah waxay ka mid ahayd shuqullada ugu waaweyn ee Sulaymaan sameeyay. Dhismadaas quruxda badan oo Yeruusaalem ku taallay waxay ahayd meesha caabudaadda ee reer binu Israaʼiil oo dhan. Markii macbudka la daahirinayay Sulaymaan wuxuu salaad ku yiri: “Xataa samada iyo samada samooyinku kuma qaadi karaan, haddaba bal gurigan aan dhisay sidee buu kuu qaadi karaa!”—1 Boqorradii 8:27.

Sheekadii Sulaymaan waxay gaartay dalal kale xitaa dalka Shebaa oo ku taal Carabiya. Boqoraddii Shebaa waxay safar u gashay inay soo aragto sharafta iyo maaliyadda Sulaymaan iyo inay imtixaanto xigmaddiisa. Boqoraddii Sulaymaan xigmaddiisa iyo nimcada reer binu Israaʼiil aad bay ula yaabtay. Sidaa darteed waxay ku ammaantay Yehowah inuu carshiga fadhiisiyay boqor xigmad badan. Run ahaan barakada Yehowah awgeed buu Sulaymaan xukunkiisu u noqday ka ugu barwaaqo iyo nabad badan taarikhda reer binu Israaʼiil.

Waa wax laga xumaado in Sulaymaan uu sii wadin ku socodka xigmadda Yehowah. Wuu iska dhegatiray amarrada Ilaahay oo wuxuu guursaday boqolaal naagood oo badnaantooda ilaahyo kale cabuudaan. Naagihiisa tartiib tartiib bay qalbigiisii Yehowah uga jeediyeen oo sanamyo buu caabuday. Yehowah Sulaymaan wuxuu ku yiri in boqortooyada qayb laga xoogi doono. Aabbihiis Daaʼuud awgiis buu qayb yar reerkiis ugu daayay. Yehowah axdigii Boqortooyada uu Daaʼuud la galay ma jebin inkastuu Sulaymaan dhega adkaaday.

Casharkan wuxuu ku saabsan yahay 1 Boqorradii qaybaha 1 ilaa 11; 2 Taariikhdii qaybaha 1 ilaa 9; Sharciga Kunoqoshadiisa 17:17.