Enda pane zvauri kuda

Zvapupu zvaJehovha

Sarudza Mutauro Shona

ZVAKANGOITIKA ZVEGA HERE?

Guruu reBarnacle

Nyanzvi dzesainzi dzinoongorora mhuka dzakagara dzazviona kare kuti tupuka tunonzi mabarnacle tunokwanisa kunyatsonamira zvakasimba pamatombo, munofambwa namo uchinopinda mungarava, nepangarava. Zvinonzi guruu remabarnacle nderemhando yepamusoro kupfuura chero ripi zvaro rinogadzirwa nevanhu. Nyanzvi idzi dzakatozozvizivawo munguva shoma yapfuura kuti zvinombofamba sei kuti mabarnacle akwanise kunamira pazvinhu zvinyoro.

Funga izvi: Vaongorori vakaona kuti mabarnacle anenge achochonywa paanotanga kugona kushambira anotanga aongorora ozosarudza pekunamira pakakodzera. Kana angopawana, anobva aburitsa twumvura twemhando mbiri. Mhando yekutanga yakawanda mafuta saka inoita kuti pari kuda kunamirwa pacho pasava nemvura. Inoitawo kuti mhando yechipiri yakagadzirwa nemapuroteni anonzi maphosphoprotein inyatsobata.

Musanganiswa uyu unobva wava guruu rakasimba chaizvo zvekuti kunyange utachiona haugoni kurikanganisa. Kusimba kwakaita guruu racho kunokosha nekuti barnacle racho richaita upenyu hwaro hwese rakanamira ipapo.

Mabarnacle, uye chikamu chiri kuratidza guruu remabarnacle

Kugadzirwa kunoitwa guruu nemabarnacle kwakaoma kunzwisisa kupfuura zvaifungwa nenyanzvi dzesainzi. Mumwe aiva muboka rakatanga kunzwisisa magadzirirwo aya akati: “Inzira inoshamisa inoita kuti guruu rikwanise kunama pazvinhu zvinyoro.” Zvavakawana izvi zvingangobatsira vanoita zvekutsvakurudza kuti vagadzire guruu rinogona kushandiswa mumvura, uyewo rekushandisa muzvinhu zvemagetsi nepakurapa varwere.

Unofungei? Zvakangoitika zvega here kuti mabarnacle akwanise kugadzira guruu?