Accessibility setting

Sarudza Mutauro

Enda kuMenu Inodzika Kuruboshwe

Enda pane zvauri kuda

Zvapupu zvaJehovha

Shona

Tinofanira Kunamata Zvifananidzo Here?

Tinofanira Kunamata Zvifananidzo Here?

Mhinduro yeBhaibheri

Hatifaniri kunamata zvifananidzo. Bhuku rinonzi New Catholic Encyclopedia richitaura nezvemitemo yakapiwa rudzi rwevaIsraeri naMwari, rinoti: “Nyaya dzakasiyana-siyana dziri muBhaibheri dzinoratidza kuti pakanga pasingashandiswi zvifananidzo pakunamata Mwari.” Ona zvinotaurwa nemavhesi aya eBhaibheri:

  • “Usazvigadzirira mufananidzo wakavezwa, kana mufananidzo wechinhu chero chipi zvacho chiri kumatenga kumusoro, kana chiri panyika pasi, kana chiri mumvura pasi penyika. Usazvikotamira kana kunyengedzwa kuti uzvishumire, nokuti ini Jehovha Mwari wako ndiri Mwari anoda kuzvipira kwakazara.” (Eksodho 20:4, 5) Sezvo Mwari achida “kuzvipira kwakazara,” haafari kana tikapa rukudzo kana kuti tikanamata zvifananidzo, mapikicha, zvidhori, zvivezwa, kana zviratidzo.

  • ‘Handizopi kurumbidzwa kwangu kuzvifananidzo.’ (Isaya 42:8, Bhaibheri Dzvene MuChishona Chanhasi) Mwari haadi kuti vanhu vamunamate vachishandisa zvifananidzo. Vamwe vaIsraeri pavakaedza kunamata Mwari vachishandisa chifananidzo chemhuru, Mwari akati vakanga vaita “zvinhu zvakaipa kwazvo.”Eksodho 32:7-9, Bhaibheri Rinoyera.

  • “Hatifaniri kufunga kuti Mwari akafanana nendarama kana sirivha kana dombo, kufanana nechimwe chinhu chakavezwa nounyanzvi nouchenjeri hwomunhu.” (Mabasa 17:29) Kusiyana nevanhu vechihedheni avo vanowanzoshandisa mifananidzo ‘yakavezwa nounyanzvi nouchenjeri hwomunhu,’ vaKristu vanofanira ‘kufamba nokutenda, kwete nokuona,’ rinodaro Bhaibheri.—2 VaKorinde 5:7.

  • “Zvichenjererei pazvidhori.” (1 Johani 5:21) Mirayiro yakapiwa rudzi rwevaIsraeri uye vaKristu, inoratidza kuti nguva dzose Bhaibheri rinoti dzidziso yokuti Mwari anoda kunamatwa pachishandiswa zvifananidzo nezviratidzo ndeyenhema.

 

Inzwa zvimwe

Sei Zvapupu zvaJehovha Zvisingashandisi Muchinjikwa?

Kunyange zvazvo tiri vaKristu, isu hatishandisi muchinjikwa. Chikonzero nei?

Jesu Akafira Pamuchinjikwa Here?

Vakawanda vanoti muchinjikwa ndicho chiratidzo chevaKristu. Tinofanira kuushandisa pakunamata here?

Tsigira Kunamata Kwechokwadi

Idambudziko ripi raungasangana naro pakuedza kutsanangurira vamwe zvaunotenda? Ungavaudza sei asi usingavagumburi?