Accessibility setting

Sarudza Mutauro

Enda kuMenu Inodzika Kuruboshwe

Enda pakanzi zviri mukati

Enda pane zvauri kuda

Zvapupu zvaJehovha

Shona

NHARIREYOMURINDI DECEMBER 2012

Vakawana Chimwe Chinhu Chiri Nani Kupfuura Krisimasi

Vakawana Chimwe Chinhu Chiri Nani Kupfuura Krisimasi

MAMIRIYONI evaKristu haapembereri Krisimasi. Vanoona sei chisarudzo chavakaita? Vanonzwa sokuti vari kurasikirwa here? Vana vavo vanonzwa sokuti vari kunyimwa chimwe chinhu here? Chimbonzwa zvinotaurwa nevamwe veZvapupu zvaJehovha vari munyika yose panyaya iyi.

Eve

Kuyeuka Jesu Kristu: “Ndisati ndava mumwe weZvapupu zvaJehovha ndaienda kuchechi pano neapo. Ndaingoenda paKrisimasi nepaIsita chete. Kunyange zvakadaro, ndakanga ndisingambonyatsofunga nezvaJesu Kristu. Handichapembereri Krisimasi, asi ndinoenda kumisangano yechiKristu kaviri pavhiki uye ndinotodzidzisa vamwe zvinotaurwa neBhaibheri nezvaJesu!”—EVE, AUSTRALIA.

Reuben

Mufaro unobva pakupa vamwe zvipo: “Ndinofara chaizvo kana mumwe munhu akangoerekana andipa chipo ndisingambozvitarisiri! Ndinofarirawo kugadzira makadhi nokudhirowa mifananidzo ndichipa vanhu nokuti zvinoita kuti vambofara uye ini wacho ndinofarawo.”—REUBEN, NORTHERN IRELAND.

Emily

Kubatsira vanotambura: “Tinonakidzwa nokubikira vanhu vanorwara zvokudya. Dzimwe nguva tinovapa maruva, makeke, kana kuti chipo chiduku kuti vafare. Kuita izvozvo kunotifadza nokuti tinogona kuvashanyira chero panguva ipi yegore.”—EMILY, AUSTRALIA.

Wendy

Nguva yokumboonana semhuri: “Mhuri yedu painoungana tisingamhanyi-mhanyi, vana vedu vanobva vazivana nehama dzedu dzinosanganisira vanababamunini, vanatete nanamainini uye vanasekuru nanambuya. Hatinetseki nokufunga kushanyira hama dzedu kana zororo rasvika nokuti tinogara tichivashanyira uye vanoziva kuti tinovashanyira nokuti tinovada.”—WENDY, CAYMAN ISLANDS.

Sandra

Rugare: “Nguva yeKrisimasi ine zvakawanda zvokuita zvokuti vakawanda havafungi nezverugare. Iye zvino ndava nepfungwa dzakagadzikana nokuti ndakadzidza zvatinovimbiswa neBhaibheri. Ndava kuziva kuti vana vangu vachava neramangwana rinofadza.”—SANDRA, SPAIN.