Enda pane zvauri kuda

Enda kuMenu Inodzika Kuruboshwe

Enda pakanzi zviri mukati

Zvapupu zvaJehovha

Shona

Purogiramu yeUshumiri Hwedu Uye Kurarama kwechiKristu  |  June 2017

 KURARAMA KWECHIKRISTU

Tsigira Zvinodiwa naJehovha Panyaya Yekuzvibata

Tsigira Zvinodiwa naJehovha Panyaya Yekuzvibata

Jehovha Mwari ane mitemo yaakapa vanhu pamararamiro avanofanira kuita. Semuenzaniso, anoti wanano mubatanidzwa wemurume nemudzimai uye vanofanira kuramba vari vese. (Mt 19:4-6, 9) Anovenga zvinhu zvese zvinoratidza kusazvibata. (1VaK 6:9, 10) Anototiudza zvatinofanira kufunga nezvazvo panyaya yemapfekero nekushambidzika kwatinoita, kuti tisafanana nenyika.—Dhe 22:5; 1Ti 2:9, 10.

Mazuva ano, vakawanda vanoramba kuita zvinotaurwa naJehovha. (VaR 1:18-32) Vanotevedzera ruzhinji pakusazvibata, pamapfekero avo uye pakushambidzika. Vakawanda havatombonyari nezvakaipa zvavanoita uye vanotoshora vaya vanenge vasingaiti zvinhu izvozvo.—1Pe 4:3, 4.

SeZvapupu zvaJehovha, hatifaniri kunyara kuita zvinodiwa naMwari. (VaR 12:9) Zvii zvatinofanira kuita? Tinofanira kuudza vamwe zvinodiwa naMwari tisingavagumburi. Isuwo vacho tinofanira kurarama tichitevedzera zvinodiwa naMwari. Semuenzaniso, patinenge tichitenga hembe, tinogona kuzvibvunza kuti: ‘Zvandiri kusarudza zvinoratidza kuti ndine mafungiro aJehovha here kana kuti enyika? Mapfekero angu anoratidza kuti ndiri muKristu anotya Mwari here?’ Kana kuti patinenge tichisarudza mafirimu ekuona, tinogona kuzvibvunza kuti: ‘Jehovha aizondibvumira here kuona firimu iri? Zvinhu zvirimo zvinoratidza kuzvibata kunodiwa naMwari here? Zvandinosarudza kuona zvichaita kuti zvindiomere here kuva munhu anozvibata? (Pis 101:3) Hazvingagumburi vanhu vari mumhuri mangu kana kuti vamwewo vanhu here?’—1VaK 10:31-33.

Nei zvichikosha kuti titevedzere zvinodiwa naJehovha panyaya yekuzvibata? Kwasara nguva pfupi kuti Kristu Jesu aparadze vanhu vanoita zvakaipa. (Eze 9:4-7) Vanhu vanoita zvinodiwa naMwari ndivo chete vachapona. (1Jo 2:15-17) Saka ngatitsigirei zvinhu zvinodiwa naJehovha panyaya yekuzvibata kuitira kuti vanoona mararamiro edu akanaka vamukudze.—1Pe 2:11, 12.

Hembe dzandinosarudza dzinoratidza kuti ndiri munhu akaita sei?

ONA VHIDHIYO INONZI IVA SHAMWARI YAJEHOVHA—MURUME HWANI, MUDZIMAI HWANI, WOZOPINDURA MIBVUNZO INOTEVERA:

  • Zvakanakirei kutevedzera zvinodiwa naJehovha?

  • Nei vabereki vachifanira kudzidzisa vana vavo zvinodiwa naJehovha panyaya yewanano kubvira vachiri vadiki?

  • Zvii zvingaitwa nevana uye vanhu vakuru pakubatsira vamwe kuti vazowanawo makomborero achapiwa naMwari?