Vanhu pasi rese vari kutyira kuti panogona kuitika hondo yenyukireya nekuti nyika dzine simba kupfuura dzimwe hadzisi kuderedza uwandu hwezvombo zvadzo zvenyukireya asi dziri kutogadzira zvimwe zvakawanda. Vari kutyira kuti kuwedzera kweuwandu hwezvombo zvenyukireya kunogona kuita kuti hondo yacho itange chero nguva. Vamwewo vari kutyira kuti kana pakava nenyika inoshandisa chombo chimwe chete chidiki chenyukireya zvinogona kukonzera kuti pave nehondo huru yenyukireya inoparadza pasi rese. Maererano neBulletin of the Atomic Scientists, tiri kurarama, “panguva yekuti hondo yenyukireya inogona kungoerekana yatanga.”

 Hondo yenyukireya ichaitika here? Kana ikaitika, pane chichasara chichirarama here pasi pano? Chii chingatibatsira kuti tisararama tichitya hondo yenyukireya? Bhaibheri rinoti kudii?

Zviri munyaya ino

•  Bhaibheri rinotaura kuti kuchaitika hondo yenyukireya here?

•  Mwari achabvumira kuti pave nehondo yenyukireya here?

•  Pasi redu richaparara here?

•  Chii chingakubatsira kuti usararama uchitya hondo yenyukireya?

•  Bhaibheri rinoti kuchava neAmagedhoni yenyukireya here?

•  Bhaibheri rinoti hondo dzichapedzwa sei?

•  Bhuku reBhaibheri raZvakazarurwa rinotaura nezvehondo yenyukireya here?

 Bhaibheri rinotaura kuti kuchaitika hondo yenyukireya here?

 Bhaibheri harina parinonyatsotaura nezvehondo yenyukireya. Asi rakagara rataura zvinhu zviri kuitika uye maitiro evanhu atiri kuona pari zvino. Zvinhu izvozvo ndizvo zviri kuita kuti vanhu vagare vachityira kuti hondo yenyukireya inogona kuitika.

 Ona kuti zviri mumavhesi emuBhaibheri anotevera zvinopindirana sei nezvinhu zviri kuitika panyika:

 Mavhesi eBhaibheri: Vadzidzi vaJesu vakabvunza kuti: “Chii chichava chiratidzo chekuti mavapo uye chekuti nyika yava kumagumo kwayo?” Jesu akapindura kuti: “Rudzi ruchamukira rudzi uye umambo huchamukira umambo.”—Mateu 24:3, 7.

 Zviri kuitika munyika: Nyika dzakawanda, kusanganisira dziya dzine zvombo zvenyukireya, dziri kuwedzera kurwisana.

 “Mumakore apfuura, munyika dzakawanda vanhu vakawedzera kurwisana.”—The Armed Conflict Location & Event Data Project.

 Vhesi yeBhaibheri: “Munguva yekuguma mambo wekumaodzanyemba achasundidzirana [namambo wekuchamhembe].”—Dhanieri 11:40.

 Zviri kuitika munyika: Nyika dzisingawirirane dziri kusundidzirana kana kuti kukwikwidzana dzichirwira ukuru nesimba, sezvakagara zvataurwa neBhaibheri. Nyika dzine zvombo zvakawanda zvenyukireya hadzisi hadzo kurwisana, asi dziri kuramba dzichiwedzera kuvandudza zvombo zvadzo zvenyukireya.

 “Mumakore 10 apfuura, takaona kuti nyika dziri kuwedzera kurwisana, uye pamwe pacho nyika dzine simba ndidzo dzinenge dzichitsigira nyika diki dzinenge dzichirwisana.”—The Uppsala Conflict Data Program.

 Mavhesi eBhaibheri: ‘Mumazuva ekupedzisira, nguva dzakaoma, dzinonetsa kurarama madziri dzichasvika. Nekuti vanhu vachange . . . vasingatombodi kubvumirana, vachitaura zvenhema nezvevamwe, vasingazvidzori, vachityisa.’—2 Timoti 3:1-3.

 Zviri kuitika munyika: Sezvinoita vanhu vakawanda mazuva ano, vatungamiriri venyika havasi kubvumirana pazvinhu zvakawanda. Asi panzvimbo pekuti vatsvage nzira dzekuti vawirirane, vanowanzoedza kugadzirisa zvinhu nekutyisidzirana kana kuti kurwisana. Maitiro akadai ndiwo anoita kuti zviite sekuti hondo yenyukireya ichatoitika.

 “Kana pakasava nenzira yakanaka yekuti vanhu vataurirane zvakanaka kuti vasarwisane, hondo dzichauraya vanhu vakawanda.”—S. Saran and J. Harman, World Economic Forum.

 Mwari achabvumira kuti pave nehondo yenyukireya here?

 Bhaibheri harina zvarinotaura. Rinongotaura kuti “zvinhu zvinotyisa,” zvaizoitika panguva yatiri kurarama. (Ruka 21:11) Muenzaniso wezvinhu zvakadai ndewemabhomba eatomu akakandwa panguva yeHondo Yenyika Yechipiri. Bhaibheri rinotsanangura kuti nei Mwari achisiya hondo dzichiitika. Kuti udzidze zvimwe, ona vhidhiyo yakanzi Nei Mwari Achibvumira Kutambura?

 Pasi redu richaparara here?

 Kwete. Kunyange kudai vanhu vaizoshandisazve zvombo zvavo zvenyukireya, Mwari haazobvumire kuti vasvike pakuparadza zvinhu zvese panyika. Bhaibheri rinotaura kuti pasi redu richaramba riripo nekusingaperi uye kuti vanhu vachararama panyika nekusingaperi.

 Vamwe vanofunga kuti mune remangwana, hondo yenyukireya ichaparadza nyika, yoisvibisa, uye pachangosara vanhu vashomanana vanenge vachiomerwa kurarama pairi. Asi Bhaibheri rinotaura kuti zvese zvingakonzerwa nehondo zvichagadziriswa.

 Musiki wedu akagadzira nyika ichikwanisa kuzvigadziridza yega kana yakanganiswa. Asi Mwari achazoshandisa simba rake kuti pasi ridzokere pakunaka kwaro; richava musha wevanhu wakanaka samare.—Pisarema 37:11, 29; Zvakazarurwa 21:5.

 Chii chingakubatsira kuti usararama uchitya hondo yenyukireya?

 Vamwe vanogona kurarama vachitya hondo yenyukireya, izvo zvinosanganisira kutyira kuti hondo yakadaro ichaerekana yaitika uyewo kutya zvaichazokonzera. Vanhu vakadaro vanogona kubatsirwa nemazano ari muBhaibheri uye zvarinovimbisa. Rinovabatsira sei?

 Bhaibheri rinotsanangura kuti nyika ichange yakanaka mune ramangwana, uye vanhu vachagara zvakanaka, vachifara. Kudzidza nezvetariro iyi kunogona kuita ‘sechinhu chinotitsigisa,’ zvoita kuti tisanyanye kunetseka. (VaHebheru 6:19) Tinogonawo kuderedza kunetseka kwatinoita kana tikararama tichifunga nezvezuva rimwe chete panguva, tisinganyanye kunetseka nezvekuti zvii zvichaitika mune remangwana. Sezvakataurwa naJesu, “zuva rinotevera richava nekuzvidya mwoyo kwaro.”—Mateu 6:34.

 Zvakanaka chaizvo kuti tese zvedu tisaremedza pfungwa dzedu, toramba takadzikama. Tinogona kuita izvi nekuderedza kuona kana kuteerera mashoko anoita kuti tizvidye mwoyo ane chekuita nenyaya dzenyukireya dziri kuitika munyika. Mashoko aya anosanganisira hurukuro dzinoitwa nevanhu, zvinhu zviri kufungidzirwa kuti zvingangoitika, uye maonero evamwe panyaya iyi. Izvi hazvirevi hazvo kuti hatina basa nezviri kuitika. Asi tinenge tichitora matanho ekusaremedza pfungwa dzedu nezviitiko zvatisingakwanisi kudzora uye zvinogona kusatomboitika.

 Chimbosiyana nenhau dzinotaura nyaya dzakaipa wogara uchifunga zvinhu zvinokubatsira muupenyu hwako.

 Kudzidza zvakawanda nezvevimbiso dzaMwari kunogona kuita kuti uve netariro, ufare, uye ugadzikane.

 Bhaibheri rinoti kuchava neAmagedhoni yenyukireya here?

 Vamwe vanhu vanofunga kuti Amagedhoni ihondo yepasi rese yenyukireya. Vanenge vachifungidzira zvinhu zvinorwadza zvichakonzerwa nehondo yakadaro.

 Asi Bhaibheri rinoshandisa shoko rekuti “Amagedhoni” richitaura nezvehondo ichaitika pakati ‘pemadzimambo enyika yese,’ kana kuti hurumende dzevanhu, naMwari. a (Zvakazarurwa 16:14, 16) Pahondo yeAmagedhoni Mwari haasi kuzoparadza nyika uye kuuraya vanhu vese sezvinoitwa nemabhomba enyukireya. Asi achaparadza vanhu vakaipa chete, uye izvi zvichaita kuti vanhu vagare zvakanaka, vasina chekutya.—Pisarema 37:9, 10; Isaya 32:17, 18; Mateu 6:10.

 Bhaibheri rinoti hondo dzichapedzwa sei?

 Jehovha b Mwari acharatidza simba rake panyika dziri kurwisana kuburikidza nekugumisa kunetsana kwavo uye kuparadza zvombo zvavo zvehondo. Achaita izvi achishandisa Umambo hwake, hurumende yekudenga ichatonga pasi rese.—Dhanieri 2:44.

 Umambo hwaMwari huchadzidzisa vanhu kuti vagarisane zvakanaka, vachiwirirana. Sezvo pachange pangova nehurumende imwe chete inenge yava kutonga pasi rese, panenge pasisina kunetsana kwehurumende kwatiri kuona mazuva ano, uye vanhu havazodzidzi kurwa zvakare! (Mika 4:1-3) Panyika pachange paita sei? “Munhu wese achagara asina chekutya ari pakati pemizambiringa yake nemionde yake, uye hapana achaita kuti atye.”—Mika 4:4, Today’s English Version