Tsamba kuvaHebheru 3:1-19
3 Saka imi hama dzangu tsvene, vamwe vevakadanwa kudenga,+ fungai nezvaJesu, muapostora uye mupristi mukuru watinozivisa kuti tinotenda maari.*+
2 Akanga akatendeka kuna uya akamugadza,+ sezvakanga zvakaitawo Mozisi muimba yese yaMwari.+
3 Nekuti iye* anooneka kuti akakodzera kukudzwa+ kupfuura Mozisi, sezvo uya anovaka imba achikudzwa kupfuura imba yacho pachayo.
4 Ichokwadi kuti imba imwe neimwe ine munhu anoivaka, asi akavaka zvinhu zvese ndiMwari.
5 Mozisi akanga akatendeka paaishanda muimba yaMwari kuti zvive uchapupu hwezvinhu zvaizotaurwa pava paya,
6 asi Kristu akanga akatendeka semwanakomana+ pakutungamirira zvinhu muimba yaMwari. Isu tiri imba yake+ ndokunge tabatisisa rusununguko rwedu rwekutaura uye tariro yatinozvirumbidza nayo kusvikira kumagumo.
7 Saka sekutaura kunoita mweya mutsvene kuti,+ “Nhasi kana mukateerera inzwi rake,
8 musaomesa mwoyo yenyu sepaya pamakaita kuti ndishatirwe zvikuru, sepazuva remuedzo murenje,+
9 pandakapikiswa nemadzitateguru enyu achindiedza, kunyange zvazvo akanga aona mabasa angu kwemakore 40.+
10 Ndokusaka ndakatsamwiswa nechizvarwa ichi ndikati: ‘Vanogara vachitsauka mumwoyo yavo, uye havasati vava kuziva nzira dzangu.’
11 Saka ndakapika ndakatsamwa ndichiti: ‘Havazopindi muzororo rangu.’”+
12 Hama dzangu, chenjerai kuti pasava nemumwe wenyu anotanga kuva nemwoyo wakaipa usina kutenda achibva pana Mwari mupenyu;+
13 asi rambai muchikurudzirana zuva rega rega, chero bedzi achiri “Nhasi,”+ kuti parege kuva nemumwe wenyu angaomeswa nesimba rinonyengera rechivi.
14 Nekuti tinobatana naKristu pane zvaari kuita, ndokunge chete tabatisisa kusvikira kumagumo chivimbo chataiva nacho pakutanga.+
15 Sezvo zvichinzi, “Nhasi kana mukateerera inzwi rake, musaomesa mwoyo yenyu sepaya pamakaita kuti ndishatirwe zvikuru.”+
16 Nekuti ndivanaani vakanzwa asi vakaita kuti ashatirwe zvikuru? Havasi vese vaya vakabuda muIjipiti vachitungamirirwa naMozisi here?+
17 Uyezve, ndevapi vakatsamwisa Mwari kwemakore 40?+ Havasi vaya vakatadza, vane zvitunha zvakawira murenje here?+
18 Uye ndivanaani vaakapikira kuti havasi kuzopinda muzororo rake? Havasi vaya vakanga vasingateereri here?
19 Saka tiri kuona kuti vakatadza kupinda nekuti vaisava nekutenda.+
