Maraki 1:1-14
1 Shoko rinokosha:
Iri ndiro shoko raJehovha kuna Israeri, raakataura achishandisa Maraki:*
2 “Ndakakuratidzai rudo,”+ anodaro Jehovha.
Asi imi munoti: “Makatiratidza rudo sei?”
“Isau akanga asiri mukoma waJakobho here?”+ ndizvo zvinotaurwa naJehovha. “Asi ndakada Jakobho,
3 ndikavenga Isau;+ uye ndakaita kuti makomo ake asare asina chinhu,+ ndikaita kuti nhaka yake isare ichigarwa nehunguhwe* dzemurenje.”+
4 “Kunyange zvazvo Edhomu achiti, ‘Takaparadzwa, asi tichadzoka tovaka nzvimbo dzakaparadzwa,’ zvanzi naJehovha wemauto, ‘Vachavaka, asi ini ndichaputsa, uye vanhu vachavatumidza kuti, “nharaunda yezvakaipa” uye “vanhu vakatukwa naJehovha nekusingaperi.”+
5 Maziso enyu achazviona, uye muchati: “Jehovha ngaakudzwe munharaunda yeIsraeri.”’”
6 “‘Mwanakomana anokudza baba vake;+ uye muranda anokudza tenzi wake. Saka kana ndiri baba,+ sei ndisiri kukudzwa sezvandinofanira kuitwa?+ Kana ndiri tenzi, sei ndisiri kutyiwa* sezvandinofanira kuitwa?’ ndizvo zvinotaurwa naJehovha wemauto kwamuri imi vapristi vanozvidza zita rangu.+
“‘Asi imi munoti: “Takazvidza zita renyu sei?”’
7 “‘Nekupa zvekudya zvakasvibiswa* paatari yangu.’
“‘Uye munoti: “Takakusvibisai sei?”’
“‘Nekutaura kwenyu kuti: “Tafura yaJehovha+ chinhu chinozvidzwa.”
8 Pamunopa chibayiro chemhuka yakapofumara munoti: “Hazvina kuipa.” Uye pamunopa mhuka yakaremara kana inorwara munoti: “Hazvina kuipa.”’”+
“Chimboedzai kupa gavhuna wenyu mhuka dzakadaro. Angakufarirai here, kana kuti angakugamuchirai zvakanaka here?” anodaro Jehovha wemauto.
9 “Zvino ndapota, kumbirai Mwari kuti atinzwire nyasha. Kana imi muchipa mipiro yakadaro, angakunzwirai nyasha here?” anodaro Jehovha wemauto.
10 “Ndiani pakati penyu anoda kuvhara masuo?*+ Nekuti munotoda kubhadharwa kuti mubatidze moto paatari yangu.+ Handifadzwi nemi,” anodaro Jehovha wemauto, “uye handifariri mipiro yamunopa.”+
11 “Nekuti zita rangu richava guru pakati pemarudzi kubvira kumabvazuva kusvika kumavirira.+ Utsi hwezvibayiro huchapfungaidzwa munzvimbo dzese uye zita rangu richaunzirwa mipiro sechipo chakachena; nekuti zita rangu richava guru pakati pemarudzi,”+ anodaro Jehovha wemauto.
12 “Asi imi muri kurisvibisa*+ muchiti, ‘Tafura yaJehovha yakasviba, uye mipiro inoiswa pairi nezvekudya zviri pairi zvinhu zvinozvidzwa.’+
13 Munotiwo, ‘Chokwadi izvi zvinonetesa!’ uye munozvifembedza muchizvishora,” anodaro Jehovha wemauto. “Uye munounza mhuka dzakabiwa, nedzakaremara, nedzinorwara. Munotouya kuzopa zvinhu zvakadaro! Ndingazvigamuchira here?”+ anodaro Jehovha.
14 “Munhu ane unyengeri ngaatukwe; anopika uye anopa chibayiro chisina kunaka* kuna Jehovha asi pazvipfuwo zvake paine mhuka hono yakanaka. Nekuti ndiri Mambo mukuru,”+ anodaro Jehovha wemauto, “uye zita rangu richatyiwa pakati pemarudzi.”+
Mashoko Emuzasi
^ Kureva kuti “Nhume Yangu.”
^ Iyi imhuka yakada kufanana negava.
^ Kana kuti “kuremekedzwa.”
^ ChiHeb., “chingwa chakasvibiswa.”
^ Zvinoratidza sekuti pari kureva basa rekuvhara masuo etemberi.
^ Dzimwe shanduro dzinoti, “kundisvibisa.”
^ Kana kuti “chakaremara.”
