Mapisarema 103:1-22
Rwiyo rwaDhavhidhi.
103 Regai ndirumbidze* Jehovha;Zvese zviri mandiri ngazvirumbidze zita rake dzvene.
2 Regai ndirumbidze* Jehovha;Ngandirege kukanganwa zvese zvaakaita.+
3 Anoregerera zvitadzo zvako zvese+Uye anoporesa zvirwere zvako zvese;+
4 Anobudisa upenyu hwako mugomba*+Uye anokupfekedza korona yerudo rwake rusingachinji netsitsi dzake.+
5 Anokugutsa nezvinhu zvakanaka+ kweupenyu hwako hwese,Zvekuti udiki hwako hunomutsidzirwa sehwegondo.+
6 Jehovha anoita zvakarurama+Uye anotonga zvakarurama vese vakadzvinyirirwa.+
7 Akazivisa Mozisi nzira dzake,+Uye akazivisa vanakomana vaIsraeri mabasa ake.+
8 Jehovha ane ngoni netsitsi,*+Anononoka kutsamwa uye azere nerudo rusingachinji.*+
9 Haazorambi achingotiwanira mhosva,+Uyewo haazorambi akatsamwa nekusingaperi.+
10 Haana kutiitira zvinoenderana nezvivi zvedu,+Uye haana kutitsiva zvinoenderana nezvitadzo zvedu.+
11 Nekuti kukwirira kwakaita matenga kupfuura nyika,Ndiko kukura kwakaita rudo rwake rusingachinji rwaanoratidza vaya vanomutya.+
12 Sekuva kure kwakaita kumabvazuva kubva kumavirira,Saizvozvowo akaisa zvitadzo zvedu kure nesu.+
13 Sababa vanonzwira tsitsi vanakomana vavo,Jehovha akanzwira tsitsi vaya vanomutya.+
14 Nekuti anonyatsoziva maumbirwo atakaitwa,+Achiyeuka kuti tiri guruva.+
15 Kana ari munhu, mazuva ake akaita seeuswa;+Anotumbuka seruva remusango.+
16 Asi kana mhepo ikangovhuvhuta, rinenge risisipo,Sekunge risina kumbobvira ravapo.*
17 Asi rudo rwaJehovha rusingachinji ruriko nariini nariiniKune vaya vanomutya,+Uye kururama kwake anokuratidza vana vevana vavo,+
18 Vaya vanochengeta sungano yake+Uye vaya vanongwarira kuchengeta mirayiro yake.
19 Jehovha akanyatsosimbisa chigaro chake cheumambo kumatenga;+Uye umambo hwake hunotonga zvinhu zvese.+
20 Rumbidzai Jehovha, imi ngirozi dzake dzese,+ dzine simba guru,Munoita zvaanotaura,+ muchiteerera inzwi rake.*
21 Rumbidzai Jehovha, imi mese mauto ake,+Vashumiri vake vanoita kuda kwake.+
22 Rumbidzai Jehovha, imi mese mabasa ake,Munzvimbo dzese dzaanotonga.
Regai ndirumbidze* Jehovha.
Mashoko Emuzasi
^ Kana kuti “Mweya wangu ngaurumbidze.”
^ Kana kuti “Mweya wangu ngaurumbidze.”
^ Kana kuti “muguva.”
^ Kana kuti “nenyasha.”
^ Kana kuti “azere nemutsa.”
^ ChiHeb., “Uye nzvimbo yaro haizorizivi.”
^ ChiHeb., “muchiteerera inzwi reshoko rake.”
^ Kana kuti “Mweya wangu ngaurumbidze.”
