Jeremiya 33:1-26
33 Shoko raJehovha rakauya kuna Jeremiya kechipiri, paakanga achakavharirwa muChivanze cheVarindi,+ richiti:
2 “Zvanzi naJehovha Muiti wenyika, iye Jehovha akaiumba akaisimbisa kwazvo; Jehovha ndiro zita rake,
3 ‘Shevedzera kwandiri, uye ini ndichakupindura ndobva ndangokuudza zvinhu zvikuru nezvisingagoni kunzwisiswa zvausati waziva.’”+
4 “Nekuti zvanzi naJehovha Mwari waIsraeri pamusoro pedzimba dzeguta rino uye dzimba dzemadzimambo eJudha dzakaputswa nemhaka yemirwi yakagadzirirwa kukomba guta uye nemhaka yebakatwa,+
5 uye pamusoro pevaya vari kuuya kuzorwisa vaKadheya, vachizadza nzvimbo idzi nezvitunha zvevaya vandakauraya ndakatsamwa uye ndakagumbuka, vaya vane zvakaipa zvakaita kuti ndivanzire guta rino chiso changu:
6 ‘Ndichariporesa uye ndichaita kuti rive neutano+ uye ndichavarapa ndovapa rugare rukuru nechokwadi.+
7 Ndichadzosa nhapwa dzeJudha nenhapwa dzeIsraeri,+ uye ndichadzivaka sezvandakaita pakutanga.+
8 Ndichadzinatsa pazvivi zvadzo zvese zvadzakanditadzira,+ uye ndichadziregerera zvivi zvadzo zvese uye kunditadzira kwadzakaita.+
9 Uye kwandiri guta rino richava zita rekupembera nemufaro, kurumbidzwa uye runako pamberi pemarudzi ese enyika achanzwa zvakanaka zvese zvandichaitira vanhu vangu.+ Vachatya uye vachadedera+ nekuda kwezvakanaka zvese uye rugare rwese rwandicharipa.’”+
10 “Zvanzi naJehovha: ‘Munzvimbo ino yamuchati idongo risina munhu kana zvipfuwo, mumaguta eJudha nemumigwagwa yeJerusarema yakaparadzwa, isina munhu kana mugari kana zvipfuwo, muchatangazve kunzwika
11 inzwi rekupembera nemufaro nenzwi remufaro mukuru,+ inzwi remurume ari kuroora nenzwi remwenga, inzwi revaya vanoti: “Ongai Jehovha wemauto, nekuti Jehovha akanaka;+ rudo rwake rusingachinji runogara nekusingaperi!”’+
“‘Vachauya nemipiro yekuonga muimba yaJehovha,+ nekuti ndichadzosa nhapwa dzenyika yacho, sezvazvaiva pakutanga,’ anodaro Jehovha.”
12 “Zvanzi naJehovha wemauto: ‘Munzvimbo ino yava dongo, isina munhu kana zvipfuwo, uye mumaguta ayo ese, muchavazve nemafuro ekuti vafudzi vazorodze zvipfuwo zvavo imomo.’+
13 “‘Mumaguta ekumakomo, nemumaguta enyika yakadzikira, nemumaguta ekumaodzanyemba, nemunyika yaBhenjamini, nemunzvimbo dzakapoteredza Jerusarema+ nemumaguta eJudha,+ zvipfuwo zvichapfuurazve nepasi pemaoko euya anenge achizviverenga,’ anodaro Jehovha.”
14 “‘Inzwai! Mazuva achasvika,’ ndizvo zvinotaurwa naJehovha, ‘andichazadzisa vimbiso yakanaka yandataura pamusoro peimba yaIsraeri neimba yaJudha.+
15 Mazuva iwayo uye panguva iyoyo ndichaita kuti patungire nhungirwa yakarurama yaDhavhidhi,*+ uye iye achaita kuti munyika yacho mutevedzerwe mutemo uye muve nekururama.+
16 Mazuva iwayo, Judha ichaponeswa+ uye Jerusarema richagara rakachengeteka.+ Uye richanzi: Jehovha Ndiye Kururama Kwedu.’”+
17 “Nekuti zvanzi naJehovha, ‘Pavazukuru vaDhavhidhi hapazomboshayikwi murume anogara pachigaro cheumambo cheimba yaIsraeri,+
18 uyewo kuvapristi vedzinza raRevhi hakuzoshayikwi murume anomira pamberi pangu kuti ape mipiro inopiswa, kuti apise mipiro yezviyo* uye kuti ape zvibayiro.’”
19 Shoko raJehovha rakauyazve kuna Jeremiya, richiti:
20 “Zvanzi naJehovha, ‘Kana mukakwanisa kuputsa sungano yangu ine chekuita nemasikati uye sungano yangu ine chekuita neusiku, kuti masikati neusiku zvirege kuuya panguva yazvo yakakodzera,+
21 sungano yangu nemushumiri wangu Dhavhidhi ichaputswawo,+ zvekuti haangavi nemwanakomana anotonga pachigaro chake cheumambo,+ uyewo sungano yangu nevapristi vedzinza raRevhi, vashumiri vangu,+ ichaputswawo.
22 Ndichaita kuti vana* vemushumiri wangu Dhavhidhi nevaRevhi vari kundishumira vawande seuto rekudenga risingaverengeki uye sejecha regungwa risingayereki.’”
23 Shoko raJehovha rakauyazve kuna Jeremiya, richiti:
24 “Hauna kunzwa here zviri kutaurwa nevanhu ava? Vari kuti, ‘Jehovha acharamba mhuri mbiri dzaakasarudza.’ Havasi kuremekedza vanhu vangu uye havachavaoni serudzi.
25 “Zvanzi naJehovha: ‘Sekudzika kwandakaita sungano yangu ine chekuita nemasikati neusiku,+ iyo mitemo* yekudenga neyepanyika,+
26 handizomborambiwo vana* vaJakobho nevemushumiri wangu Dhavhidhi uye handizoregi kutora vatongi pavana* vake kuti vatonge vazukuru* vaAbrahamu, Isaka, naJakobho. Nekuti ndichaunganidza nhapwa dzavo+ ndodzinzwira tsitsi.’”+
