Isaya 29:1-24
29 “Arieri* ine nhamo, iyo Arieri, guta rakadzikwa musasa naDhavhidhi!+
Rambai muchidaro gore negore;Mitambo yenyu yese ngairambe+ ichiitwa.
2 Asi ndichaunza dambudziko muArieri,+Uye pachava nekuchema nemariro,+Uye ichava sechoto cheatari yaMwari kwandiri.+
3 Ndichakudzikira musasa kumativi ese,Uye ndichakukomba nematandaNdokuvakira masvingo ekuti ndikurwise.+
4 Uchadzikiswa pasi;Uchataura uri pasi,Uye zvauchataura zvichanzwikira pasi pasi nemhaka yeguruva.
Inzwi rako richanzwika richibva muvhu+Seinzwi resvikiro,Uye mashoko ako achaita sekuzevezera kuri kubva muguruva.
5 Boka revavengi vako* richaita seupfu hwakatsetseka,+Boka revadzvinyiriri sehundi iri kupeperetswa.+
Zvichangoerekana zvaitika, pakarepo.+
6 Jehovha wemauto achafunga nezvakoNemabhanan’ana, nekudengenyeka kwenyika, neruzha rukuru,Nedutu nemvura ine simba nemarimi emoto unoparadza.”+
7 Vanhu vazhinji vemarudzi ese avo vari kurwa neArieri,+Ivo vese vari kurwa nayo,Shongwe dzekushandisa pakuirwisa,Nevaya vari kuita kuti itambudzike,Vachabva vaita sechiroto, chiratidzo cheusiku.
8 Chokwadi zvichaita sepanorota munhu ane nzara achidya,Asi anomuka aine nzara,*Uye sepanorota munhu ane nyota achinwa,Asi anomuka akaneta uye aine nyota.*
Ndizvo zvichaitawo boka remarudzi eseAri kurwa neGomo reZiyoni.+
9 Katyamadzwai uye shamiswai;+Zvipofumadzei, muve mapofu.+
Vadhakwa, asi kwete newaini;Vari kudzedzereka, asi kwete nedoro.
10 Nekuti Jehovha aita kuti mubatwe nehope huru;+Avhara maziso enyu, imi vaprofita,+Uye afukidza misoro yenyu, imi vaoni.+
11 Kwamuri, chiratidzo chese chinova semashoko ebhuku rakanamwa.+ Pavanoripa mumwe munhu anogona kuverenga vachiti: “Tinokumbira kuti uriverenge zvinonzwika,” iye achati: “Handikwanisi, nekuti rakanamwa.”
12 Uye pavanopa bhuku racho kune mumwe munhu asingagoni kuverenga, vachati: “Tinokumbira kuti uriverenge zvinonzwika,” iye achati: “Handitombogoni kuverenga.”
13 Jehovha anoti: “Vanhu ava vanouya kwandiri nemiromo yavo,Uye vanondikudza nemiromo yavo,+Asi mwoyo yavo iri kure chaizvo neni;Uye kunditya kwavo kunobva pamirayiro yevanhu yavakadzidziswa.+
14 Saka ndini ndichaitazve zvinhu zvinoshamisa nevanhu ava,+Nechishamiso pamusoro pechishamiso;Uye uchenjeri hwevanhu vavo vakachenjera huchaparara,Uye kunzwisisa kwevanhu vavo vakangwara kuchavigwa.”+
15 Vane nhamo vaya vanoshanda nesimba kuti vavanzire Jehovha zvavanoronga.*+
Mabasa avo anoitirwa munzvimbo ine rima,Vachiti: “Ndiani anotiona?
Ndiani anoziva nezvedu?”+
16 Chokwadi munomonyorora zvinhu!*
Muumbi anofanira kuonekwa seivhu here?+
Chinhu chakagadzirwa chingati here pamusoro peakachigadzira:
“Haana kundigadzira”?+
Uye chinhu chakaumbwa chingati here nezvemuumbi wacho:
“Haanzwisisi”?+
17 Munguva pfupi iri kuuya, Rebhanoni richashandurwa kuva munda wemichero,+Uye munda wemichero uchaonekwa sesango.+
18 Zuva iroro matsi dzichanzwa mashoko ebhuku racho,Uye maziso emapofu achaona ari pakasviba uye ari murima.+
19 Vanyoro vachafara kwazvo muna Jehovha,Uye varombo vari pakati pevanhu vachafarira Mutsvene waIsraeri.+
20 Nekuti mudzvinyiriri achange asisipo,Anozvirumbidza achasvika pamagumo ake,Uye vese vanogara vakateya kuita zvakaipa vachaparadzwa,+
21 Ivo vaya vanoita kuti vamwe vave nemhosva neshoko ravo renhema,Vaya vanoisira zviteyeso anorwira vanhu* pagedhi reguta,+Uye vaya vanoramba kuitira munhu akarurama zvinhu zvakarurama, vachipa zvikonzero zvisina musoro.+
22 Saka Jehovha, uyo akadzikinura Abrahamu+ ari kuti kuimba yaJakobho:
“Jakobho haachazonyari zvakare,Uyewo chiso chake hachizochenuruki zvakare.*+
23 Nekuti paanoona vana vake,Iro basa remaoko angu, pakati pake,+Vachatsvenesa zita rangu;Chokwadi vachatsvenesa Mutsvene waJakobho,Uye vacharemekedza Mwari waIsraeri zvikuru.+
24 Vaya vakatsauka vachanzwisisa,Uye vaya vanonyunyuta vachabvuma kurayiridzwa.”
Mashoko Emuzasi
^ Zvinogona kunge zvichireva kuti, “Choto cheAtari yaMwari,” zvimwe pachirehwa Jerusarema.
^ ChiHeb., “revanhu vausingazivi.”
^ Kana kuti “mweya wake uine nzara.”
^ Kana kuti “mweya wake uine nyota.”
^ Kana kuti “mazano avo.”
^ Kana kuti “Pfungwa dzenyu dzakarasika zvisingaiti!”
^ ChiHeb., “uya ari kutsiura.”
^ Kureva, kuchenuruka nemhaka yekunyadziswa uye kuodzwa mwoyo.
