Isaya 13:1-22
13 Mutongo pamusoro peBhabhironi+ wakaonekwa muchiratidzo naIsaya+ mwanakomana waAmozi:
2 “Misai chiratidzo*+ pagomo rine matombo ari pachena.
Shevedzerai kwavari, ninirai ruoko,Kuti vapinde mumasuo evakuru vakuru.
3 Ndapa murayiro kune vaya vandagadza.*+
Ndashevedza varwi vangu vane simba kuti varatidze kutsamwa kwangu,Ivo vanhu vangu vanopembera nemufaro vachizvikudza.
4 Teererai! Boka guru revanhu riri mumakomo;Vanonzwika sevanhu vazhinji!
Teererai! Mheremhere yeumambo,Yemarudzi akaungana!+
Jehovha wemauto ari kuunganidza uto kuti rirwe hondo.+
5 Vari kubva kunyika iri kure,+Kunogumira denga,Iye Jehovha nezvombo zvehasha dzake,Kuti vaparadze nyika yese.+
6 Ridzai mhere, nekuti zuva raJehovha rava pedyo!
Richauya sekuparadza kunobva kune Wemasimbaose.+
7 Ndokusaka maoko ese achashaya simba,Uye mwoyo wemunhu wese uchapera nekutya.+
8 Vanhu vavhunduka.+
Vari kugwinha-gwinha vachirwadziwa,Sezvinoita mukadzi ari kusununguka.
Vanotarisana vachitya,Zviso zvavo zvichiyuwira nekurwadziwa.
9 Inzwai! Zuva raJehovha riri kuuya,Riine utsinye nekushatirwa uye kutsamwa kukuru,Kuti riite kuti nyika ive chinhu chinotyisa,+Uye kuti riparadze vatadzi panyika.
10 Nekuti nyeredzi dzedenga nemapoka adzo*+Hadzizobudisi chiedza chadzo;Zuva richange rakasviba parinobuda,Uye mwedzi hauzovheneki.
11 Ndicharanga nyika nemhaka yezvakaipa zvayo,+Uye vakaipa nemhaka yekukanganisa kwavo.
Ndichagumisa kudada kwevanozvikudza,Uye ndichaninipisa vadzvinyiriri vanozvitutumadza.+
12 Ndichaita kuti vanhu vave vashoma kupfuura goridhe rakanatswa,+Uye kuti vanhu vave vashoma kupfuura goridhe rekuOfiri.+
13 Ndokusaka ndichaita kuti denga ridedere,Uye nyika ichazununguswa ichibva munzvimbo yayo+Nekuda kwekushatirwa kukuru kwaJehovha wemauto pazuva rekutsamwa kwake kukuru.
14 Semhara iri kuvhimwa uye sezvipfuwo zvisina anozviunganidza,Mumwe nemumwe achadzokera kuvanhu vake;Mumwe nemumwe achatizira kunyika yake.+
15 Munhu wese anowanikwa achabayiwa,Uye munhu wese anobatwa achaurayiwa nebakatwa.+
16 Vana vavo vacharoverwa pasi voitwa zvidimbu zvidimbu ivo vakatarisa.+Zvinhu zviri mudzimba dzavo zvichapambwa,Uye madzimai avo achabatwa chibharo.
17 Ndiri kuvamutsira vaMedhiya,+Avo vanoona sirivha seisiri chinhuUye vasingafariri goridhe.
18 Uta hwavo huchaparadza majaya;+Havazonzwiri tsitsi zvinobva muchiberekoKana kunzwira vana ngoni.
19 Uye Bhabhironi, umambo hunokudzwa kupfuura humwe hwese,*+Runako uye chidadiso chevaKadheya,+Richava semaguta eSodhomu neGomora paakaparadzwa naMwari.+
20 Harizombofi rakagarwa,Uyewo harizovi nzvimbo yekugara kwezvizvarwa nezvizvarwa.+
Hapana muArabhu achadzika tende rake imomo,Uye hapana vafudzi vachaita kuti zvipfuwo zvavo zvizorore imomo.
21 Zvisikwa zvemugwenga zvicharara pasi imomo;Dzimba dzavo dzichazara nemazizi mahombe.
Mhou dzichagara imomo,+Uye mbudzi dzemusango* dzichasvetuka-svetuka imomo.
22 Zvisikwa zvinoungudza zvichachema zviri mushongwe dzaro,Nehunguhwe* mumizinda yaro yakanaka chaizvo.
Nguva yaro yava kusvika, uye mazuva aro haazowedzerwi.”+
Mashoko Emuzasi
^ Kana kuti “bango rechiratidzo.”
^ ChiHeb., “vakatsveneswa vangu.”
^ ChiHeb., “nemaKesiri adzo,” pangava pachitaura nezveboka renyeredzi rinonzi Orioni nemamwe mapoka enyeredzi akaripoteredza.
^ Kana kuti “kushongedzwa kweumambo.”
^ Dzimwe shanduro dzinoti, “madhimoni akaita sembudzi.”
^ Iyi imhuka yakada kufanana negava.
