Faafalepuipui Ona o lo Latou Faatuatua—Rusia
Ua matuā faileagaina ma sauāina Molimau a Ieova e tusa ai ma le talafaasolopito i Rusia. A o faagasolo le senituri lona 20, na matuā tetee le malo o Rusia i Molimau a Ieova, e ui lava o i latou o ni tagatānuu e tausia le filemu ma usitaʻia tulafono. O le naunautaʻiga sa iai i le malo o le Soviet Union, ina ia faaliliueseina Molimau a Ieova mai la latou tapuaʻiga, e ala i le faatalitonu pe faamalosia i latou ina ia mulimuli i aʻoaʻoga a le Soviet. E faitau afe Molimau a Ieova na faaaunuua i Siberia. Na faasā ona iai ni a latou Tusi Paia po o ni lomiga faalelotu. Na matuā mataʻituina i latou i taimi uma, ma sa tatau ona faia faalilolilo a latou sauniga. Pe afai na maua i latou, na sasaina ma faaopoopo le umi e faafalepuipuiina ai.
Ae na amata ona suia le tulaga o mea i le 1991, ina ua amanaʻia faaletulafono e le malo o Rusia Molimau a Ieova, ma tuu atu le saʻolotoga e tapuaʻi ai e aunoa ma le toe faalavelave atu o leoleo. Peitaʻi, e leʻi umi lenā vaitaimi o le filemu.
I le 2009, na amata ona toe faateteleina teteega ma faasāsāaga ina ua lagolagoina e le Faamasinoga Maualuga a Rusia le faaiʻuga a se isi faamasinoga maulalo ifo, ina ia faailogaina le faapotopotoga a Molimau a Ieova “o ni ē e faatupu faalavelave.” Ina ua mavae le tele o tausaga o faia faamasinoga, iā Aperila 2017, na aumaia ai le faaiʻuga a le Faamasinoga Maualuga a Rusia ina ia tapunia faalapotopotoga faaletulafono a Molimau a Ieova ona o tuuaʻiga sesē i le faia o ni gaoioiga faatupu faalavelave. O lea, na faoa faamalosi ai e leoleo a Rusia meatotino ma fanua e patino i le faalapotopotoga a Molimau a Ieova, tapunia nofoaga e faia ai a latou tapuaʻiga, ma faapea mai o a latou lomiga faalelotu “e faatupu faalavelave.”
E leʻi gata ai i meatotino ma fanua osofaʻiga a leoleo a Rusia. Na latou osofaʻia foʻi Molimau a Ieova taʻitoʻatasi. Na latou faapea mai e iai le sootaga o le tapuaʻi o le tagata i lona lava fale ma le faalapotopotoga lea ua faasāina. Pe a osofaʻia e leoleo fale o uso ma tuafāfine, e latou te matuā sauāina ma tuʻifesili i latou. E tusa lava po o le ā le matutua o uso ma tuafāfine, ae ua puʻea, molia, ma faafalepuipuiina i latou pe nofo vaavaaia foʻi i o latou fale.
Talu ona faasā galuega a Molimau a Ieova iā Aperila 2017, ua faitau selau uso ma tuafāfine na taofia e faatali o latou faamasinoga po ua faafalepuipui foʻi, ona o moliaga o le faia o gaoioiga faatupu faalavelave. E oo mai iā Ianuari 18, 2023, ua toʻa 105 Molimau a Ieova ua faafalepuipuiina.
Matuā Tetee Tagata i Sauāga Ogaoga a le Malo o Rusia i Molimau a Ieova
O loo faaauau pea ona molia e leoleo i Rusia Molimau a Ieova i le faia o gaoioiga faatupu faalavelave, e ui lava i le matuā tetee o tagata i le lalolagi aoao i sauāga o loo faia pea i Molimau a Ieova. Peitaʻi, e iai faamasinoga i Rusia e latou te matuā lē lagolagoina le taʻua o Molimau a Ieova “o ni ē e faatupu faalavelave,” ma faalēaogāina moliaga faasaga i Molimau a Ieova i lalo o le Vaega 282 o le Russian Federation Criminal Code e faatatau i gaoioiga faatupu faalavelave. E ōgatusa na faaiʻuga ma se faaiʻuga ua toe teuteuina na faia e le Russian Supreme Court Plenum. Iā Oketopa 2021, na faamanino mai ai e lenā faamasinoga, o tapuaʻiga e faia i fale o tagata, e lē tatau ona manatu i ai e pei o loo auai i gaoioiga a se faalapotopotoga faalelotu ua faasāina.
Ua taʻusalaina le malo o Rusia e faamasinoga ma tagata mai i isi atunuu, o ē o loo malamalama i le tulaga o loo tupu, ona o lo latou sauāina pea o Molimau a Ieova.
Michelle Bachelet, Komesina Sili o Malo Aufaatasi mo Aiā Tatau a Tagata: “O faasalaga mamafa e faia [i se Molimau o loo faafalepuipuiina] e mafai ona iai se aafiaga mataʻutia, ma ua taotaomia ai le saʻolotoga o Molimau a Ieova e tapuaʻi ai i Rusia; o na gaoioiga e feteenaʻi ma tulafono a le Malo i lalo o le Maliega Faavaomalo i Aiā Tatau Faapolotiki ma Tagatānuu.”
Faamatalaga mai i le Organization for Security and Cooperation Permanent Council i Europa: “E lē manatu māmā le European Union i mea o loo tutupu i Molimau a Ieova i Rusia, e aofia ai le sauāina o i latou, osofaʻia o o latou fale, faia o faamasinoga e aunoa ma ni faamaoniga, suʻesuʻeina o i latou e pei o ni tagata solitulafono, ma faafalepuipuiina e oo atu lava i le fitu tausaga. . . . E matou te talosaga atu i le malo o Rusia ina ia amanaʻia aiā tatau o o latou tagatānuu, faatāua le saʻolotoga e faaali ai manatu, faapotopoto faatasi ma le filemu, lotu po o talitonuga, faapea aiā tatau o tagata e iai i se vaega laʻitiiti, ma ia faamautinoa e tonu le auala e faia ai a latou faamasinoga.”
Faamasinoga o Aiā Tatau i Europa: Iā Iuni 7, 2022, na faia ai e le Faamasinoga o Aiā Tatau i Europa se faaiʻuga tāua e faasaga iā Rusia, ona o lo latou sauāina o Molimau a Ieova. (Taganrog LRO and Others v. Russia, nos. 32401/10 ma isi mataupu e 19). Na faailoa mai e le faamasinoga, o se solitulafono le faasāina e Rusia o Molimau a Ieova i le 2017. Na faatonuina Rusia, ia “taofia mataupu tau faamasinoga uma faasaga i Molimau a Ieova, ma faasaʻoloto Molimau a Ieova o loo faafalepuipuiina.” E lē gata i lea, na faatonuina foʻi Rusia ia toe faafoʻi mai a tatou meatotino uma na faoa faamalosi, pe totogi le silia ma le 60 miliona tālā Amerika. Na faatonuina foʻi i latou e totogi le silia ma le 3 miliona tālā Amerika i ē na faafalepuipuiina ae lē sala.
Matuā Faileagaina ma le Faafalepuipuiina o Uso ma Tuafāfine
Iā Aperila 29, 2020, na osofaʻia ai e leoleo fale o ni Molimau se toʻa 5 i le aai o Pavlovskaya i Krasnodar. O se tasi o na fale o le fale o Lyudmila Shchekoldina, o se fafine e 46 tausaga o loo tausia lona tinā matua. Na molia o ia i le faia o sana vaega i galuega a se faalapotopotoga faatupu faalavelave, e ui e pau lava lana mea na fai o le aʻoaʻo atu o upu moni o le Tusi Paia i sona tuaoi. Iā Me 2022, na faasalaina ai o ia mo le fā tausaga i le falepuipui ma ua fuafua e faasaʻoloto o ia iā Aperila 2026.
Iā Me 2021, na faia ai se moliaga faasolitulafono e faasaga iā Andrey Danielyan, ina ua uma ona osofaʻia e leoleo lona fale ma fale o isi Molimau e sili atu ma le 20 i Altai. A o leʻi faia le osofaʻiga, na mataʻituina e leoleo gaoioiga uma a Andrey na fai i lona fale. Iā Iulai, na faamaonia ai lona moliaga o le faamaopoopoina o gaoioiga a se faalapotopotoga faatupu faalavelave. Iā Novema 7, 2022, na faasala ai o ia i le falepuipui mo le ono tausaga ma loka ai lava i le aso lenā.
Iā Fepuari 2022, na faia ai se moliaga faasolitulafono e faasaga iā Igor Gusev, o se Molimau e nofo i Krasnoyarsk. Iā Novema 17, 2022, na faamaonia ai e le Faamasinoga Faaitumalo a Zheleznodorozhny le moliaga o Igor i le faia o sana vaega i gaoioiga a se faalapotopotoga faatupu faalavelave. E ui e leʻi faafalepuipuiina o ia e le faamasinoga, ae na faasalaina o ia e totogi le 600,000 tupe Rusia, lea e toetoe 10,000 tālā Amerika.
Iā Tesema 19, 2022, na faasala ai e le Faamasinoga Faaitumalo a Birobidzhan ni tane Molimau se toʻafā i le falepuipui mo le umi e oo atu i le fitu tausaga, ona o ni tuuaʻiga e aunoa ma ni faamaoniga o le latou auai i se faalapotopotoga faatupu faalavelave. O osofaʻiga tetele na faia e leoleo e 150 i fale o Molimau iā Me 17, 2018, na amata ai ona latou mataʻituina nei tane. E fā ma le ʻafa tausaga na faia ai suʻesuʻega ma faamasinoga o nei tane. Na faasalaina Dmitry Zagulin mo le tolu ma le ʻafa tausaga i le falepuipui; e ono ma le ʻafa tausaga le faasalaga o Alam Aliyev; ma le taʻifitu tausaga e faafalepuipui ai Sergei Shulyarenko ma Valery Krieger.
Taumafaiga Faifai Pea e Faamuta le Faafalepuipuiina ma le Lē Tonu
Ua matuā mafatia Molimau a Ieova i le lalolagi aoao ona o le matuā faileagaina o o latou uso talitonu o loo i Rusia. E faitau miliona Molimau a Ieova i le lalolagi aoao na lafoina atu tusi i tagata maualuluga o le malo o Rusia, ma talosaga atu ai mo o latou uso tapuaʻi o loo faafalepuipuiina. Na faaulu e lōia o loo tutū mo Molimau ua faafalepuipuiina a latou tagi i le Komiti mo Aiā Tatau a Tagata a Malo Aufaatasi, ma le UN Working Group on Arbitrary Detention. Na latou faia foʻi ni talosaga apili i so o se faamasinoga i Rusia, ma o le tele o na talosaga na faaulu atu i le Faamasinoga o Aiā Tatau i Europa. Na tuuina atu ni lipoti aloaʻia i faalapotopotoga faavaomalo o ē e mataʻituina i latou e lē o amanaʻiaina a latou aiā tatau. E faaauau pea ona faaaogā e Molimau a Ieova na auala ina ia taumafai ai e iloa e tagata mafatiaga o loo fesagaʻia e o latou uso talitonu i Rusia, ina ia faamuta ai nei sauāga ogaoga.
Mea na Tutupu
Ianuari 18, 2023
E toʻa 105 Molimau ua faafalepuipuiina.
Iuni 7, 2022
Na faia e le Faamasinoga o Aiā Tatau i Europa (ECHR) se faaiʻuga iloga e taʻusalaina ai Rusia ona o lo latou sauāina o Molimau a Ieova.
Me 24, 2022
Ua faasaʻolotoina Dennis Christensen, ina ua mavae le silia ma le lima tausaga na faafalepuipui ai.
Me 4, 2022
Ua faasaʻolotoina Valentina Baranovskaya, ina ua mavae le silia ma le tausaga na faafalepuipui ai.
Ianuari 12, 2022
Ua faaopoopo e le Matagaluega o Faamasinoga a Rusia le polokalame o le JW Library i le Lisi o Mea e Lagolagoina ai Faiga Faatupu Faalavelave. O le taimi muamua, ma e na o le pau foʻi lea o le polokalame ua faasā e Rusia, ona e manatu i ai o loo lagolagoina ai faiga faatupu faalavelave.
Oketopa 25, 2021
Na faasalaina e le Faamasinoga Faaitumalo a Trusovskiy i Astrakhan ia Rustam Diarov, Yevgeniy Ivanov, ma Sergey Klikunov i le valu tausaga i le falepuipui. Na faasalaina foʻi Olga Ivanova i le tolu tausaga ma le ono masina i le falepuipui.
Setema 27, 2021
Na teena ai e le Faamasinoga i le aai o Petersburg le apili e faatatau i la latou faaiʻuga na faia iā Mati 31, 2021, lea na faasilasila aloaʻia ai o le polokalame o le JW Library o se meafaigaluega a tagata faatupu faalavelave, ma faasā ai loa ona toe faaaogāina i le atunuu atoa o Rusia ma Crimea. Na faataunuuina le iʻuga a le faamasinoga i le aso lava na faia ai.
Setema 23, 2021
Na faasala Sergey Melnik ma Igor Yegozaryan e le Faamasinoga Faaitumalo a Volgograd Traktorozavodsky mo le ono tausaga i le falepuipui ae faasala Valeriy Rogozin mo le ono tausaga ma le lima masina i le falepuipui.
Aokuso 11, 2021
Ina ua māeʻa le lua o aso na faia ai le faamasinoga o Vasiliy Meleshko, na faasalaina ai o ia e le Faamasinoga Faaitumalo a Abinskiy i le vaipanoa o Krasnodar i le tolu tausaga i le falepuipui.
Iuni 30, 2021
Na faasala Aleksey Berchuk i le valu tausaga i le falepuipui e le Faamasinoga o le aai o Blagoveshchensk o le vaipanoa o Amur, ae fitu tausaga na faasala ai Dmitriy Golik i le falepuipui.
Fepuari 24, 2021
Na faasalaina Valentina e le Faamasinoga o le aai o Abakan i le Republic of Khakassia mo le lua tausaga i le falepuipui, ae faasalaina lana tama tama o Roman Baranovskiy i le ono tausaga i le falepuipui.
Fepuari 10, 2021
Na faasalaina Aleksandr Ivshin e le Faamasinoga Faaitumalo a Abinskiy i le vaipanoa o Krasnodar mo le fitu ma le ʻafa tausaga.
Setema 2, 2020
Na faasalaina Sergey Britvin ma Vadim Levchuk e le Faamasinoga o le aai o Berezovsky i le vaipanoa o Kemerovo mo le fā tausaga i le falepuipui.
Aokuso 3, 2020
Na faatonuina e le Faamasinoga Faaitumalo a Pskov le faasaʻolotoina o Gennady Shpakovskiy mai i le falepuipui. O loo faamaonia pea e le faamasinoga lona nofosala, ae nai lo o le faafalepuipuiina i le ono ma le ʻafa tausaga ae ua faanofo vaavaaia o ia mo le umi lava lenā.
Iulai 13, 2020
Faia suʻesuʻega tetele i fale o aiga Molimau e pe ā ma le 100 i vaipanoa o Voronezh ma Belgorod.
Iuni 9, 2020
Na faasalaina e le Faamasinoga o le aai o Pskov ia Gennady Shpakovskiy e 61 tausaga, mo le ono ma le ʻafa tausaga i le falepuipui.
Fepuari 6, 2020
Iā Setema 19, 2019, na faamaonia ai e le faamasinoga le nofosala o Molimau e toʻalima mai i le toʻaono o i latou, ma na auina atu i Penal Colony No. 1 i Orenburg. Ina ua latou taunuu na fasi faamoʻamoʻa i latou e leoleo o le falepuipui, ta kiki ma sasa i latou i pouvai. Sa gau le ivi ʻasoʻaso o Feliks, ma sa faaleagaina ona māmā ma fatugaʻo.
Setema 19, 2019
Na faasalaina e le faamasino o Dmitry Larin o le Faamasinoga Faaitumalo a Leninskiy i Saratov ni tane se toʻaono i le falepuipui, o Konstantin Bazhenov, Aleksey Budenchuk, Feliks Makhammadiyev, Roman Gridasov, Gennadiy German, ma Aleksey Miretskiy ona o tuuaʻiga i lo latou ʻfaamaopoopoina o mea fai a se faalapotopotoga faatupu faalavelave.’
Me 23, 2019
Na teena e le Faamasinoga Faaitumalo a Oryol le apili a Dennis Christensen ma faaauau ai lona faasalaga e ono tausaga.
Aperila 26, 2019
E manatu le UN Working Group on Arbitrary Detention ua lē amanaʻiaina aiā tatau a Dimtriy Mikhailov, ma faitioina ai le sauāina e Rusia o Molimau a Ieova.
Fepuari 6, 2019
Na faamaonia e le Faamasinoga Faaitumalo a Zheleznodorozhniy moliaga o Dennis Christensen, ma faasala ai o ia mo le ono tausaga i le falepuipui.
Oketopa 9, 2018
Na osofaʻia e leoleo ma vaegaʻau faapitoa fale o aiga i Kirov. E toʻatele tane Molimau na puʻea ma taofia ai e faatali o latou faamasinoga, e aofia ai Andrzej Oniszczuk o se tagatānuu Polani.
Iulai 15, 2018
Na suʻeina e leoleo fale o le tele o aiga Molimau i Penza. Na latou aveina Vladimir Alushkin ma taofia e faatali ai lona faamasinoga.
Iulai 4, 2018
Na osofaʻia e leoleo fale o aiga i Omsk. Na latou aveina Sergey ma Anastasiya Polyakov ma taofia e faatali o la faamasinoga. O Anastasiya o le uluaʻi tamaʻitaʻi Molimau lea ua puʻea e le malo o Rusia ma taofia e faatali ai lona faamasinoga i moliaga o se tagata faatupu faalavelave.
Iuni 12, 2018
Na osofaʻia e leoleo fale o aiga i Saratov. O Konstantin Bazhenov, Aleksey Budenchuk, ma Feliks Makhammadiyev na puʻea i latou ma taofia e faatali ai o latou faamasinoga. Na faatonuina isi Molimau e toʻatolu o Gennadiy German, Roman Gridasov, ma Aleksey Miretskiy e saini se maliega e latou te lē tuua ai le aai.
Iuni 3, 2018
Na osofaʻia e leoleo fale o aiga i Tomsk ma Pskov. Na latou aveina Sergey Klimov ma taofia o ia e faatali ai lona faamasinoga.
Fepuari 19, 2018
Na amata le faamasinoga o Dennis Christensen i le Faamasinoga Faaitumalo a Zheleznodorozhniy, ma na taʻimua ai le faamasino o Aleksey Rudnev.
Iulai 20, 2017–Novema 2018
E tele taimi na tolopō ai le faamasinoga o Dennis Christensen, i le taimi muamua o le Faamasinoga Faaitumalo a Sovietskiy, ma mulimuli ane i le Faamasinoga Faaitumalo a Zheleznodorozhniy.
Me 26, 2017
Na tuuina e le Faamasinoga Faaitumalo a Sovietskiy o Oryol ia Dennis Christensen i le falepuipui mo le lua masina e faatali ai lona faamasinoga.
Me 25, 2017
Na osofaʻia e leoleo se sauniga na faia i Oryol, ma taofia ai Dennis Christensen.
Aperila 20, 2017
Na aumaia le faaiʻuga o le Faamasinoga Maualuga a Rusia e taofia ai galuega o le ofisa a Molimau a Ieova ma ana faalapotopotoga e 395.
E te Ono Fiafia Foʻi
TALA FOU
Leai se Māfuaaga e Fefefe ai i Sauāga
I le fonotaga faaletausaga 2019, na faia ai e le uso o Mark Sanderson o se sui o le Vaega Pule se lauga na faamatuaina, “What Do We Have to Fear?” Na aofia ai i le lauga lenei se vitiō o tala o mea na tutupu i nisi o o tatou uso ma tuafāfine na sauāina i Rusia.