E tusa ai ma lipoti mai tala fou, na osofaʻia e leoleo na faaauupegaina i fana taavili le 110 o fale o o tatou uso i le Vaipanoa o Voronezh iā Iulai 13, 2020. O se osofaʻiga pito i sili lea ona telē ua faia i se aso se tasi i Molimau a Ieova talu mai le 2017. Na fasia ma faamataʻuina o tatou uso o Aleksandr Bokov ma Dmitrii Katyrov ina ua mumusu e faailoa atu i leoleo numera e tatala ai a la telefoni feaveaʻi.

Na faatonuina e le Faamasinoga Faaitumalo a Voronezh le osofaʻiga. A itiiti mai e fitu aai, taulaga ma nuu i lenā itulagi na osofaʻia e leoleo. Na tuu atu nisi o o tatou uso i le ofisa o se Komiti Suʻesuʻe mo le suʻesuʻeina.

I le aso na sosoo ai iā Iulai 14, 2020, na faatonuina ai e le Faamasinoga Faaitumalo a Leninsky le taofia o le toʻasefulu o o tatou uso i le falepuipui seʻia oo iā Setema 3, 2020: Aleksei Antiukhin, 44 tausaga le matua, Sergey Bayev, 47 tausaga le matua, Iurii Galka, 44 tausaga le matua, Valeriy Gurskiy, 56 tausaga le matua, Vitalii Nerush, 41 tausaga le matua, Stepan Pankratov, 24 tausaga le matua, Igor Popov, 54 tausaga le matua, Evgenii Sokolov, 44 tausaga le matua, Mikhail Veselov, 51 tausaga le matua, ma Anatoliy Yagupov, 51 tausaga le matua.

E ui o loo taʻua i le lipoti o loo i luga e 110 fale na osofaʻia, ae ua matou maua se faamaoniga mai i isi aiga Molimau e toʻa 100 na osofaʻia foʻi o latou fale. E ono faatupulaʻia pea le tele o fale e osofaʻia. E faigatā ona fesootaʻi ma uso uma, ona ua ave e le Malo a latou komepiuta ma telefoni i taimi o le osofaʻiga.

O le aofaʻiga pito i sili o fale na osofaʻia i se aso se tasi na tupu iā Fepuari 10, 2020, ina ua osofaʻia e leoleo fale e 50 o Molimau i le Vaipanoa o Transbaikal. Talu mai le faaiʻuga a le Faamasinoga Maualuga i le 2017, e silia ma le 1,000 fale o o tatou uso ua osofaʻia.

E tusa ai ma valoaga a le Tusi Paia, e lē faateʻia ai i tatou i faamasinoga o o tatou uso i Rusia ma isi atunuu o loo tupu ai lea tulaga. E faaauau ona tatou tatalo mo o tatou uso ona e tatou te iloa, o le a tuuina atu e Ieova lona agaga paia ina ia faaauau ona tumau ai.​—1 Peteru 4:12-14, 19.