Iā Iuni 2020, na aafia ai le aai o Rodna i Transylvania i timuga mamafa ma lologa. O le iʻuga, e toʻaono o tatou uso na faaleagaina o latou fale. Iā Iuni 27, 2020, na galulue faatasi ai le ovasia matagaluega i Rodna ma toeaina i lenā vaipanoa, ma latou faatulaga ai le toʻa 25 uso ma tuafāfine mai i faapotopotoga lata ane e tolu e fesoasoani i lenā galuega laveaʻi. * Na mātauina e le pulenuu a Rodna galuega laveaʻi a o tatou uso, ma viiviia ai i latou i luga o se fale faasalalau i lenā vaipanoa.

E tu le aai o Rodna i se vanu e tele ai vaitafe. Na aumaia e tafega le tele o otaota ma palapala lea na faigatā ai ona sao atu nisi i le aai. Na iai se fale o se tuafafine i se vaega o lena vaipanoa, lea na iai le pulenuu o Rodna ma lana vaega o loo taumafai e aveese le palapala ma le otaota. Ina ua taunuu atu o tatou uso, na latou fesoasoani loa e faamamā lenā vaega ina ia oo atu ai i le fale o le tuafafine. O le iʻuga, o la latou galuega na fesoasoani tele lea i le galuega laveaʻi a le Malo.

Mulimuli ane, na viiviia e le pulenuu le ʻauuso i sana faatalanoaga i le televise i lenā vaipanoa. Na ia faapea mai: “Ou te fia taʻua se tasi o mea e sili ona pāʻia ai loʻu loto. I le aso muamua, na matou faaaogā ai se loli pusa sasaa ma se masini uapato ae e leʻi uma ai le galuega i lenā aso, na matuā faaleagaina lenā vaipanoa. I le aso na sosoʻo ai na matou maua ai le fesoasoani mai i le silia i le 30 tagata tauofo o ni Molimau a Ieova. E oo ane i le afiafi ua māeʻa le galuega.” Na faaiʻu mai ana upu: “Na fesoasoani nei tagata e toe faaleleia le tulaga o mea i lenā vaipanoa ma ou te faafetai atu ai iā i latou uma!”

Na faia foʻi e le pulenuu se faamatalaga i luga o se upega tafaʻilagi e faatatau i le ʻauuso. Na ia faapea mai: “Ia faamanuia mai Ieova iā te outou uma, ma ia foaʻi atu pea le ola ma le soifua mālōlōina lelei ma ia tele pea mea tou te faataunuuina!”

O lenei mea na tupu i Romania o se isi lea faaaʻoaʻoga o a tatou amioga lelei e maua ai le viiga mo lo tatou Tama i le lagi o Ieova.​—1 Peteru 2:12.