Accessibility setting

Filifili le gagana

Skip to secondary menu

Skip to content

Molimau a Ieova

Faa-Samoa

O se Tusi Paia na Faia Ina ia Umi Ona Faaaogā

O se Tusi Paia na Faia Ina ia Umi Ona Faaaogā

E leai se isi tusi e sili ona tāua i Molimau a Ieova nai lo o le Tusi Paia. E latou te suʻesuʻeina e lē aunoa ma faaaogā e aʻoaʻo ai isi i le tala lelei o le Malo o le Atua. (Mataio 24:14) Talu ai e tele taimi e faaaogā ai le Tusi Paia, e vave la ona faaleagaina. O lea ua faia ai e Molimau a Ieova le tele o taumafaiga fitā, ina ia faamautinoa ai e foliga manaia ma e umi ona faaaogā le lomiga ua toe teuteuina i le 2013 O le Tusi Paia o le Faaliliuga a le Lalolagi Fou.

E tatau ona malosi ma umi ona faaaogā le Tusi Paia fou. Na ō atu sui o Molimau a Ieova o loo galulue i lo latou fale lomitusi i Wallkill, Niu Ioka, i Amerika, ma talanoa ma le peresitene o se kamupani lomitusi e faatatau i la latou fuafuaga mo se Tusi Paia. Peitaʻi na faapea mai le peresitene: “E lē mafai ona fai se Tusi Paia lenā o loo outou mananaʻo ai. E ui e lē manaia laʻu tala, ae o le mea moni ua faia le tele o Tusi Paia ina ia faamanaia ai luga o se laulau po o se fata tusi, ae e lē ina ia umi ona faaaogā.”

I le taimi ua mavae, na iai nisi o Tusi Paia o le Faaliliuga a le Lalolagi Fou e leʻi umi ona faaaogā, ma o nisi taimi na toʻulu ai laupepa ona o le vevela o le tau. Na iloilo e i latou sa iai i le fale lomitusi faavaa eseese, o kelū, ma isi metotia i le tuufaatasia o tusi, ina ia taumafai ai e fai se Tusi Paia e umi ona lelei i so o se ituaiga o tau. E tusa ai o a latou saʻiliʻiliga, na faia ai loa ni Tusi Paia faataʻitaʻi ma ave i nisi o Molimau i atunuu e eseese tau, o tau e matuā vevela ma tau e matuā mālūlū, e faataʻitaʻi ai pe e tumau lo latou lelei.

Ina ua mavae masina e ono, na toe faafoʻi mai Tusi Paia e fai ai se iloiloga. Na fai e i latou e galulue i le fale lomitusi nisi faaleleiga i Tusi Paia ma toe tufa atu isi kopi e faataʻitaʻi, ma e 1,697 le aofaʻiga o Tusi Paia sa fai ai faataʻitaʻiga. O nisi o Tusi Paia sa faaleagaina ona o ni mea na tutupu faafuaseʻi. O se faataʻitaʻiga, na iai se Tusi Paia na susū i le timu i le po atoa, a o le isi na lofia i le vai ona o ni lologa mai i se afā. O faaiʻuga mai i nei faataʻitaʻiga ma mea na tutupu i Tusi Paia na tufa atu, na maua ai ni faamatalaga aogā i le faia o se Tusi Paia e umi ona faaaogā.

I le 2011, a o faia pea faataʻitaʻiga, na faatau ai e Molimau a Ieova ni masini e lelei ma vave ai le tuufaatasia o tusi, mo a latou fale lomitusi i Wallkill i Amerika, ma Ebina i Iapani. O lo latou sini, ia lava Tusi Paia e tusa ai o le aofaʻiga na manaʻomia, ma ia tutusa lelei foliga o Tusi Paia e saunia i nei nofoaga eseese e lua.

Faafitauli i le Faavaa

I le amataga o le 2012, na amata ai ona saunia e nei fale lomitusi Tusi Paia o loo iai nei o le Faaliliuga o le Lalolagi Fou i le lanu uliuli ma le lanu mūmū paauli, e faaaogā ai le una o le polyurethane e fai ai le faavaa fou. Peitaʻi, o le kelū ma vaega e faapipii i totonu o le faavaa o le tusi ia e faaaogā i nei masini fou, e leʻi faataʻitaʻia muamua pe e lelei. O lea, na vave ona mafiti le faavaa pe a faapipii i ai le Tusi Paia, ma e lē mafolafola lelei. E ui i taumafaiga na toe fai, ae e leʻi foʻia ai lea faafitauli. O lea na taofia ai le toe lomiaina o nei Tusi Paia.

Na taʻua e i latou na gaosia se tasi o nei mea e fai ai faavaa, o se faafitauli masani lea e iai mo Tusi Paia e vaivai faavaa ma e faigatā ona foʻia. Peitaʻi, nai lo o le faia loa o se faavaa e malō, na maumauaʻi pea Molimau e saunia se Tusi Paia e vaivai le faavaa ma e manaia foliga. E fā masina o fai ni faataʻitaʻiga, e aofia ai le tuufaatasiga eseese o kelū ma vaega e faapipii i totonu o le faavaa. O le iʻuga, na maua se auala e mafai ona fai ai se Tusi Paia e vaivai le faavaa ma e mafolafola lelei e lē mafiti. O lea, na toe amata ai ona lomiaina Tusi Paia.

Toe Taofia le Lomia o Tusi Paia

Iā Setema 2012, na toe faatonuina ai fale lomitusi a Molimau a Ieova e taofia le lomia o faaliliuga o loo iai nei, ae tufa atu kopi o le Tusi Paia o loo totoe, ma faatali mo le taimi e lomia ai le lomiga ua toe teuteuina O le Tusi Paia o le Faaliliuga a le Lalolagi Fou. Na fuafua o le a tatalaina lea Tusi Paia iā Oketopa 5, 2013 i le fonotaga faaletausaga a le Watch Tower Bible and Tract Society of Pennsylvania.

Na maua e fale lomitusi kopi o le Tusi Paia fou e ala atu i komepiuta i le Aso Faraile, Aokuso 9, 2013 ma amata loa ona lomiaina i le aso na sosoo ai. Na lomia le uluaʻi kopi atoa o lenei Tusi Paia iā Aokuso 15. I le fitu vaiaso na sosoo ai, na galulue ai i le ao ma le po i latou uma i fale lomitusi i Wallkill ma Ebina, ina ia lomia ma auina atu Tusi Paia e 1,600,000 ma na lava lelei mo i latou uma na auai i le polokalame o le fonotaga faaletausaga.

E ui e manaia ma e umi ona faaaogā lenei Tusi Paia fou, ae e sili atu ona tāua le feʻau faasaoola o loo iai. Ina ua maua le Tusi Paia a se tasi o fafine i Amerika, na tusi o ia i le aso na sosoo ai e faapea: “Ua mafai ona ou malamalama lelei i le Tusi Paia ona o lenei faaliliuga.”