E to‘aiva ni Molimau a Ieova na maua ni tusipasi, e faailoa atu ai le talisapaia o la latou “auaunaga mata‘ina,” e fesoasoani ai i ē o loo taofia i se tasi o nofoaga telē a Ausetalia, mo tagata e ulufale i le atunuu e aunoa ma se faatagaga aloa‘ia. O nei tusipasi o ni faailoga mai i le Curtin Immigration Detention Centre e lata i Derby, i Ausetalia i Sisifo. *

I vaiaso ta‘itasi, e ō atu Molimau e faalogologo a o faamatala mai e nei tagata o latou olaga, ona faasoa atu lea e Molimau se fe‘au mai i le Tusi Paia e faamāfanafanaina ai ma maua ai se faamoemoe. Na ta‘ua e Christopher Riddoch, o le tagata ofisa e gafa ma mataupu faalelotu ma faaleaganuu i lea nofoaga e faapea: “Na vave ona mātauina le aafiaga o nei asiasiga iā i latou o loo taofia i inei.” Na ia ta‘ua, ua faaleleia uiga o tagata ma maua le fiafia, ma ua “iloa e nei tagata o loo iai nisi o loo naunau moni lava mo lo latou lelei.”

Na ta‘ua e Christopher o tusipasi na tuuina atu i Molimau, ua na o se faailoga itiiti e faafetaia ai la latou fesoasoani ina ia “faaleleia olaga o i latou o loo latou vaavaaia.” Na ia ta‘ua atili ua avea nei Molimau “o se mitamitaga mo o latou aiga, o la latou faapotopotoga, ma lo latou faatuatuaga.”

^ pala. 2 O lenei nofoaga e mafai ona nonofo ai tagata e 1,500.