Skip to content

Skip to secondary menu

Molimau a Ieova

Faa-Samoa

Pe a Tutupu ni Mala, o le Alofa e Uunaʻia ai i Tatou e Gaoioi

Pe a Tutupu ni Mala, o le Alofa e Uunaʻia ai i Tatou e Gaoioi

I taimi o faigatā, e saunia ai e Molimau a Ieova le fesoasoani mo o latou uso talitonu faapea isi tagata. E latou te faia ona o se faailoaga o le alofa, lea e mātaulia ai Kerisiano moni.​—Ioane 13:35.

O loo mulimuli mai se vaega o se lisi o fesoasoani na saunia mo masina e 12, lea na māeʻa i le ogatotonu o le 2012. E lē o aofia ai le fesoasoani i le itu faaleagaga ma le itu tau faalogona, lea e masani ona ō faatasi ma a matou taumafaiga. O le tele o ia fesoasoani e faamaopoopoina e Komiti o Fesoasoani mo Mala ia e tofia e a matou ofisa o lālā. E faia foʻi se sao o faapotopotoga o vaipanoa e aafia i le avatuina o le fesoasoani.

Iapani

Iapani: Iā Mati 11, 2011, na aafia ai le faitau selau afe o tagata i le itu i mātū o Iapani i se mafuiʻe, lea na sosoo ai ma se galulolo. Na foaʻi atu e Molimau a Ieova i le lalolagi atoa tupe, tomai, ma meafaitino ina ia fesoasoani ai i le toe faaleleia o mea na faaleagaina.

Pasili: Na maliliu le faitau selau o tagata ona o lologa, ma palapala ma eleele solo. Na tali atu Molimau a Ieova e ala i le auina atu i le vaipanoa na aafia le 42 tone o meaʻai e lē vave ona faaleagaina, 20,000 fagu vai, 10 tone o lavalava, ma le 5 tone o meafaigaluega e faaaogā i le galuega faamamā, faapea vailaau ma fualaau mai i fomaʻi ma isi mea.

Congo (Brazzaville): Ina ua pa se nofoaga e teu ai ututau, na faatamaʻia fale e 4 o ni Molimau a Ieova, ae e 28 fale o isi Molimau a Ieova na faaleagaina. Na saunia meaʻai ma lavalava mo i latou na aafia, ma na ave e Molimau a Ieova i lea vaipanoa i o latou fale aiga na aafia i lea mala.

Congo (Kinshasa): Na maua e i latou na aafia i le manava tatā mataʻutia (cholera) fualaau ma vailaau mai i fomaʻi. Na lafoina atu lavalava mo i latou na aafia i lologa e māfua mai i le mamafa o timuga. Na saunia mo i latou na iai i nofoaga mo tagata sulufaʻi le fesoasoani faafomaʻi, fatu o laau ʻaina ma le tele o lavalava.

Venesuela: O le mamafa o timuga na māfua ai lologa ma le solo o palapala. Na fesoasoani komiti o fesoasoani mo mala i Molimau a Ieova e 288 na aafia. Na toe fausia le silia ma le 50 fale fou. O loo fesoasoani atu foʻi na komiti iā i latou o loo iai i se tulaga lamatia o latou fale, ona o le siisii aʻe o le maualuga o le Lake Valencia.

Filipaina

Filipaina: Na aafia isi vaega o le atunuu i lologa e māfua mai i afā. Na auina atu e le lālā meaʻai ma lavalava mo ē na aafia, ma na fesoasoani Molimau a Ieova i ia vaipanoa e faia le galuega faamamā ina ua uma atu lologa.

Kanata: Ina uma atu se mū na matuā faatamaʻia ai se vaomatua i Alberta, na maua ai e le faapotopotoga i Slave Lake se foaʻi tautupe telē mai i isi Molimau a Ieova i le vaipanoa, e fesoasoani ai i galuega faamamā. Talu ai e leʻi manaʻomia lenā tupe atoa, na foaʻi atu ai e le faapotopotoga le silia ma le ʻafa o lenā foaʻi tautupe, e fesoasoani ai i isi tagata e aafia i mala i isi vaega o le lalolagi.

Côte d’Ivoire: Na saunia oloa, mea e nonofo ai, ma togafitiga faafomaʻi mo i latou na manaʻomia se fesoasoani a o leʻi tupu, a o faagasolo ma ina ua uma foʻi se taua na aafia ai le atunuu.

Fiti: E toetoe 192 aiga Molimau a Ieova na faaleagaina a latou faatoʻaga, ona o lologa na māfua mai i le mamafa o timuga. O nei faatoʻaga na maua mai ai a latou meaʻai ma tupe. Na foaʻi atu mo i latou le tele o meaʻai.

Kana: Na foaʻi atu mo i latou na aafia i lologa i le itu i sasaʻe o le atunuu meaʻai, fatu o laau ʻaina, ma isi fale fou e nonofo ai.

Iunaite Setete: E 66 fale o Molimau a Ieova i setete e tolu na faaleagaina e asiosio, ae e 12 fale o Molimau a Ieova na matuā faatamaʻia. E ui lava sa inisiua le tele o nei fale, ae na saunia ni foaʻi tautupe e fesoasoani ai e toe faaleleia mea na faaleagaina.

Anitenitina: Na fesoasoani faapotopotoga a Molimau a Ieova iā i latou i le itu i saute o le atunuu, na faaleagaina o latou fale ona o lefulefu mai i se mauga mū.

Mozambique: Na saunia meaʻai mo le silia ma le 1,000 tagata na aafia i se lāmala.

Nigeria: Na maua e ni Molimau a Ieova e toʻa 24 na manunuʻa ina ua lavea se pasi se fesoasoani tautupe. Na maua foʻi le fesoasoani e le toʻatele i le itu i mātū o le atunuu ua leai ni fale, ona o fetauaʻiga i le va o lotu.

Benin: Na saunia mo i latou na aafia i lologa vailaau ma fualaau mai i fomaʻi, lavalava, taʻinamu, ma vai mamā.

Dominican Republic

Dominican Republic: Ina ua uma le afā o Irene, na fesoasoani ai faapotopotoga i lea vaipanoa i le toe faaleleia o fale ma le foaʻi atu o meafaitino.

Aitiope: E lua vaipanoa na aafia i le lāmala ae e tasi le vaipanoa na aafia i lologa. Na avatu fesoasoani tautupe mo mea na manaʻomia e i latou na aafia.

Kenya: Na foaʻi atu tupe mo fesoasoani laveaʻi mo ē na aafia i le lāmala.

Malawi: Na avatu le fesoasoani mo i latou na iai i nofoaga mo tagata sulufaʻi i Dzaleka.

Nepale: Na matuā faaleagaina le fale o se Molimau a Ieova ina ua solo le eleele. Na saunia se fale lē tumau mo ia, ma na fesoasoani atu foʻi le faapotopotoga i lea vaipanoa.

Papua Niu Kini: E valu fale o ni Molimau a Ieova na susunuina e tagata. Na faia fuafuaga ina ia toe fausia na fale.

Romania: Na faaleagaina fale o nisi o Molimau a Ieova ona o lologa. Na avatu le fesoasoani ina ia toe fausia ai na fale.

Mali: Na auina atu fesoasoani tautupe mai i le atunuu tuaoi o Senegal, mo nisi e leʻi lava meaʻai ona o le leaga o fua o faatoʻaga e māfua mai i le lāmala.

Sierra Leone: Na saunia e fomaʻi o ni Molimau a Ieova mai i Falani le fesoasoani faafomaʻi, mo Molimau a Ieova o loo nonofo i vaipanoa na matuā faaleagaina i taua.

Taialani: E tele vaipanoa na matuā faaleagaina ona o lologa. Na toe faaleleia ma faia galuega faamamā e i latou na saunia fesoasoani laveaʻi i fale e 100, ma Maota mo Sauniga e 6.

Czech Republic: Ina ua faaleagaina le tele o fale i le Czech Republic, na fesoasoani ane Molimau a Ieova mai i Slovakia i galuega laveaʻi.

Sri Lanka: Ua toeitiiti māeʻa le tele o galuega fesoasoani mo mala na māfua ona o se galulolo.

Sudan: Na auina atu meaʻai, lavalava, seevae ma tapoleni mo Molimau a Ieova na aveese faamalosi, ona o fetauaʻiga i totonu o le atunuu.

Tanzania: Ona o le tetele o lologa, e 14 aiga na leiloloa a latou meatotino. Na foaʻi atu e faapotopotoga i lea vaipanoa lavalava ma meafale. E tasi le fale na toe fausia.

Zimbabwe: I se tasi vaipanoa o le atunuu na matuā galala tagata i le fia aai ona o le lāmala. Na avatu meaʻai ma tupe mo i latou na aafia.

Burundi: O loo avatu fesoasoani laveaʻi e aofia ai le tausiga faafomaʻi mo i latou o loo i nofoaga o sulufaʻiga.

 

 

Faitau Atili

TALIINA O FESILI FAALE-TUSI PAIA

Po o Mala Faalenatura o se Faasalaga Mai i le Atua?

Iloilo ni vala se tolu e iloa ai galuega a le Atua e pei ona faamauina i le Tusi Paia.