Accessibility setting

Filifili le gagana

Skip to secondary menu

Skip to content

Molimau a Ieova

Faa-Samoa

JW.ORG—Ua Faaleleia ai Olaga

JW.ORG—Ua Faaleleia ai Olaga

Ua maua e tagata mai i so o se vaipanoa le tele o aogā mai i le upega tafa‘ilagi o le jw.org. E oo mai iā Me 2014, e to‘atele i latou ua tusi atu i le ofisa ulu o Molimau a Ieova, ma faaali atu i ai lo latou matuā talisapaia o lenei upega tafa‘ilagi. O loo mulimuli mai nisi o faamatalaga a i latou nei.

Fesoasoani mo Fanau Iti

“Pe a tuua mai le ma tama mai i lana a‘oga faata‘ita‘i, e masani ona sau ma penitala, o meataalo, ma mata tioata a ana uō. E tele taimi na ma fesoasoani ai iā te ia ina ia malamalama, e leaga lana mea o loo fai ma e tutusa ma le gaoi. Peita‘i e le‘i taulau a ma taumafaiga, se‘ia oo ina ma faaali atu iā te ia le vitiō E Leaga le Gaoi. E ese le malosi o le lesona mai i lenei vitiō, ma o le vaifofō tonu lea na mana‘omia e la ma tama. Ina ua uma ona matamata i le vitiō, na ia fai mai ua mana‘o e toe faafo‘i mea a tamaiti na sau ma ia, ma ua ia iloa nei e lē fiafia le Atua i le gaoi. Ma‘eu le telē o le fesoasoani a lenei upega tafa‘ilagi iā i ma‘ua.”—D. N., Aferika.

‘E ese le malosi o le lesona mai i le vitiō E Leaga le Gaoi, ma o le vaifofō tonu lea na mana‘omia e la ma tama’

“E ese le fiafia o la‘u fanau i lenei upega tafa‘ilagi. Na latou kopi mai ata vitiō mo tamaiti, ia na fesoasoani iā i latou e usita‘ia ta‘iala a le Tusi Paia e faatatau i le leaga o le pepelo ma le gaoi. Na latou a‘oa‘oina mai ai fo‘i ni uiga lelei e mafai ona faaalia i le olaga atoa, ma avea ai i latou o ni tagata lelei.”—O. W., West Indies.

Fesoasoani mo Ē o Loo Auai i A‘oga

“E masani ona ou manatu i le a‘oga o se avega mamafa ma ou te le‘i toe fia a‘oga. Peita‘i, na ou faitau i se mataupu i le jw.org e faapea ‘Should I Quit School?’ ma na fesoasoani ia sa‘o ai la‘u vaai e faatatau i le a‘oga. Na ou iloa ai o le auai i le a‘oga e toleni ai a‘u mo le lumana‘i, ma fesoasoani iā te a‘u e avea ma tagata maufaatuatuaina.”—N. F., Aferika.

“O fautuaga mo talavou o loo iai i lenei upega tafa‘ilagi, ua a‘oa‘oina ai a‘u ia faaalia pea amioga lelei i le a‘oga”

“O fautuaga mo talavou o loo iai i lenei upega tafa‘ilagi, ua a‘oa‘oina ai a‘u ia faaalia pea amioga lelei i le a‘oga. Ua ou iloa ai fo‘i le auala e ua‘i atu ai pea i a‘u meaa‘oga e aunoa ma le iai o se mea e faalavelavea ai.”—G., Aferika.

“Na faitio mai se tinā e ma te faigaluega i le auala o loo soona fai ai si ana tama teine, e se isi teineitiiti fia malosi i le a‘oga. O le fefe o si ana tama na i‘u ai ina lē a‘oga mo ni nai aso. Na ou faasoa atu loa i si tinā nisi o manatu mai i le vitiō Beat a Bully Without Using Your Fists, lea o loo maua i le jw.org. Sa fiafia o ia i le manatu e faapea ia faaalia agamālie ina ia faato‘afilemu ai se faafitauli e tula‘i mai. Sa talanoa loa o ia i si ana tama e faatatau i le auala e feagai ai ma ē e fia malolosi i le a‘oga. O le i‘uga, na toe fo‘i lana tama i le a‘oga ma le lototele, ma a o faagasolo taimi, na faaleleia le tulaga o mea ma avea o sana uō le teineitiiti fia malosi.”—V. K., Europa i Sasa‘e.

Fesoasoani i Talavou

‘Faafetai lava mo le mataupu “Why Do I Cut Myself?” lea o loo i le jw.org, e faatatau i ē e fetagofi faaleaga o latou lava tino. Ua tele tausaga o ou tauivi ma lenei faafitauli. Sa ou faapea e na o a‘u o loo aafia ai, ma e lē mafai ona malamalama isi pe a ou faamatala i ai. Ua matuā fesoasoani iā te a‘u faamatalaga o loo i lenei mataupu, mai i nisi o tagata o loo aafia fo‘i i lenei faafitauli. O loo iai moni lava nisi e malamalama i o‘u faalogona!’—Se tama‘ita‘i talavou i Ausetalia.

‘Ua matuā fesoasoani iā te a‘u faamatalaga o loo i lenei mataupu, mai i nisi o tagata o loo aafia fo‘i i lenei faafitauli. O loo iai moni lava nisi e malamalama i o‘u faalogona!’

“O le jw.org, ua faigofie ai ona ou maua le fesoasoani i mataupu o loo aafia ai talavou. Na fesoasoani se tasi o mataupu iā te a‘u ina ia iloa ituaiga o faiga faasoesa faaleituaiga, le auala o loo ou aafia ai, faapea auala talafeagai e feagai ai ma lea tulaga.”—T. W., West Indies.

Fesoasoani mo Mātua

“O la‘u tama tama talavou, e ese le tiotio ma fiafia e faia so o se mea. O le tele o taimi e faate‘ia ai a‘u i ana amioga, ma e le‘i lelei a ma fesoota‘iga. I se tasi aso, na ou asiasi i le jw.org ma filifili le vaega mo ulugalii ma mātua. Na ou maua ai i inā le tele o mataupu e mafai ona fesoasoani i lo‘u tulaga faapea le auala e fesoota‘i ai ma la‘u tama. Sa maua fo‘i e la‘u tama ni aogā mai i le jw.org. Ua sa‘oloto nei e talanoa mai iā te a‘u i mea e fiafia ai, faapea ona popolega.”—C. B., Aferika.

“E masani lava e fetaui lelei le taimi e maua ai se mataupu i le jw.org, ma le taimi o loo ma mana‘omia ai se fesoasoani i se lu‘i o loo feagai ma la ma‘ua fanau”

“I le avea ai ma mātua, ua fesoasoani mai le jw.org ina ia a‘oa‘o la ma‘ua fanau i se auala e faaosofia ai lo latou naunau. O se faata‘ita‘iga o le vitiō i le auala e sa‘ilia ai se uō moni. Ua fesoasoani lea iā i latou ia iai se vaaiga sa‘o e tusa ai o le mauaina o ni uō, ma filifili ni uō e iai ni aafiaga lelei iā i latou. E masani lava e fetaui lelei le taimi e maua ai se mataupu i le jw.org, ma le taimi o loo ma mana‘omia ai se fesoasoani i se lu‘i o loo feagai ma la ma‘ua fanau. O se puna o fautuaga aogā.”—E. L., Europa.

Fesoasoani mo Ulugalii Faaipoipo

“Ua ono tausaga talu ona ma faaipoipo. I le pei o isi ulugalii, sa ma feagai fo‘i ma le lu‘i o le taumafai ia faaleleia a ma fesoota‘iga, ma ia tutusa o ma manatu i se mataupu, e ui i le eseese o o ma talaaga. Na ou fiafia i le mataupu ‘How to Be a Good Listener’ o loo i le jw.org. O loo iai ni fautuaga aogā i le auala e faaleleia ai le faalogo atu i manatu o isi, ma na ou faasoa atu i la‘u avā fautuaga o loo iai. Ua ma taumafai e faatatau nei fautuaga aogā.”—B. B., West Indies.

“O le upega tafa‘ilagi lea ua faasaoina ai la ma‘ua faaipoipoga”

“Na amata ona ou auaufaatasi ma Molimau a Ieova i le tausaga ua mavae, ma ou te fia faailoa atu lo‘u talisapaia o mataupu o loo i le jw.org. Ua tele mea lelei ua ou a‘oa‘oina mai ai, e pei o le auala e pulea ai lo‘u ita, ma le auala e avea ai a‘u o se tane ma se tamā lelei. Ou te ta‘utino atu ma le faamaoni, o le upega tafa‘ilagi lea ua faasaoina ai la ma‘ua faaipoipoga.”—L. G., West Indies.

Fesoasoani mo Ē e Logonoa

“Ua fesoasoani mataupu o loo i le jw.org ina ia ou toe maua ai le fiafia. Ua faaleleia la‘u gagana fai taga ona o vitiō i le Gagana Fai Taga a Amerika. Na masani ona ou mafaufau e lē mafai ona ou faatutū ni sini aogā i lo‘u olaga, ae ina ua ou matamata i le vitiō Seeing God’s Word in My Language, na toe faalaeiauina ma faamalosia ai a‘u ina ia faaauau ona ua‘i atu i itu lelei o lo‘u olaga.”—J. N., Aferika.

“Ua fesoasoani mataupu o loo i le jw.org ina ia ou toe maua ai le fiafia”

“O se ‘oa tautele lenei upega tafa‘ilagi. Ou te galue tauofo e fesoasoani i tagata logonoa, aemaise lava i talavou e logonoa. Ua fesoasoani le tele o mataupu eseese i le gagana fai taga o loo i le jw.org, ina ia faaleleia ai o‘u tomai i le gagana fai taga. Ua fesoasoani fo‘i ia ou maua ni manatu e faasoa atu i ē e manana‘o e faaleleia a latou faauōga, ma o latou olaga faaleaiga.”—K. J., West Indies.

Fesoasoani mo Ē e Tauaso

“O a‘u o se tagata tauaso ua maua aogā mai i le jw.org. Ua vave ai ona ou maua faamatalaga, ia e masani ona ou faatali ai mo le tele o masina pe a lafo mai i le meli. Ua faaleleia ai le tulaga o lo‘u aiga, ma ua avea ai a‘u o se tasi e mafai ona fesoasoani atu i isi. Ua mafai ai fo‘i ona ou maua faamatalaga i le taimi lava o loo maua ai e a‘u uō e lelei le vaai.”—C. A., Amerika i Saute.

“Ua faaleleia ai le tulaga o lo‘u aiga ma ua avea ai a‘u o se tasi e mafai ona fesoasoani atu i isi”

“O se ‘oa tautele lenei upega tafa‘ilagi, aemaise mo i latou e lē mafai ona faitauina le Gagana Patupatu pe e lē lava fo‘i le seleni e faatau ai tusi i le Gagana Patupatu. Ua mafai e tagata tauaso ona maua faamatalaga i mataupu eseese, ona o lomiga ua faitau ma pu‘eina e faalogologo i ai. Ua saunia lenei upega tafa‘ilagi ina ia maua ai e ituaiga uma o tagata ni aogā. Ua fesoasoani iā i matou o ē e tauaso e lagona e tāua i matou, ma maua ai le autasi ma isi.”—R. D., Aferika.

Fesoasoani mo Ē Galala Faaleagaga

“O le eseesega o la outou upega tafa‘ilagi ma upega tafa‘ilagi a isi lotu, e tou te lē soona faaaogā ni faaupuga po o ni upu faalelotu e na o ta‘ita‘i lotu e malamalama i ai. E lē tele na‘uā fo‘i faamatalaga ma i‘u ai ina fiu le tagata faitau. E ese le faigofie o mataupu i la outou upega tafa‘ilagi. E tuusa‘o lava manatu o loo iai ma e lē tumu i ni a‘oa‘oga faafilosofia. Ua faaalia mai ai o le faatuatua e lē o se mea e faigatā ona malamalama i ai, ma e mafai ona maua e so o se tagata.”—A. G., Asia.

‘E ese le faigofie o mataupu i la outou upega tafa‘ilagi. E tuusa‘o lava manatu o loo iai. Ua faaalia mai ai e mafai ona maua e so o se tagata le faatuatua’

“Ou te lē iloa po o fea o le a i‘u i ai lo‘u olaga pe afai e leai le jw.org. Ua matuā pogisa faaleagaga lenei lalolagi ma ua pei le jw.org o se molī e faamalamalama a‘i. Na vave lava ona ou faitau ai i mataupu o loo faamatala ai le finagalo o le Atua e tusa ai o tulaga eseese, ma maua ai tali o le tele o fesili tāua i le olaga.”—J. C., West Indies.

“Ou te talisapaia le fesoasoani faaleagaga o loo ou maua mai i le jw.org, e ui o loo ou nofo i le vaomatua i Amerika i Saute. Ou te lē iloa le mea ou te sulu i ai pe ana leai lenei upega tafa‘ilagi.”—M. F., Amerika i Saute.

Faitau Atili

O ā Mea e Mafai Ona Maua i la Matou Tuatusi i le Initaneti?

E mafai ona e a‘oa‘o atili e faatatau iā i matou ma o matou talitonuga ma maua tali o au fesili faale-Tusi Paia.