Skip to content

Skip to secondary menu

Molimau a Ieova

Faa-Samoa

Faalaeiauina Molimau i Rusia ma Ukraine e le Vaega Pule

Faalaeiauina Molimau i Rusia ma Ukraine e le Vaega Pule

“Ua matou lagona le alofagia o i matou!” O le tala lenā a se fafine i Ukraine, o sē na faalogologo a o faitauina atu se tusi tāua e Stephen Lett, o se sui o le Vaega Pule a Molimau a Ieova. O lenei fafine o se tasi mai le 165,000 o Molimau, sa faalogologo i le lauga a le uso o Lett i lana asiasiga i le atunuu, i le faai‘uga o le vaiaso o Me 10 ma le 11, 2014.

E lima gagana sa faaliliuina ai lenā tusi faapea lauga faale-Tusi Paia, ma na mafai ona faalogologo uma mai i ai uso sa auai, i Maota mo Sauniga eseese e pe ā ma le 700 i Ukraine.

I le faai‘uga o lenā lava vaiaso, na faitau ai fo‘i lenā tusi e Mark Sanderson, o se isi sui o le Vaega Pule, a o faagasolo se polokalame na faia mo Molimau i Rusia. Sa faaliliuina lenā polokalame i gagana e 14, ma e 180,413 i latou na faalogologo mai i ai, i le silia ma le 2,500 o faapotopotoga i Belarus ma Rusia.

O lenei tusi mai i le Vaega Pule sa faapitoa lava mo faapotopotoga uma i Rusia ma Ukraine. Sa faitau e le uso o Sanderson le tusi i le gagana Rusia, ma sa uuna‘ia ai le lālā i Rusia e tusi e faapea: “Ua matuā pā‘ia loto o uso ma tuafāfine i le iloa o loo manatu mamafa mai le Vaega Pule iā i matou uma. Ua matou lagona e pei o loo fusi ma opo atu i matou e le Vaega Pule.”

O le fuafuaga autū o lenei tusi, ina ia faamāfanafana ma faamalosia Molimau i lenā vaipanoa o loo faateteleina ai faiga faapolotiki. Sa uuna‘ia le ‘auuso ia faaauau ona lē avea ma “tagata o le lalolagi,” e ala i le solitū e tusa ai o mataupufai faapolotiki.—Ioane 17:16.

Na faalaeiau e le Vaega Pule uso ma tuafāfine Molimau ina ia faatumau se faiā vavalalata ma Ieova, e ala i le tatalo, su‘esu‘e ma manatunatu loloto i le Afioga a le Atua. Sa faamanatu atu i le aofia e tusa po o ā tofotofoga e latou te fesaga‘ia, ae e mafai ona latou mautinoa e lē i‘uvale le folafolaga a le Atua o loo i le Isaia 54:17: “O so o se auupega ua faia e faasagatau iā te oe e lē manuia.”

Na faai‘u le tusi a le Vaega Pule i upu nei: “E matou te alolofa tele iā te outou. Ia outou mautinoa, o loo matou manatuaina pea outou ma o loo matou tatalo iā Ieova mo outou.”

E tusa ai o lenei asiasiga, na tusi le ofisa o le lālā a Molimau a Ieova i Ukraine e faapea: “Ua matuā maofa uso i le alolofa ma le manatu mamafa mai o le Vaega Pule. O le iai faatasi o le uso o Lett ma Sanderson i Ukraine ma Rusia i le faai‘uga o le vaiaso lava lea e tasi, ua atili faamautinoa mai ai le autasi o tagata o Ieova, ma faaalia mai ai i uso le matuā tele o le alofa o Ieova ma Iesu iā i latou. E matou te ioe uma i le sa‘o o le taimi o le asiasiga, ma ua atili faamalosia ai i matou e faaauau ona auauna iā Ieova, e tusa po o ā faafitauli e oo mai.”