Ua ofoina atu e Molimau a Ieova se polokalame o suʻesuʻega faale-Tusi Paia lea e taliina ai le tele o fesili, e aofia ai fesili nei:

  • O ai le Atua?

  • Pe e manatu moni mai le Atua iā te aʻu?

  • E faapefea ona faaleleia laʻu faaipoipoga?

  • E faapefea ona ou maua le fiafia i le olaga?

O le a e maua tali i fesili e masani ona lāgā e uiga i la matou polokalame o suʻesuʻega faale-Tusi Paia o loo mulimuli mai.

O le ā le auala e faia ai le suʻesuʻega? E matou te talanoa i mataupu e pei o le “Atua” po o le “faaipoipoga,” ma iloilo mau eseese lea e fesootaʻi i le mataupu. O le faatusatusa o nei mau, e matou te iloa ai faamatalaga a le Tusi Paia e uiga i na mataupu, ma o le faia faapea ua tuu atu ai i le Tusi Paia e faamalamalama mai e ia le manatu.

Ina ia fesoasoani iā i matou i le suʻesuʻeina o le Tusi Paia, e matou te faaaogā le tusi O ā Aʻoaʻoga Moni a le Tusi Paia? Ua faamatalaina ma le manino i lenei tusi, le manatu moni o le Tusi Paia e uiga i mataupu e pei o le Atua, Iesu, ma lo tatou lumanaʻi.

E fia le totogi o se suʻesuʻega faale-Tusi Paia? E fai fua le suʻesuʻega, ma e lē totogia lomiga o loo faaaogāina mo le suʻesuʻega.

O le ā le umi o se suʻesuʻega faale-Tusi Paia? O le toʻatele o tagata e latou te faaavanoa se itula pe sili atu i vaiaso taʻitasi, ina ia faia ai se suʻesuʻega faale-Tusi Paia. Ae e fetuunaʻi lava le umi e fua i lau faasologa.

O le ā e tupu pe a ou talosaga mo se suʻesuʻega faale-Tusi Paia? Pe a e talosaga mo se suʻesuʻega faale-Tusi Paia o le a asiasi atu se Molimau a Ieova i le taimi ma le nofoaga e talafeagai ma oe. O le a ia faaalu ni nai minute e faataʻitaʻi ai le polokalame o suʻesuʻega faale-Tusi Paia. E mafai ona faaauau lenei suʻesuʻega pe a faaalia le fiafia.

Pe e tatau ona avea aʻu ma Molimau a Ieova pe a ou talia se suʻesuʻega faale-Tusi Paia? Leai. E fiafia Molimau a Ieova e aʻoaʻo tagata e faatatau i le Tusi Paia, ae e matou te lē faamalosia se tasi e avea ma sui o la matou tapuaʻiga. Nai lo o lea, e matou te faailoa atu ma le faaaloalo aʻoaʻoga mai i le Tusi Paia ma amanaʻia le aiā a le tagata lava ia i mea e talitonu ai.—1 Peteru 3:15.