Accessibility setting

Filifili le gagana

Skip to secondary menu

Skip to content

Molimau a Ieova

Faa-Samoa

Aiseā e Lē Talia ai e Molimau a Ieova Tuigātoto?

Aiseā e Lē Talia ai e Molimau a Ieova Tuigātoto?

Manatu sesē taatele

Talafatu: E lē talitonu Molimau a Ieova e mafai ona fesoasoani fomaʻi iā i latou, ma o le māfuaaga lenā e latou te lē saʻilia ai ni togafitiga faafomaʻi.

Tala Moni: E matou te saʻilia le togafitiga e sili ona lelei mo i matou ma o matou aiga. Pe a aafia i matou i maʻi o le tino, e matou te saʻili fomaʻi ua iai le tomai e saunia mai togafitiga ma taotoga e lē faaaogāina ai tuigātoto. E matou te talisapaia le agaʻigaʻi i luma o le poto faafomaʻi. O le mea moni, o togafitiga e faasaoina ai le toto na fuafuaina e fesoasoani i Molimau a Ieova, ua mafai foʻi ona aogā i tagata lautele. I le tele o atunuu, e mafai ona filifili le tagata maʻi e ʻalofia lamatiaga o tuigātoto, e pei o faamaʻi e feaveaʻi e le toto, aafiaga i le malosi o le tino e puipuia ai mai i faamaʻi, ma nisi faalētonu e pogai mai i togafitiga a fomaʻi.

Talafatu: E talitonu Molimau a Ieova e mafai ona faamālōlōina le maʻi o se tagata e ala i le faatuatua.

Tala Moni: E matou te lē faia ni faamālōlōga faavavega.

Talafatu: E taugatā togafitiga e lē faaaogāina ai tuigātoto.

Tala Moni: E taugofie togafitiga faafomaʻi e lē faaaogāina ai tuigātoto. *

Talafatu: E toʻatele Molimau a Ieova e aofia ai ma fanau, ua maliliu i tausaga taʻitasi ona o le mumusu e talia tuigātoto.

Tala Moni: E matuā lē faavaea lava lenei faamatalaga. E masani ona faia e fomaʻi tipitipi togafitiga lavelave e pei o taotoga o le fatu, taotoga o ponaivi, ma le suia o totoga o tagata, ae lē faaaogāina ai tuigātoto. * O tagata mamaʻi e aofia ai fanau o ē e lē talia tuigātoto, e masani ona toe vave malolosi pe sili atu foʻi ona mālōlōina nai lo o ē e talia tuigātoto. * E tusa po o le ā le tulaga e tulaʻi mai, ae e leai se tasi e mafai ona faamautinoa mai o le a maliu se tagata maʻi ona o le musu e talia tuigātoto, pe o le a faaauau pea ona ola pe a taliaina.

Aiseā e lē talia ai e Molimau a Ieova tuigātoto?

O se mataupu faalelotu lenei, ae lē o se mataupu faafomaʻi. I le Feagaiga Fou ma le Feagaiga Tuai, o loo faatonuina ma le manino ai i tatou ia taumamao mai i le toto. (Kenese 9:4; Levitiko 17:10; Teuteronome 12:23; Galuega 15:28, 29) E silasila foʻi le Atua i le toto o le ola lea. (Levitiko 17:14) O lea, e matou te ʻalofia le faaaogāina o le toto ona e matou te usiusitaʻi i le Atua, ma e matou te faaaloalo foʻi iā te ia o Lē e Foaʻi maia le ola.

Suiga o manatu

E mafai ona taulau manuia togafitiga lavelave e lē faaaogāina ai tuigātoto

I se tasi taimi, na tele ai ina manatu fomaʻi i togafitiga e lē faaaogāina ai tuigātoto, o se faiga ogaoga ma e pei o loo pule i le ola. Peitaʻi, na suia na manatu i tausaga talu ai nei. O se faaaʻoaʻoga, i le 2004, o loo taʻua ai i se mataupu na lomia i se tusi aʻoga faafomaʻi e faapea, “o le tele o togafitiga na faia mo tagata mamaʻi a Molimau a Ieova, o le a avea o se faiga tumau i tausaga o mulimuli mai.” * I le 2010, na taʻua ai i se mataupu o loo i le tusi Heart, Lung and Circulation e faapea, ‘e lē tatau ona faia i na o tagata Molimau a Ieova togafitiga e lē faaaogāina ai le toto, ae e tatau i fomaʻi ona faaaogā lenā togafitiga i so o se taimi.’

E faitau afe fomaʻi i le lalolagi aoao ua faaaogāina i le taimi nei auala o togafitiga e faasaoina ai le toto, e faia ai taotoga lavelave e lē faaaogāina ai tuigātoto. O na togafitiga, o loo faaaogā i atunuu tauatiaʻe ma ua talosagaina foʻi e tagata mamaʻi e lē o ni Molimau a Ieova.

^ pala. 8 Tagaʻi i le tusi Transfusion and Apheresis Science, Tusi 33, Nu. 3, itu. 349.

^ pala. 10 Tagaʻi i tusi The Journal of Thoracic and Cardiovascular Surgery, Tusi 134, Nu. 2, itu. 287-288; Texas Heart Institute Journal, Tusi 38, Nu. 5, itu. 563; Basics of Blood Management, itu. 2; ma le Continuing Education in Anaesthesia, Critical Care & Pain, Tusi 4, Nu. 2, itu. 39.

^ pala. 10 Tagaʻi i tusi The Journal of Thoracic and Cardiovascular Surgery, Tusi 89, Nu. 6, itu. 918; ma le Heart, Lung and Circulation, Tusi 19, itu. 658.

^ pala. 14 Continuing Education in Anaesthesia, Critical Care & Pain, Tusi 4, Nu. 2, itulau 39.