Skip to content

Skip to secondary menu

Molimau a Ieova

Faa-Samoa

Aiseā e Lē Auai ai Molimau a Ieova i Taua?

Aiseā e Lē Auai ai Molimau a Ieova i Taua?

O māfuaaga nei e lē auai ai Molimau a Ieova i taua:

  1. Usiusitaʻi i le Atua. Ua faapea mai le Tusi Paia, e “tuʻi [e auauna a le Atua] a latou pelu e fai ma uʻamea suōtosina” ma e lē “toe aʻoaʻo foʻi i taua.”—Isaia 2:4.

  2. Usiusitaʻi iā Iesu. Na faatonuina e Iesu le aposetolo o Peteru: “Ia toe sulu lau pelu i lona faamoega, auā o i latou uma e tago i le pelu, e faaumatia i le pelu.” (Mataio 26:52) O lea, na faailoa mai ai e Iesu e lē faaaogā e ona soo ni auupega o taua.

    Na usitaʻia e soo o Iesu lana poloaʻiga ina ia lē avea o “ni tagata o le lalolagi,” e ala i le maumauaʻi e lē faia sa latou vaega i mataupu faapolotiki. (Ioane 17:16) E latou te lē tetee atu i gaoioiga a vaegaʻau, pe aiā fua iā i latou ua filifili e auai i vaegaʻau.

  3. Alofa mo isi. Na poloaʻia e Iesu ona soo ina ia ‘⁠alofa le tasi i le isi.’ (Ioane 13:34, 35) O le faia faapea, ua maua ai se ʻauuso i le lalolagi atoa e lē siitaua le tasi i le isi.—1 Ioane 3:10-12.

  4. Le faaaʻoaʻoga a uluaʻi Kerisiano. Ua taʻua i le Encyclopedia of Religion and War: “Na teena e uluaʻi soo o Iesu taua ma vaegaʻau,” ma na vaai i na gaoioiga “e lē ōgatusa ma le aʻoaʻoga a Iesu e faatatau i le alofa ma le poloaʻiga ina ia alofa i fili.” E taitutusa foʻi ma le manatu na taʻua e se faitofā mai i Siamani o Peter Meinhold, e uiga i uluaʻi soo o Iesu: “E lē mafai lava ona avea se Kerisiano ma fitafita.”

Fesoasoani i tagata lautele

O Molimau a Ieova o ni sui aogā o se sosaiete ma e lē o se lamatiaga i atunuu o loo latou nonofo ai. E matou te faaaloalo i pulega a malo, e ōgatusa ma faatonuga nei mai i le Tusi Paia:

  • ‘⁠Ia gauaʻi i faipule silisili.’—Roma 13:1.

  • “Ia totogi atu mea a Kaisara iā Kaisara, a o mea a le Atua ia avatu i le Atua.”—Mataio 22:21.

O lea, e matou te usiusitaʻi i tulafono, totogi a matou lafoga, ma lagolagoina taumafaiga a malo ina ia saunia mea mo le lelei o tagata lautele.