O le tuafafine o Cynthia Pablo, o se tagata talaʻi e leʻi papatiso e 64 ona tausaga, ma e auai i le faapotopotoga i le gagana faataga i Panghulo i Filipaina. E logonoa toe pō lana vaai, ma e lē tagolima. E nonofo faatasi ma ona tauaiga lē talitonu i se vaega o le aai o Valenzuela lea e matuā toʻatele tagata e nonofo ai. E ui e faigatā le tulaga o Cynthia, ma ua faateteleina ona o le faamaʻi, ae o loo saunia pea e uso ma tuafāfine i lana faapotopotoga le fesoasoani.

E ono faigofie ona aafia Cynthia i le faamaʻi o le KOVITI-19 ona ua matua lona soifua. Ua utiuti le suāvai i lo latou vaipanoa ona o le faamaʻi, ma faigatā ai ona fai ana tagamea. Na masani ona fesoasoani tuafāfine o le faapotopotoga i le faia o ana tagamea, ae o lea ua lē mafai ona o faasāsāaga a le malo ona o le faamaʻi.

Na talosaga e le uso o Walter Ilumin, o se toeaina mai i lana faapotopotoga, se faatagaga mai i le malo e mafai ai ona alu i le fale o Cynthia e fesoasoani iā te ia. E na o i latou e faia auaunaga manaʻomia na mauaina lenā faatagaga. E lē gata i le faia o ana tagamea, ae e avatu foʻi e le uso o Walter meaʻai ma isi mea manaʻomia. E mulimuli o ia i taʻiala a le malo mo le puipuiga, e aofia ai le faia o se tali fofoga ma le fufuluina o lima i taimi uma.

E puʻe e Cynthia ni vitiō pupuu o ana faamatalaga e faailoa atu ai lona lotofaafetai i uso ma tuafāfine, ona faaali atu lea e le uso o Walter i le faapotopotoga.

E malaga atu foʻi le uso o Walter i le fale o Cynthia ina ia faaliliu sauniga i luga o le zoom i le gagana faataga e faia i luga o lima, mo ē e pō le vaai. O le faia faapea, na fesoasoani iā Cynthia e faia ai e lē aunoa ona sao i le Suʻesuʻega o le Olomatamata. E matuā faalaeiauina i latou uma e auai i le sauniga i ona sao, e ui i faigatā o loo ia fesagaʻia.

E mautinoa e fiafia le finagalo o Ieova a o silasila mai i ona tagata o loo fesoasoani le tasi i le isi, ma ua ʻsili foʻi ona tatou faia faapea auā ua tatou iloa ua matuā latalata mai lava le aso.’—Eperu 10:24, 25.