Skip to content

Skip to secondary menu

Skip to table of contents

Molimau a Ieova

Faa-Samoa

Tala Lelei Mai i le Atua!

 Lesona 6

O le ā le Faamoemoe mo Ē ua Maliliu?

O le ā le Faamoemoe mo Ē ua Maliliu?

Na fetalai le Atua iā Atamu: “O le efuefu oe, e te toe foʻi atu lava i le efuefu.”KENESE 3:19.

1. O le ā le tala lelei e uiga i ē ua maliliu?

Ua fā aso talu ona maliu Lasalo le uō a Iesu, ae taunuu loa Iesu i Petania e lata ane i Ierusalema. Na ō atu i le tuugamau Iesu ma tuafāfine o Lasalo, o Mareta ma Maria. E leʻi umi ae lolofi atu le toʻatele o tagata. Seʻi mafaufau i le fiafia o Mareta ma Maria ina ua toe faatūina e Iesu Lasalo!Faitau le Ioane 11:21-24, 38-44.

Ua leva ona iloa e Mareta le tala lelei e uiga i ē ua maliliu. Na ia iloa o le a toe faatutūina e Ieova i latou ua maliliu, ina ia ola i luga o le lalolagi.Faitau le Iopu 14:14, 15.

2. O le ā le tulaga o ē ua maliliu?

O tagata e fai mai i le efuefu. (Kenese 2:7; 3:19) E leai se agaga o le tagata e ola pea pe a maliu. O i tatou o ni foafoaga faitino, ma e leai se vaega o i tatou e mafai ona sao mai i le oti. Pe a tatou feoti, ua lē toe ola o tatou faiʻai, ma ua lē toe iai foʻi ni o tatou manatunatuga. O lea la, ina ua toe faatūina mai Lasalo, e leai sana tala e faatatau i le mea sa iai ina ua maliu, auā o ē ua oti e latou te lē iloa se mea.Faitau le Salamo 146:4; Failauga 9: 5, 6, 10.

Pe e faapuapuagatia e le Atua tagata i le afi pe a maliliu? Talu ai o loo faaalia mai i le Tusi Paia, o ē ua maliliu e lē o toe iloa se mea, e manino mai la, o le afi i seoli o se aʻoaʻoga sesē e taʻuleagaina ai le Atua. E ʻinoʻino o Ia i le aʻoaʻoga e faapea e faapuapuagatia tagata i le afi.Faitau le Ieremia 7:31.

 3. Pe e mafai ona talanoa mai ē ua maliliu iā i tatou?

E lē mafai e i latou ua maliliu ona tautatala pe e faalogo foʻi. (Salamo 115:17) Ae e iai nisi o agelu e leaga, ma e ono talanoa atu i tagata o loo feola, ma faafoliga mai i tagata ua maliliu. (2 Peteru 2:4) E faasā e Ieova le taumafai e talanoa atu i ē ua maliliu.Faitau le Teuteronome 18:10, 11.

4. O ai o le a toetutū mai?

O le a toetutū mai i le lalolagi fou le faitau miliona o ē ua maliliu. O le a faatutūina foʻi nisi o ē na faia mea leaga ona latou te leʻi iloa le Atua.Faitau le Luka 23:43; Galuega 24:15.

E mafai e i latou o le a toetutū mai ona aʻoaʻo upu moni e uiga i le Atua, ma faaalia le faatuatua iā Iesu e ala i le usiusitaʻi iā te ia. (Faaaliga 20:11-13) O ē e toetutū mai ma faia mea lelei, o le a olioli i le ola e faavavau i le lalolagi.Faitau le Ioane 5:28, 29.

5. O ā mea ua tatou iloa e uiga iā Ieova ona o le toetū?

Ua mafai ona maua le faamoemoe o le toetū, ona na auina mai e le Atua lona Alo ina ia maliu mo i tatou. O le toetū, ua tatou iloa ai le alofa ma le agalelei faifua o Ieova iā i tatou. O ai e sili ona e fia feiloaʻi i ai, pe a toetutū mai ē ua maliliu?Faitau le Ioane 3:16; Roma 6:23.

 

Faitau Atili

O Ā AʻOAʻOGA MONI A LE TUSI PAIA

O Fea o Iai Ē ua Maliliu?

Ia iloilo le aʻoaʻoga a le Tusi Paia e faatatau i le tulaga o ē ua maliliu, ma le māfuaaga e maliliu ai tagata.

O Ā AʻOAʻOGA MONI A LE TUSI PAIA

Le Faamoemoe mo Ē Pele ua Maliliu

Po ua maliu se tasi e pele iā te oe? Pe e mafai ona e toe feiloaʻi ma i latou? Ia aʻoaʻo atili e faatatau i le aʻoaʻoga a le Tusi Paia i le toetū.

O Ā AʻOAʻOGA MONI A LE TUSI PAIA

O Taaʻiga a Agelu ma Agaga Leaga i o Tatou Olaga

O loo taʻua i le Tusi Paia agelu ma temoni. Pe e iai moni nei foafoaga agaga? Pe e mafai ona iai so latou aafiaga i o tatou olaga?