Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tala Lelei Mai i le Atua!

 Lesona 4

O ai Iesu Keriso?

O ai Iesu Keriso?

O ā uiga na faaalia e Iesu, na faigofie ai i tagata ona talanoa atu iā te ia?MATAIO 11:29; MAREKO 10:13-16.

1. O fea na afio mai ai Iesu?

I le lē pei o isi tagata, sa soifua Iesu i le lagi o se agaga, a o leʻi fanau mai i le lalolagi. (Ioane 8:23) O Iesu o le uluaʻi foafoaga a le Atua, ma na fesoasoani i le foafoaina o isi mea uma. E na o ia lava na foafoaina tuusaʻo e Ieova, o lea ua talafeagai ai ona taʻua o ia o le Atalii “e toʻatasi.” (Ioane 1:14) Sa avea Iesu ma Fofoga Fetalai o le Atua, ma ua taʻua ai foʻi o “le Upu.”Faitau le Faataoto 8:22, 23, 30; Kolose 1:15, 16.

2. Aiseā na afio mai ai Iesu i le lalolagi?

Na tuuina e le Atua le soifua o lona Alo mai i le lagi i le manava o le taupou Iutaia o Maria. O lea la, e leʻi iai se tamā faaletagata o Iesu. (Luka 1:30-35) Na afio mai Iesu i le lalolagi (1) e aʻoaʻo le upu moni e uiga i le Atua, (2) faataatia se faaaʻoaʻoga i le faia o le finagalo o le Atua, e tusa lava pe e tatou te fesagaʻia faigatā, ma le (3) foaʻi mai o lona soifua lelei atoatoa e fai “ma togiola.”Faitau le Mataio 20:28.

3. Aiseā e tatou te manaʻomia ai se togiola?

O le togiola, o se tau e totogi e toe faasaʻoloto mai ai se tagata ua faamataʻuina o le a fasiotia. (Esoto 21:29, 30) E leʻi aofia i le uluaʻi fuafuaga a le Atua mo tagata, le oti ma le ola matua. E faapefea ona tatou iloa lenā mea? Na taʻu atu e le Atua i le uluaʻi tagata o Atamu, afai e na te faia le mea o loo taʻua i le Tusi Paia o le “agasala,” o le a oti o ia. Ana lē agasala Atamu, e lē oti lava. (Kenese 2:16, 17; 5:5) E tusa ai ma le Tusi Paia, ua “oo mai” le oti i tagata uma ona o Atamu. O lea la, ua tuufaasolo mai ai i ē uma na tupuga mai iā te ia le agasala,  ma le faasalaga o le oti. E tatou te manaʻomia se togiola ina ia faasaoina ai i tatou mai i le faasalaga o le oti, lea ua tuufaasolo mai iā Atamu.Faitau le Roma 5:12; 6:23.

O ai e mafai ona totogia le togiola ina ia faasaʻoloto ai i tatou mai le oti? Pe a feoti, ua tatou totogia ai na o a tatou lava agasala. E lē mafai ona totogia e se tagata e lē lelei atoatoa agasala a isi.Faitau le Salamo 49:7-9.

4. Aiseā na maliu ai Iesu?

E lē pei Iesu o i tatou auā o ia o se tagata e lelei atoatoa. E leʻi manaʻomia ona maliu o ia auā e leai ni ana agasala, ae na maliu ona o a tatou agasala. Na auina mai e le Atua lona Alo e maliu mo i tatou, e faaalia ai Lona alofa tele i tagata. Na faaalia foʻi e Iesu lona alofa mo i tatou i le usiusitaʻi i lona Tamā, ma foaʻi mai lona ola mo a tatou agasala.Faitau le Ioane 3:16; Roma 5:18, 19.

5. O le ā le tulaga o Iesu i le taimi nei?

A o iai Iesu i le lalolagi, sa ia faamālōlōina maʻi, faatutūina ē na maliliu, ma laveaʻiina tagata puapuagatia, ma ua faataʻitaʻia mai ai mea o le a ia faia i le lumanaʻi mo tagata usiusitaʻi uma. (Mataio 15:30, 31; Ioane 5:28) Ina ua mavae le maliu o Iesu, na toe faatūina o ia e le Atua o se foafoaga agaga. (1 Peteru 3:18) Na faatalitali Iesu i le itu taumatau o Ieova, seʻia oo i le taimi e tuuina atu ai iā te ia le mana e pule ai o se Tupu i le lalolagi aoao. (Eperu 10:12, 13) Ua pule nei Iesu o se Tupu i le lagi, ma o loo folafola atu e ona soo le tala lelei i le lalolagi aoao.Faitau le Tanielu 7:13, 14; Mataio 24:14.

E lē o toe umi ae faaaogā loa e Iesu lona mana o se Tupu e aveesea ai puapuaga uma, ma i latou o loo faapogaia. O i latou uma o loo faaalia le faatuatua ma usiusitaʻi iā Iesu, o le a olioli i le ola i le parataiso i le lalolagi.Faitau le Salamo 37:9-11.

 

Faitau Atili

O le Togiola o le Meaalofa Sili Lea a le Atua

O le ā le togiola? E faapefea ona e maua mai ai aogā?